ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສະຖາປະນາ ສປປ ລາວ ຄົບຮອບ 45 ປີ
( 02 ທັນວາ 1975 – 2020 ) ຢ່າງສຸດໃຈ

ສຳເລັດກອງປະຊຸມໃຫຍ່ຜູ້ແທນແນວລາວສ້າງຊາດ ແຂວງໄຊສົມບູນ ຄັ້ງທີ I.

ກອງປະຊຸມໃຫຍ່ຜູ້ແທນແນວລາວສ້າງຊາດ ແຂວງໄຊສົມບູນ ຄັ້ງທີ I ໄດ້ໄຂຂຶ້ນຢ່າງເປັນທາງການ ໃນວັນທີ 18 ພະຈິກ ນີ້ ທີ່ສະໂມສອນເມືອງອະນຸວົງ ໂດຍການເປັນປະທານຂອງສະຫາຍ ເລັ່ງຊົ່ງ ຕົ່ງສີ ຄະນະປະຈຳພັກແຂວງ, ປະທານແນວລາວສ້າງຊາດແຂວງໄຊສົມບູນ ເປັນກຽດເຂົ້າຮ່ວມຂອງສະຫາຍ ພົຕ ຄຳລຽງ ອຸທະໄກສອນ ເລຂາພັກແຂວງ, ເຈົ້າແຂວງໄຊສົມບູນ ແລະ ທ່ານ ເຍ່ຍເກີຢ່າ ໝໍຈໍຈົງຕົວ ຄະນະພັກ, ຄະນະປະຈຳ, ຮອງປະທານສູນກາງແນວລາວສ້າງຊາດ, ມີຄະນະບໍລິຫານງານພັກແຂວງ, ຄະນະປະຈໍາພັກແຂວງ, ກຳມະການພັກແຂວງ, ເຈົ້າເມືອງ 5 ເມືອງ,ຜູ້ຊົງຄຸນວຸດທິ, ນັກປະຕິວັດອາວຸໂສບຳນານ , ແຂກຖືກເຊີນ ແລະ ຜູ້ແທນເຂົ້າຮ່ວມທັງໝົດ 49 ສະຫາຍ, ຍິງ 8 ສະຫາຍ, ພະອາຈານ 1 ອົງ ທີ່ເປັນຕົວແທນ ໃຫ້ແກ່ປະຊາຊົນບັນດາເຜົ່າ, ຊັ້ນຄົນ, ສາສະໜາ, ເພດ-ໄວ ໃນທົ່ວແຂວງໄຊສົມບູນ.
ໂອກາດນີ້ ສະຫາຍ ເລັ່ງຊົ່ງ ຕົ່ງສີ ໄດ້ກ່າວໄຂກອງປະຊຸມຢ່າງເປັນທາງການ ພ້ອມທັງຜ່ານ ຮ່າງບົດລາຍງານທັງ 2 ພາກ ສະຫາຍໄດ້ຕີລາຄາການຈັດຕັ້ງປະຕິບັດວຽກງານຂອງແນວລາວສ້າງຊາດ ໃນໄລຍະ 5 ປີ ຜ່ານມາ ແລະ ທິດທາງແຜນການ 5 ປີ ຕໍ່ໜ້າ ໂດຍຍົກໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງ ຊຶ່ງຕະຫລອດໄລຍະ 5 ປີ ຜ່ານມາ ແນວລາວສ້າງຊາດ ແຂວງໄຊສົມບູນ ໄດ້ມີຜົນສຳເລັດວຽກງານທີ່ພົ້ນເດັ່ນຫລາຍດ້ານ ເປັນຕົ້ນ ອົງການແນວລາວສ້າງຊາດແຂວງ ໄດ້ເຮັດໜ້າທີ່ເປັນຄັນທຸງແຫ່ງການເຕົ້າໂຮມຄວາມສາມັກຄີທົ່ວປວງຊົນຢ່າງເປັນປຶກແຜ່ນແໜ້ນໜາ, ເສີມຂະຫຍາຍສິດເປັນເຈົ້າຂອງປະຊາຊົນລາວບັນດາເຜົ່າ, ອະນຸລັກຮັກສາຮີດຄອງປະເພນີອັນດີງາມຂອງຊາດ ຂອງເຜົ່າ ພ້ອມທັງປຸກລະດົມກຳລັງແຮງໃນສັງຄົມ ເຂົ້າຮ່ວມຂະບວນການແຂ່ງຂັນຮັກຊາດ ແລະ ພັດທະນາ ໂດຍສະເພາະແມ່ນການຈັດຕັ້ງປະຕິບັດແຜນພັດທະນາລຶບລ້າງຄວາມທຸກຍາກ ເຕົ້າໂຮມຄວາມສາມັກຄີປອງດອງຂອງປະຊາຊົນບັນດາເຜົ່າ ໃນນີ້ສາດມາດປະເມີນຄອບຄົວສາມັກຄີປອງດອງໄດ້ທັງໝົດ 8.987 ຄອບຄົວ ແລະ 55 ບ້ານ ທົ່ວແຂວງ ປະກອບມີ 11 ຊົນເຜົ່າ ໃນນີ້ອັດຕາສ່ວນໃຫຍ່ແມ່ນເຜົ່າມົ້ງກວມເອົາ 53,67%, ມີ 2 ສາສະໜາ ແລະ 1 ບັນພະບູລຸດ ຄື: ສາສະໜາພຸດ ກວມເອົາ 24,32%, ມີ 26 ວັດ, ສາສະໜາເຢຊູຄຣິດ ກວມເອົາ 12,169%, ມີ 8 ໂບດ ແລະ ເຊື່ອຖືບັນພະບູລຸດ 63,50% ສ່ວນວຽກງານດ້ານອື່ນໆກໍ່ໄດ້ມີການຈັດຕັ້ງປະຕິບັດ ແລະ ມີຜົນສຳເລັດ. ຈາກນັ້ນ ກອງປະຊຸມໄດ້ຮັບຟັງການປະກອບຄຳເຫັນຈາກພາກສ່ວນຕ່າງໆຕື່ມອີກ.
ກອງປະຊຸມຄັ້ງປະຖົມມະລຶກຂອງຄະນະກຳມະການແນວລາວສ່້າງຊາດແຂວງ ສະໄໝທີ I ໄດ້ເປັນເອກະສັນຮັບຮອງເອົາການສະເໜີແຕ່ງຕັ້ງ ສະຫາຍ ເລັ່ງຊົ່ງ ຕົ່ງສີ ເປັນປະທານແນວລາວສ້າງຊາດແຂວງ ຊຸດໃໝ່, ສະຫາຍ ສີລັດ ພານຸວົງ ເປັນຮອງປະທານ ແລະ ສະຫາຍ ທູນ ເພັດສະໝອນ ເປັນຮອງປະທານ ພ້ອມນີ້ ຍັງໄດ້ແຕ່ງຕັ້ງ ສະຫາຍ ສີລັດ ພານຸວົງ ເປັນປະທານກວດກາ, ສະຫາຍ ເລັ່ງຢ່າງ ເປັນຮອງປະທານກວດກາ ແລະ ສະຫາຍ ວ່າງໄທ ກຳໄຊຮົ່ວ ເປັນຄະນະ, ຮັບຮອງເອົາການສະເໜີແຕ່ງຕັ້ງຄະນະປະຈຳແນວລາວສ້າງຊາດ ຈຳນວນ 5 ສະຫາຍ ແລະ ຄະນະທີ່ປຶກສາແນວລາວສ້າງຊາດ ຈຳນວນ 7 ສະຫາຍ.
ໃນໂອກາດນີ້ ຍັງໄດ້ຮັບຟັງການໂອ້ລົມຂອງ ສະຫາຍ ເຍ່ຍເກີຢ່າ ໝໍຈໍຈົ່ງຕົວ ສະຫາຍ ໄດ້ເນັ້ນໜັກໃຫ້ ຄະນະກຳມະການແນວລາວສ້າງຊາດແຂວງ ຊຸດໃໝ່ ຈົ່ງເອົາໃຈໃສ່ເຕົ້າໂຮມ ແລະ ເສີມຂະຫຍາຍກ້ອນກຳລັງມະຫາສາມັກຄີ ຂອງປະຊາຊົນບັນດາເຜົ່າ, ຊັ້ນຄົນ, ເພດ-ໄວ ເພື່ອເປັນກຳລັງແຮງໃຫ້ແກ່ການປົກປັກຮັກສາ ແລະ ສ້າງສາປະເທດຊາດ ພ້ອມທັງນຳເອົາມະຕິຂອງກອງປະຊຸມຄັ້ງນີ້ ໄປເຜີຍແຜ່ເຊື່ອມຊຶມ ສຶກສາອົບຮົມໃຫ້ພະນັກງານ, ສະມາຊິກພັກ ຕະຫລອດຮອດພໍ່ແມ່ປະຊາຊົນບັນດາເຜົ່າ ໄດ້ຮັບຮູ້ ແລະ ກຳແໜ້ນເນື້ອໃນມະຕິດັ່ງກ່າວ, ປຸກລະດົມຂົນຂວາຍ ເສີມຂະຫຍາຍສິດເປັນເຈົ້າຂອງປະເທດຊາດ ໄປພ້ອມກັບການເສີມຂະຫຍາຍມູນເຊື້ອສາມັກຄີປອງດອງ ເອົາໃຈໃສ່ສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂອງປະຊາຊົນບັນດາເຜົ່າ ໃຫ້ເປັນຂະບວນກວ້າງຂວາງ ແລະ ຟົດຟື້ນກວ່າເກົ່າ.

 
ຂ່າວ: ພຸດທະສອນ ເວດສະວົງ