ພິທີປິດຊຸດອົບຮົມວຽກງານປ້ອງກັນຄວາມປອດໄພຕາມເສັ້ນທາງລົດໄຟ ລາວ-ຈີນ ຊຸດທີ 3 ແລະ ຊຸດທີ 4 ໄດ້ຈັດຂຶ້ນໃນວັນທີ 4 ກັນຍານີ້, ຢູ່ທີ່ສະໂມສອນ ກອງບັນຊາການທະຫານແຂວງຫຼວງພະບາງ ໂດຍການເປັນປະທານຮ່ວມຂອງ ສະຫາຍ ພັນເອກ ຄໍາສຸກ ອິນທະພອນ ຮອງຫົວໜ້າກົມສູ້ຮົບ ກົມໃຫຍ່ເສນາທິການກອງທັບປະຊາຊົນລາວ, ສະຫາຍ ຈ່ຽນສຸ້ຍ ຮອງເລຂາທິການສູນການຮ່ວມມືປະຕິບັດກົດໝາຍແມ່ນໍ້າລ້ານຊ້າງ -ແມ່ນໍ້າຂອງ, ໃຫ້ກຽດເຂົ້າຮ່ວມມີ ສະຫາຍ ພົນຈັດຕະວາ ວິລ່ຽມ ວົງທິສານ ຫົວໜ້າການທະຫານ ກອງບັນຊາການທະຫານແຂວງຫຼວງພະບາງ, ມີຄະນະພັກ-ຄະນະບັນຊາກອງບັນຊາການທະຫານແຂວງ, ພະນັກງານຄູ-ອານຈານ ທີ່ມາຈາກ ສປ ຈີນ ແລະ ນັກເຝິກອົບຮົມເຂົ້າຮ່ວມ.
ສະຫາຍ ພັນເອກ ຄໍາສິງ ວົງຫຸມຄໍາ ຫົວໜ້າພະແນກສູນບັນຊາກົມສູ້ຮົບ ກົມໃຫຍ່ເສນາທິການ ໄດ້ຜ່ານບົດສະຫຼຸບຕີລາຄາໝາກຜົນຂອງການເຝິກອົບຮົມວຽກງານປ້ອງກັນຄວາມປອດໄພຕາມເສັ້ນທາງລົດໄຟ ລາວ-ຈີນ ເຫັນວ່າຕະຫລອດໄລຍະການເຝິກອົບຮົມ ແມ່ນໄດ້ຮັບການຊີ້ນໍາໂດຍກົງຈາກກະຊວງ ປ້ອງກັນປະເທດ ແລະ ຄະນະຊີ້ນໍາປ້ອງກັນທາງລົດໄຟ ລາວ-ຈີນ ຢ່າງເປັນປົກກະຕິ, ບັນດາພະນັກງານ, ຄູ-ອາຈານ ມີຄວາມຈິງໃຈຖ່າຍທອດຄວາມຮູ້ທາງດ້ານເນື້ອໃນ ແລະ ພາກປະຕິບັດຕົວຈິງໃນພາກສະໜາມໃຫ້ແກ່ນັກເຝິກອົບຮົມຢ່າງທົ່ວເຖິງ, ບັນດານັກເຝິກອົບຮົມໄດ້ເປັນເຈົ້າການໃນການປະຕິບັດຂໍ້ກໍານົດ, ກົດລະບຽບຂອງກອງທັບ ກໍຄືລະບຽບຂອງການສິດສອນ ຂຶ້ນຫ້ອງ -ລົງຫ້ອງ, ຮັບຟັງການສິດສອນ ຂອງຄູ-ອາຈານ, ກ້າຖາມ-ຕອບ ແລະ ມີການສົນທະນາແລກປ່ຽນບົດຮຽນຢ່າງຟົດຟື້ນເຮັດໃຫ້ການເຝິກອົບຮົມໃນຄັ້ງນີ້ບັນລຸຕາມຄາດໝາຍທີ່ວາງໄວ້.
ການເຝິກອົບຮົມແມ່ນໄດ້ເລີ່ມແຕ່ວັນທີ 19 ສິງຫາ 2024, ມີພະນັກງານ-ນັກຮົບເຂົ້າຮ່ວມເຝິກອົບຮົມທັງໝົດ 200 ສະຫາຍ ໃນນັ້ນ, ໄດ້ແບ່ງເປັນ 2 ໄລຍະຄື: ໄລຍະທີ 1 ເລີ່ມເຝິກອົບຮົມແຕ່ວັນທີ 19 – 26 ສິງຫາ 2024, ໄລຍະທີ 2 ແຕ່ວັນທີ 27 ສິງຫາ – 3 ກັນຍາ 2024. ທັງນີ້, ກໍເພື່ອແນ່ໃສ່ຮັບປະກັນໃນການເຄື່ອນໄຫວເຮັດສໍາເລັດໜ້າທີ່ການເມືອງໃນສະເພາະໜ້າ ແລະ ຍາວນານ, ຮັບປະກັນເຮັດໃຫ້ຂອບເຂດຮັບຜິດຊອບມີຄວາມເປັນລະບຽບຮຽບຮ້ອຍ ແລະ ສະຫງົບປອດໄພ 100%. ໂອກາດດຽວກັນນີ້, ກໍ່ໄດ້ຈັດຕັ້ງມອບໃບຢັ້ງຢືນໃຫ້ບັນດານັກເຝິກອົບຮົມ ໂດຍແມ່ນ ສະຫາຍ ຈ່ຽນສຸ້ຍ ເປັນຜູ້ຂຶ້ນມອບ. ຂ່າວ: ບຸນເພັງ ວົງແກ້ວມະນີ, ພາບ: ທອງລິດ ແກ້ວທູມມາ.
ທີ່ມາ: ໜັງສືພິມກອງທັບ
