ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເມື່ອບໍ່ດົນມານີ້, ໄດ້ມີພິທີລົງນາມບົດບັນທຶກຄວາມເຂົ້າໃຈ (MOU) ກ່ຽວກັບໂຄງການສຶກສາຄວາມເປັນໄປໄດ້ ໃນການສົ່ງເສີມການຂາຍສິນຄ້າລາວໄປ ສປ ຈີນ ລະຫວ່າງ ຫ້ອງການກະຊວງອຸດສາຫະກໍາ ແລະ ການຄ້າ (ອຄ) ຮ່ວມກັບ ບໍລິສັດ ຊຽງໄຮ ຈືຈືຊາງ ຈໍາກັດ ແລະ ກຸ່ມບໍລິສັດລາວ ກອນສິນ ສາກົນ ຈໍາກັດຜູ້ດຽວ ໂດຍມີທ່ານຮອງລັດຖະມົນຕີກະຊວງອຸດສາຫະກໍາ ແລະ ການຄ້າເຂົ້າຮ່ວມ.
ຈຸດປະສົງໃນການລົງນາມຮ່ວມໃນແຜນການຮ່ວມມືຄັ້ງນີ້ ແມ່ນເພື່ອສົ່ງເສີມການຂາຍສິນຄ້າລາວ ໄປ ສປ ຈີນ ໂດຍສະເພາະປະເພດສິນຄ້າກະສິກໍາ, ກະສິກໍາປຸງແຕ່ງ, ອຸດສາຫະກໍາປຸງແຕ່ງ, ສິນຄ້າຢາພື້ນເມືອງ. ພ້ອມນີ້, ຍັງສົ່ງເສີມດ້ານວິຊາການ ແລະ ການສະໜັບສະໜູນອື່ນໆ ໂດຍລົງເລິກການຮ່ວມມືດ້ານວິຊາການ ເປັນຕົ້ນ ການສ້າງແຜນກິດຈະກໍາ, ພັດທະນາເຕັກນິກວິຊາການ, ແຜນພັດທະນາຄຸນນະພາບຂອງສິນຄ້າລາວ ໃຫ້ໄດ້ມາດຕະຖານ ແລະ ສາມາດສົ່ງອອກສິນຄ້າລາວໄປຂາຍ ຢູ່ ສປ ຈີນ ເພື່ອກ້າວເຂົ້າສູ່ການຮ່ວມມືສ້າງຕັ້ງບໍລິສັດຫຸ້ນສ່ວນ, ພ້ອມທັງຮ່ວມມືສ້າງຕັ້ງຫ້ອງການ ແລະ ສາງກະຈາຍສິນຄ້າ ຢູ່ ສປປ ລາວ ແລະຮ່ວມມືດ້ານວິຊາການ ຮ່ວມກັບ ກົມສົ່ງເສີມການຄ້າ ແລະ ຫັດຖະກໍາ, ກະຊວງອຸດສາຫະກໍາ ແລະ ການຄ້າ.
ທີ່ມາ: ຂປລ