ວັນທີ 20 ກັນຍາ 2024 ນີ້, ບໍລິສັດ ສົມບູນການຄ້າຮ່ວມ ກັບ ບໍລິສັດແປ້ງນົວກາຈອງ (ປະເທດໄທ) ແລະ ບໍລິສັດນໍ້າຕານ ສະຫວັນນະເຂດ 1,2 ຕື້ກີບ, ກຸ່ມບໍລິສັດ ຄຳໄພຊະນະ 500 ລ້ານກີບ ແລະ ບໍລິສັດຊີໂນອາກີໂປຕາດ 1,5 ຕື້ກີບ. ລວມເປັນເງິນທັງໝົດ 3.200.000.000 ຕື້ກີບ. ຮັບໂດຍ ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີ ການສັງຄົມ, ຮອງປະທານຄະນະກຳມະການຄຸ້ມຄອງໄພພິບັດຂັ້ນສູນກາງ.
ເປັນກຽດເຂົ້າຮ່ວມໂດຍ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນ ປະເທດ, ປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ, ພ້ອມດ້ວຍຄະນະ ການມອບເງິນໃນຄັ້ງນີ້ເພື່ອປະກອບສ່ວນເຂົ້າໃນກອງທຶນຄຸ້ມຄອງໄພພິບັດ.
ໂອກາດນີ້, ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກ ລັດຖະມົນຕີ ໄດ້ສະແດງຂອບໃຈຕໍ່ ບັນດາບໍລິສັດ ພ້ອມດ້ວຍຄະນະ ທີ່ໄດ້ນໍາເອົາວັດຖຸປັດໃຈມາມອບເຂົ້າກອງທຶນຄຸ້ມຄອງໄພພິບັດຂັ້ນສູນກາງໃນຄັ້ງນີ້, ພ້ອມທັງໃຫ້ຄໍາໝັ້ນສັນຍາວ່າ ຈະນໍາເອົາເງິນຈໍານວນດັ່ງກ່າວ ໄປໝູນໃຊ້ເຂົ້າໃນວຽກງານຊ່ວຍເຫຼືອຜູ້ປະສົບໄພນໍ້າຖ້ວມຢູ່ບັນດາແຂວງທົ່ວປະເທດໃຫ້ເກີດປະໂຫຍດສູງສຸດ.
