ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນນະຄອນຫລວງວຽງຈັນ (ສປນວ) ຊຸດທີ II ໄດ້ປິດລົງດ້ວຍຜົນສຳເລັດອັນຈົບງາມ ພາຍຫລັງດຳເນີນມາແຕ່ວັນທີ 8-12 ກໍລະກົດ 2024 ໃຫ້ກຽດເຂົ້າຮ່ວມມີ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ມີເຈົ້າຄອງ, ຮອງເຈົ້າ ນະຄອນຫລວງວຽງຈັນ (ນວ), ພ້ອມດ້ວຍບັນດາສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1 ນະຄອນຫລວງວຽງຈັນ, ສະມາຊິກສະພາປະຊາຊົນ ນະຄອນຫລວງວຽງຈັນ, ການນໍາພັກ-ລັດ ຂັ້ນນະຄອນຫລວງ ແລະ ແຂກຖືກເຊີນ ເຂົ້າຮ່ວມ.
ໂອກາດດັ່ງກ່າວ, ທ່ານ ອານຸພາບ ຕຸນາລົມ ປະທານສະພາປະຊາຊົນ ນະຄອນຫລວງວຽງຈັນ ໄດ້ກ່າວປິດກອງປະຊຸມ ວ່າ: ການດໍາເນີນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນ ນະຄອນຫລວງວຽງຈັນ ຊຸດທີ II ໄດ້ຄົ້ນຄວ້າພິຈາລະນາ, ປະກອບຄໍາເຫັນ, ຕັ້ງຄໍາຊັກຖາມ ແລະ ຄໍາສະເໜີ, ແນະນໍາວິທີການແກ້ໄຂບັນຫາຂໍ້ຄົງຄ້າງຢ່າງມີປະຊາທິປະໄຕ, ມີເຫດມີຜົນ, ເຈາະຈົງ ເຂົ້າແຕ່ລະບັນຫາຢ່າງລະອຽດຖີ່ຖ້ວນ ແລະ ມີຄວາມເປັນເອກະພາບສູງ ຂອງບັນດາສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1 ແລະ ສະມາຊິກສະພາປະຊາຊົນ ນະຄອນຫລວງວຽງຈັນ ໃນຖານະເປັນຕົວແທນ ຂອງປະຊາຊົນຊາວນະຄອນຫລວງ ເພື່ອຄົ້ນຄວ້າ, ພິຈາລະນາ ແລະ ໄດ້ຮັບຮອງເອົາບັນຫາສໍາຄັນ ຂອງ ນວ ໃນຫລາຍບັນຫາສຳຄັນ ເປັນຕົ້ນ ຮັບຮອງເອົາບົດລາຍງານຂອງອົງການປົກຄອງ ນວ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຂອງນະຄອນຫລວງ, ຕິດພັນກັບການກະກຽມຄວາມພ້ອມ ໃນການເປັນເຈົ້າພາບການດໍາເນີນກອງປະຊຸມອາຊຽນ ຂອງ ນວ; ຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດ ບັນດາຄາດໝາຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ຢູ່ ນວ.
ກອງປະຊຸມ ໄດ້ຮັບຟັງການລາຍງານ ບາງບັນຫາສໍາຄັນພື້ນຖານ ເປັນຕົ້ນ ຮັບຟັງລາຍງານການຈັດຕັ້ງປະຕິບັດ ແລະ ການຊົດເຊີຍໂຄງການກໍ່ສ້າງສາຍສົ່ງໄຟຟ້າແຮງສູງ 230 ກິໂລໂວນ ແຕ່ສະຖານີເພຍລາດ-ສະຖານີໄຟຟ້າ ນາຊາຍທອງ ນວ; ຮັບຟັງການລາຍງານ ກ່ຽວກັບມາດຕະການໃນການຈັດຕັ້ງປະຕິບັດວຽກງານ ສ ສະຫວ່າງ; ຮັບຟັງການລາຍງານກ່ຽວກັບຄວາມຄືບໜ້າ ໃນການຈັດຕັ້ງປະຕິບັດໂຄງການປັບປຸງ ແລະ ສ້ອມແປງເສັ້ນທາງຫລວງແຫ່ງຊາດ ເລກທີ 13 ເໜືອ ຊ່ວງສາມແຍກສີໄຄ-ສີເກີດ; ຮັບຟັງການລາຍງານ ກ່ຽວກັບມາດຕະການຕ້ານ ແລະ ແກ້ໄຂບັນຫານໍ້າຖ້ວມຂັງ ໃນ ນວ; ຮັບຟັງການລາຍງານ ກ່ຽວກັບການດໍາເນີນການຈັດຕັ້ງປະຕິບັດການຜັນຂະຫຍາຍ ແລະ ຊຸກຍູ້ ສົ່ງເສີມການທ່ອງທ່ຽວ ຢູ່ ນວ; ຮັບຟັງການລາຍງານ ກ່ຽວກັບການຈັດຕັ້ງປະຕິບັດການຊົດເຊີຍໃຫ້ປະຊາຊົນ ທີ່ຖືກຜົນກະທົບ ຈາກໂຄງການພັດທະນາເນື້ອ ທີ່ດິນ 51,1 ເຮັກຕາ ຂອງໂຄງການທ່າບົກ-ທ່ານາແລ້ງ ແລະ ເຂດໂລຈິສຕິກ; ຮັບຟັງການລາຍງານ ກ່ຽວກັບມາດຕະການຊຸກຍູ້ສົ່ງເສີມ ການຜະລິດເປັນສິນຄ້າ ໃຫ້ສາມາດຕອບສະໜອງສະບຽງອາຫານ ແລະ ສະກັດກັ້ນການນໍາເຂົ້າສິນຄ້າ ຈາກພາຍນອກ; ຮັບຟັງການລາຍງານ ກ່ຽວກັບຄວາມຄືບໜ້າ ໃນການຈັດຕັ້ງປະຕິບັດການລົບລ້າງໃບຕາດິນ 16 ຕອນ ທີ່ນອນໃນເຂດໂຄງການພັດທະນາ ສໍາປະທານບຶງສາລາຄໍາ ຂອງບໍລິສັດມິດຕະພາບພັດທະນາການກະເສດຈໍາກັດ ຢູ່ເມືອງຫາດຊາຍຟອງ; ຮັບຟັງການລາຍງານ ການເກັບກໍາຂໍ້ມູນການບຸກລຸກຈັບຈອງ ແລະ ອອກໃບຕາດິນ ຢູ່ເຂດປ່າ ສະຫງວນແຫ່ງຊາດພູພະນັງ ແລະ ຮັບຟັງການລາຍງານ ກ່ຽວກັບວຽກງານທີ່ຕິດພັນກັບກອງບັນຊາການປ້ອງກັນຄວາມສະຫງົບ ນວ.
ພ້ອມນີ້, ຍັງໄດ້ ຮັບຮອງເອົາ ຮ່າງຂໍ້ຕົກລົງວ່າດ້ວຍ ການຮັບຮອງເອົາລາຄາຫົວໜ່ວຍທົດແທນ ຕໍ່ຊັບສິນທີ່ໄດ້ ຮັບຜົນກະທົບຈາກໂຄງການປັບປຸງ ແລະ ສ້ອມແປງເສັ້ນທາງຫລວງແຫ່ງຊາດ ເລກທີ 13 ໃຕ້; ຮັບຮອງເອົາ ບົດລາຍງານ ການຈັດຕັ້ງປະຕິບັດ ມະຕິກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ນວ ຊຸດທີ II ວ່າດ້ວຍການຮັບຮອງ ເອົາບົດລາຍງານການເຄື່ອນໄຫວວຽກງານປີ 2023 ແລະ ແຜນການຈຸດສຸມປີ 2024 ຂອງອົງການໄອຍະການປະຊາຊົນ ແລະ ສານປະຊາຊົນ ພາກກາງ, ອົງການໄອຍະການປະຊາຊົນ ແລະ ສານປະຊາຊົນ ນະຄອນຫລວງວຽງຈັນ ສະບັບເລກທີ 005/ສປນວ, ລົງວັນທີ 10 ມັງກອນ 2024 ໃນໄລຍະ 6 ເດືອນຕົ້ນປີ 2024; ຮັບຟັງການລາຍງານ ກ່ຽວກັບການຈັດຕັ້ງປະຕິບັດຄໍາຕັດສິນຂອງສານ ໄລຍະ 6 ເດືອນຕົ້ນປີ 2024 ແລະ ການຈັດຕັ້ງປະຕິບັດດໍາລັດ ສະບັບເລກທີ 280/ນຍ, ລົງວັນທີ 09 ສິງຫາ 2022 ວ່າດ້ວຍຊັບສິນທີ່ຖືກຍຶດ, ອາຍັດ ແລະ ຮິບເປັນຂອງລັດ; ຮັບຮອງເອົາບົດລາຍງານການຈັດຕັ້ງປະຕິບັດ ແຜນການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຂອງສະພາປະຊາຊົນ ນວ, ຕິດພັນກັບແຜນການເຄື່ອນໄຫວພົບປະປະຊາຊົນ ແລະ ເຜີຍແຜ່ຜົນສໍາເລັດ ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດ ທີ IX ແລະ ສະພາປະຊາຊົນ ນະຄອນຫລວງວຽງຈັນ ຊຸດທີ II.
