ວັນທີ 27 ພຶດສະພາ 2024 ຜ່ານມາ, ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ຫ້ອງຕໍາຫຼວດ ກອງບັນຊາການ ປກສ ແຂວງໄຊຍະບູລີ ໄດ້ສຶກສາອົບຮົມກຸ່ມມົ້ວສຸມດື່ມນໍ້າກະທ້ອມ ຈຳນວນ 8 ຄົນ, ໂດຍມີ ທ່ານ ພັຕ ຄໍາຄ່ຽນ ສຸ ພາດາ ຮອງຫົວໜ້າພະແນກ ຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງໄຊຍະບູລີ, ມີເຈົ້າໜ້າທີ່ວິຊາສະເພາະ, ຜູ້ອໍານວຍການໂຮງຮຽນ, ນາຍບ້ານ ພ້ອມດ້ວຍຜູ້ປົກຄອງ ແລະ ຜູ້ຖືກສຶກສາອົບຮົມ ເຂົ້າຮ່ວມ.
ພັຕ ຄໍາຄ່ຽນ ສຸພາດາ ໄດ້ໃຫ້ຄວາມຮູ້ກ່ຽວກັບ ແຈ້ງການຂອງລັດຖະມົນຕີກະຊວງປ້ອງກັນຄວາມສະຫງົບ ເລກທີ 13/ປກສ, ລົງວັນທີ 14 ກັນຍາ 2022 ເລື່ອງການເພີ່ມທະວີການຄວບຄຸມ ແລະ ສະກັດກັ້ນ ການປູກ, ຜະລິດ, ປຸງແຕ່ງ, ຊົມໃຊ້, ຄ້າຂາຍ, ຈໍາໜ່າຍ, ຂົນສົ່ງ, ມີໄວ້ຄອບຄອງ, ນໍາໃຊ້, ສົ່ງອອກ ພືດທີ່ມີສານເສບຕິດ ຫຼື ຜະລິດຕະພັນທີ່ມີສ່ວນປະສົມສານຕັ້ງຕົນ ແລະ ສານເສບຕິດປະເພດຕ່າງໆ ໂດຍບໍ່ຖຶກຕ້ອງຕາມກົດໝາຍ; ທັງນີ້, ກໍເພື່ອເຮັດໃຫ້ກຸ່ມເປົ້າໝາຍມົ້ວສຸມຢາເສບຕິດ (ປະເພດ ນໍ້າກະທ້ອມ) ໄດ້ຮັບຮູ້ ແລະ ເຂົ້າໃຈແຈ້ງຕໍ່ລະບຽບຂອງກໍາລັງປ້ອງກັນຄວາມສະຫງົບ, ຈຳແນກໄດ້ສິ່ງທີ່ຜິດ ແລະ ຖືກ, ຮັບຮູ້ໄດ້ເຖິງແນວທາງນະໂຍບາຍຂອງພັກ-ລັດ, ຜົນຮ້າຍ ແລະ ໄພອັນຕະລາຍຂອງນໍ້າກະທ້ອມຕໍ່ຜູ້ດື່ມ ລ້ວນແລ້ວເປັນໄພຮຸກຮານຕໍ່ສັງຄົມ ແລະ ປະເທດຊາດບ້ານເມືອງ, ພ້ອມອະທິບາຍຜົນຮ້າຍຂອງສານຕິດແຕ່ລະປະເພດ ໃຫ້ເຂົາເຈົ້າໄດ້ຮັບຮູ້ ແລະ ເຂົ້າໃຈ ຕໍ່ໄພ ອັນຕະລາຍຂອງສານເສບຕິດປະເພດຕ່າງໆ.
ຈາກນັ້ນ, ກໍໄດ້ເຮັດບົດບັນທຶກສຶກສາອົບຮົມ-ກ່າວເຕືອນ ແລະ ມອບໃຫ້ພໍ່ແມ່ຜູ້ປົກຄອງ ນໍາໄປສຶກສາອົບຮົມ ແລະ ຕິດຕາມລຸກຫຼາຍຂອງຕົນຢ່າງໃກ້ຊິດ ບໍ່ໃຫ້ຕົກເປັນທາດຂອງຢາເສຍຕິດ ກໍຄືສິ່ງທີ່ຜິດຕໍ່ລະບຽບກົດໝາຍ ເພື່ອເຮັດໃຫ້ເຂົາເຈົ້າກາຍເປັນຄົນດີໃນສັງຄົມ, ຮູ້ສໍານຶກຜິດ ແລະ ບໍ່ໃຫ້ກັບມາດື່ມນໍ້າກະທ້ອມຕື່ມອີກ
ທີ່ມາ: ປກສ ແຂວງໄຊຍະບູລີ
