ສຳເລັດກອງປະຊຸມເຈົ້າໜ້າທີ່ອາວຸໂສການເງິນອາຊຽນ
ລະຫວ່າງວັນທີ 19-23 ກຸມພາ 2024 ນີ້, ກະຊວງການເງິນຮ່ວມກັບທະນາຄານແຫ່ງສປປ ລາວ, ໄດ້ດຳເນີນການເປັນເຈົ້າພາບຈັດກອງປະຊຸມ ແລະເປັນປະທານກອງປະຊຸມເຈົ້າໜ້າທີ່ອາວຸໂສເພື່ອກະກຽມໃຫ້ກອງປະຊຸມຮອງລັດຖະມົນຕີການເງິນ ແລະ ຮອງຜູ້ວ່າການທະນາຄານກາງອາຊຽນ ຕາມຮອບວຽນການເປັນປະທານອາຊຽນຂອງສປປ ລາວ ໃນປິ 2024,ໂດຍມີຜູ້ແທນຫຼາຍກ່ວາ 250 ທ່ານຈາກ ກະຊວງການເງິນ ແລະ ທະນາຄານກາງ 10 ປະເທດອາຊຽນ, (ປະເທດຕີມໍເລສເຕ້ໃນນາມຜູ້ສັງເກດການ), ກອງເລຂາອາຊຽນ, ອົງການຈັດຕັ້ງສາກົນ ແລະ ບັນດາສະຖາບັນການເງິນພາກພື້ນອາຊຽນ.
ກອງປະຊຸມ ພາຍໃຕ້ການເປັນປະທານຮ່ວມລະຫວ່າງກະຊວງການເງິນໂດຍແມ່ນທ່ານ ວົງຄໍາແຫງ ວົງທະຈັກ ຫົວໜ້າກົມການເງິນຕ່າງປະເທດ ແລະ ທະນາຄານແຫ່ງ ສປປ ລາວ ໂດຍແມ່ນທ່ານ ນາງ ແພງສີ ແພງເມືອງ ຫົວໜ້າກົມຮ່ວມມືສາກົນ, ໃນໂອກາດນີ້ທ່ານ ວົງຄໍາແຫງ ວົງທະຈັກ ຫົວໜ້າກົມການເງິນຕ່າງປະເທດ ກະຊວງການເງິນ ໄດ້ຕາງໜ້າໃຫ້ປະທານຮ່ວມ ກ່າວເປີດກອງປະຊຸມ ແລະ ໄດ້ຍົກໃຫ້ເຫັນເຖິງຄວາມສຳຄັນຂອງວຽກງານການຮ່ວມມືດ້ານການເງິນ-ເງິນຕາອາຊຽນ,ສືບຕໍ່ເພີ່ມທະວີຍຸດທະສາດການຮ່ວມມືໃຫ້ມີການພັດທະນາຢ່າງເຂັ້ມແຂງ ເພື່ອຮັບປະກັນໃຫ້ແກ່ຄວາມໝັ້ນທ່ຽງທາງດ້ານການເງິນໃຫ້ມີຄວາມຍືນຍົງ.
ຫຼັງຈາກນັ້ນ,ກອງປະຊຸມໄດ້ຮັບຟັງການລາຍງານກ່ຽວກັບບັນດາແຜນວຽກບູລິມະສິດປະຈໍາປີ2024 ພາຍໃຕ້ການເປັນປະທານຮອບວຽນເພື່ອສະໜັບສະໜູນຕາມຍຸດທະສາດ 3 ເສົາຄໍ້າເສດຖະກິດ ແລະ ການຈັດຕັ້ງປະຕິບັດຂະແໜງການເງິນທີ່ປະກອບມີ 2 ໜ້າວຽກທີ່ຕິດພັນໂດຍສະເພາະໃນຂົງເຂດທະນາຄານວຽກງານບູລິທະສິດທີ່ 10 (PED 10): ການແກ້ໄຂບັນຫາການຫຼຸດໂຕນຂອງແຫຼ່ງທຶນໃນກຸ່ມຈຸນລະວິສາຫະກິດ,ວິສາຫະກິດຂະໜາດນ້ອຍ ແລະ ກາງ ແລະ ໃນຂົງເຂດການເງິນແມ່ນວຽກງານບູລິມະສິດ ທີ່ 11 (PED 11): ຂອດການສຶກສາດ້ານເຕັກນິກກ່ຽວກັບລະບົບພາສີປະຕູດຽວອາຊຽນຮູບແບບໃໝ່ ຂອງ ສປປ ລາວ, ພ້ອມທັງໄດ້ມີການປຶກສາຫາລື ແລະ ແລກປ່ຽນຄວາມຄືບໜ້າຂອງວຽກງານການຮ່ວມມື ແລະ ການເຊື່ອມໂຍງດ້ານການເງິນ-ເງິນຕາອາຊຽນທີ່ປະກອບດ້ວຍແຜນແມ່ບົດປະຊາຄົມເສດຖະກິດອາຊຽນ 2025, ແຜນການເຊື່ອມໂຍງດ້ານການເງິນ-ເງິນຕາອາຊຽນ, ແລະ ການຮ່ວມມືດ້ານການເງິນອາຊຽນ.
ພ້ອມກັນນັ້ນ ຜູ້ແທນກອງປະຊຸມ ຍັງໄດ້ ປຶກສາຫາລື ແລະ ຮັບຮອງດ້ານຫຼັກການຂອງບາງວຽກງານທີ່ເປັນຂໍ້ລິເລີ່ມການຮ່ວມມືໃໝ່ໆຂອງພາກພື້ນອາຊຽນ. ພ້ອມທັງໄດ້ສະເໜີແຜນການຈັດກອງປະຊູມລະດັບຮອງລັດຖະມົນຕີການເງິນ ແລະ ຮອງຜູ້ວ່າການທະນາຄານກາງອາຊຽນໃນເດືອນເມສາ 2024 ທີ່ນະຄອນຫຼວງພະບາງ, ພ້ອມທັງໄດ້ມອບການຮັບເປັນປະທານກອງປະຊຸມ AFCDM-WG ຂອງ ສປປ ລາວ ໃຫ້ປະເທດມາເລເຊຍ ສືບຕໍ່ເປັນປະທານກອງປະຊຸມ AFCDM-WG ໃນປີ 2025ຕາມຮອບວຽນ.
ກອງປະຊຸມຄັ້ງນີ້ ເປັນການສັງລວມບັນຫາການຮ່ວມມືດ້ານການເງິນ-ເງິນຕາເພື່ອສືບຕໍ່ກະກຽມຄວາມພ້ອມດ້ານຕ່າງໆໃຫ້ແກ່ການເປັນປະທານກອງປະຊຸມຮອງລັດຖະມົນຕີ, ຮອງຜູ້ວ່າການທະນາຄານແຫ່ງສປປ ລາວ ແລະ ລັດຖະມົນຕີກະຊວງງການເງິນ ແລະ ຜູ້ວ່າການທະນາຄານແຫ່ງ ສປປ ລາວ ທີ່ຈະໄດ້ຈັດຂຶ້້ນໃນເດືອນເມສາ 2024 ນີ້.