ນອກຈາກນີ້, ກອງປະຊຸມຍັງໄດ້ຮັບຟັງການຊີ້ແຈງ ບາງບັນຫາສໍາຄັນຈໍານວນໜຶ່ງທີ່ພົວພັນກັບສະພາບພົ້ນເດັ່ນຂອງສັງຄົມ ແລະ ຕິດພັນກັບຊີວິດການເປັນຢູ່ຂອງປະຊາຊົນ ເຊິ່ງຜູ້ແທນໄດ້ຊັກຖາມ ແລະ ຍົກຂຶ້ນໃນກອງປະຊຸມ ຈາກອົງການປົກຄອງ, ສານປະຊາຊົນ, ອົງການໄອຍະການປະຊາຊົນ ແລະ ພາກສ່ວນທີ່ກ່ຽວຂ້ອງ. ຕໍ່ບັນຫາທີ່ໄດ້ມີການລາຍງານ ແລະ ຊີ້ແຈງ ທີ່ກ່າວມານັ້ນ, ກອງປະຊຸມໄດ້ມອບໃຫ້ອົງການປົກຄອງນະຄອນຫລວງວຽງຈັນ, ພະແນກການ, ສານປະຊາຊົນ, ອົງການໄອຍະການປະຊາຊົນ ແລະ ພາກສ່ວນທີ່ກ່ຽວຂ້ອງເອົາໃຈໃສ່ຈັດຕັ້ງປະຕິບັດບັນດາເນື້ອໃນ, ວິທີການ, ມາດຕະການໃນການຈັດຕັ້ງປະຕິບັດ ແລະ ແກ້ໄຂບາງບັນຫາບັນຫາຕ່າງໆທີ່ໄດ້ລາຍງານ, ຊີ້ແຈງແຕ່ລະຫົວຂໍ້ ແລະ ໃຫ້ຄໍາໝັ້ນສັນຍາ ໃນກອງປະຊຸມຄັ້ງນີ້ ໃຫ້ມີປະສິດທິຜົນ ແລະ ມີຜົນສັກສິດ, ພ້ອມທັງມີການລາຍງານຄືນໃຫ້ສະພາປະຊາຊົນ ນວ ເປັນລາຍລັກອັກສອນ ເພື່ອສະພາປະຊາຊົນ ກໍຄື ສະມາຊິກສະພາປະຊາຊົນ ຈະສືບຕໍ່ຕິດຕາມກວດກາ ຢ່າງໃກ້ສິດຕື່ມອີກ.
ຜົນສໍາເລັດ ກອງປະຊຸມ ໃນຄັ້ງນີ້, ແມ່ນໝາກຜົນຂອງການລວມສູນສະຕິປັນຍາ, ການຍົກສູງຄວາມຮັບຜິດຊອບທາງດ້ານການເມືອງ, ຄວາມເປັນເຈົ້າການ ຂອງບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1 ແລະ ສະມາຊິກສະພາປະຊາຊົນ ນະຄອນຫລວງວຽງຈັນ ໃນການຄົ້ນຄວ້າ, ພິຈາລະນາ ແລະ ຮັບຮອງເອົາບັນຫາສໍາຄັນ ພື້ນຖານຂອງ ນວ, ແມ່ນການຕັດສິນໃຈສູງຂອງອົງການປົກຄອງ, ບັນດາພະແນກການ, ອົງການທີ່ກ່ຽວຂ້ອງໃນການສືບຕໍ່ຈັດຕັ້ງປະຕິບັດແຜນການທີ່ແຕ່ລະອົງການໄດ້ຮັບຜິດຊອບ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ ນວ ພວມຜະເຊີນຢູ່ໃນປັດຈຸບັນ ເພື່ອສືບຕໍ່ຈັດຕັ້ງ ບັນດາແຜນກການ ແລະ ຄາດໝາຍຂອງແຜນການປີ 2024 ໃຫ້ບັນລຸຜົນ.
ໂອກາດນີ້, ທ່ານ ອານຸພາບ ຕຸນາລົມ ຍັງໄດ້ໄດ້ຮຽກຮ້ອງມາຍັງ ຄະນະປະຈໍາສະພາປະຊາຊົນ, ບັນດາຄະນະກໍາມະການ, ຄະນະເລຂາທິການ, ອົງການປົກຄອງ, ສານປະຊາຊົນ, ອົງການໄອຍະການປະຊາຊົນ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 1, ສະມາຊິກສະພາປະຊາຊົນ ນວ ແລະ ພາກສ່ວນທີ່ກ່ຽວຂ້ອງ ໃຫ້ພ້ອມກັນ ຜັນຂະຫຍາຍບັນດາມະຕິກອງປະຊຸມຄັ້ງນີ້ ທີ່ໄດ້ຮັບຮອງເຂົ້າໃນການປະຕິບັດວຽກ ໃນຂອບເຂດຄວາມຮັບຜິດຊອບຂອງຕົນ ໃຫ້ໄດ້ຮັບຜົນສໍາເລັດເປັນຢ່າງດີ.
ຂ່າວ: ທະນູທອງ
ພາບ: ເກດສະໜາ
ຂປລ
