ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ຮ່ວມກັບ ສະຖານທູດ ຣັດເຊຍ ປະຈຳລາວ ແລະ ສູນວິທະຍາສາດ ແລະ ວັດທະນະທຳ ຣັດເຊຍ ປະຈຳລາວ ຈັດການສະແດງດົນຕຣີ ຈາກນັກ ສິນລະປີນທີ່ມີຊື່ສຽງ ນະຄອນຊານປີເຕີສະເບີກ ແຫ່ງສະຫະພັນ ຣັດເຊຍ ທີ່ຫໍວັດທະນະທຳແຫ່ງຊາດ ນະຄອນຫຼວງວຽງຈັນ ໃນຄ່ຳຄືນວັນທີ 22 ພຶດສະພາ 2024 ໂດຍມີທ່ານ ນາງ ສວນສະຫວັນ ວິຍະເກດ, ລັດຖະມົນຕີກະຊວງ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ, ທ່ານ ວະລາດີມີຣ ອານນາຕໍແຢບວິສ ກາລີນິນ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງສະຫະພັນຣັດເຊຍ ປະຈຳລາວ, ພ້ອມດາບັນດາການນໍາພັກ-ລັດ, ພ້ອມດ້ວຍແຂກຖືກເຊີນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ໃນໂອກາດນີ້ ທ່ານ ທ່ານ ອາເລັກຊານເດິ ວາຊີແຢບວິສ ຣາຊະກົບ ກ່າວວ່າ: ຄ່ຳຄືນນີ້ມີຄວາມໝາຍສໍາຄັນຍິ່ງໃນຂົງເຂດວຽກງານວັດທະນະທໍາຂອງລາວ-ຣັດເຊຍ ໄດ້ມີການສະແດງສີລະປະຂອງເຮືອນດົນຕຣີແຫ່ງເມຶອງຊານ-ປິເຕີສະເບີກ ເຊິ່ງບໍ່ພຽງແຕ່ມີຊື່ສຽງໃນປະເທດຣັດເຊຍເທົ່ານັ້ນ ແຕ່ຍັງມີຊື່ສຽງໄປທົ່ວໂລກ. ງານຄັ້ງນີ້ມີການສະແດງທີ່ເປັນຜົນງານຂອງນັກແຕ່ງດົນຕຣີທີ່ມີຊື່ສຽງຈາກຣັດເຊຍ ແລະ ລາວ ເພື່ອເສີມສ້າງການຮ່ວມມືສາຍສຳພັນມິດຕະພາບ ລະຫວ່າງສອງປະເທດ ລາວ-ຣັດເຊຍ ທີ່ມີມາແຕ່ດົນນານ ໃຫ້ນັບມື້ເພີ່ມ ພູນຄູນສ້າງ ພັດທະນາຢ່າງຕໍ່ເນື່ອງ.
ໄປພ້ອມກັນນີ້ ໃນປີຜ່ານມາ ພາສາຣັດເຊຍ ໄດ້ກັບຄືນສູ່ລະບົບການສຶກສາ ຂອງໂຮງຮຽນໃນປະເທດລາວເປັນຄັ້ງທຳອິດ ພາຍຫຼັງຫ່າງໄປຫຼາຍປີ ປັດຈຸບັນ ພາສາຣັດເຊຍມີການສິດສອນໃນໂຮງຮຽນມັດທະຍົມສຶກສາຢູ່ 2 ແຫ່ງ ໃນນະຄອນຫຼວງວຽງຈັນ ແລະ ເຊື່ອໝັ້ນວ່າຈຳນວນໂຮງຮຽນທີ່ສອນພາສາຣັດເຊຍ ຈະເພີ່ມຂຶ້ນໃນແຕ່ລະປີ ບໍ່ພຽງແຕ່ຢູ່ໃນນະຄອນຫຼວງເທົ່ານັ້ນ ແຕ່ຍັງຈະສືບຕໍ່ຂະຫຍາຍອອກໄປ ໃນຂອບເຂດທົ່ວປະເທດ ການພົວພັນດ້ານວັດທະນະທຳ ລະຫວ່າງສອງປະເທດໄດ້ຮັບການພັດທະນາຢ່າງຕັ້ງໜ້າ.
ສ່ວນ ທ່ານ ນາງ ບົວໄຂ ເພັງພະຈັນ ຫົວໜ້າກົມສິລະປະ-ວັດທະນະທຳ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ມີຄໍາເຫັນວ່າ: ສປປ ລາວ ແລະ ສະຫະພັນຣັດເຊຍ ມີສາຍພົວພັນທາງການທູດ ແລະ ການຮ່ວມມືຂອງສອງປະເທດມາແຕ່ດົນນານແລ້ວ ແລະ ຍາມໃດທັງສອງປະເທດກໍພ້ອມກັນຍົກສູງພາລະບົດບາດ ແລະ ໃຫ້ຄວາມສໍາຄັນຕໍ່ວຽກງານວັດທະນະທໍາ ໂດຍສະເພາະວຽກງານສິລະປະການສະແດງ ຊຶ່ງເປັນວຽກງານທີ່ເຜີຍແຜ່ມູນເຊື້ອສິລະປະວັດທະນະທຳ, ຮີດຄອງປະເພນີອັນດີງາມຂອງຊາດ ຂອງເຜົ່າ, ນໍາເອົາຜະລິດຕະພັນດ້ານສິລະປະການສະແດງ, ຜົນງານໃນພາລະກິດປົກປັກຮັກສາ ແລະ ພັດທະນາປະເທດຊາດອອກສູ່ສັງຄົມ ທັງພາຍໃນ ແລະ ຕ່າງປະເທດຢ່າງກວ້າງຂວາງ.
ການຈັດງານສະແດງດົນຕຣີໃນຄັ້ງນີ້ ມີຄວາມໝາຍຄວາມສຳຄັນຢ່າງຍິ່ງ ເພາະເປັນການສະແດງໃຫ້ເຫັນເຖິງການເພີ່ມທະວີການແລກປ່ຽນ ແລະ ການຮ່ວມມືທາງດ້ານສິລະປະ-ວັດທະນະທຳ ຂອງສອງປະເທດ ລາວ-ຣັດເຊຍ ຣັດເຊຍ-ລາວ ໃຫ້ນັບມື້ນັບເຕີບໃຫຍ່ຂະຫຍາຍຕົວ ຢ່າງບໍ່ຢຸດຢັ້ງ ເຊິ່ງໃນພິທີ ຜູ້ເຂົ້າຮ່ວມໄດ້ຮັບຊົມການສະແດງສິລະປະຫລາຍລາຍການຈາກຣັດເຊຍ ຢ່າງເບິກບານມ່ວນຊື່ນ ແລະ ຮູ້ໄດ້ເຖິງວັດທະນະທໍາອັນດີງາມຂອງຣັດເຊຍ.