ສື່ມວນຊົນຈາກປະເທດ ໜຶ່ງແລວ ໜຶ່ງເສັ້ນທາງ ໄດ້ຮັບການຍົກລະດັບທີ່ແຂວງເຈົ້າຈຽງ, ສປ ຈີນ

ສື່ມວນຊົນຫາລາຍກວ່າ 40 ຄົນ ຈາກ 11 ປະເທດ ຫນຶ່ງແລວ ຫນຶ່ງເສັ້ນທາງ ( BRI) ໃນນັ້ນຈາກ ສປປ ລາວ ຈໍານວນ 9 ຄົນ ຈາກ 6 ພາກສ່ວນ ຄື: ໂຄສະນາອົບຮົມສູນກາງພັກ, ກົມສື່ມວນຊົນ, ວິທະຍຸກະຈາຍສຽງແຫ່ງຊາດລາວ,ສຳນັກຂ່າວສານປະເທດລາວ, ໂທລະພາບແຫ່ງຊາດ ແລະ ໜັງສືພິມປະຊາຊົນ ໄດ້ສຳເລັດການເຂົ້າຮ່ວມສຳມະນາກ່ຽວກັບອົງການຈັດຕັ້ງຂ່າວ ແລະ ອົງການສື່ມວນຊົນ ສຳລັບບັນດາປະເທດ ໜຶ່ງແລວ ໜຶ່ງເສັ້ນທາງ ຢູ່ທີ່ມະຫາໄລສ້າງຄູ ແຂວງ ເຈີ້ຈຽງ, ສປ ຈີນ ຈັດຂຶ້ນໃນລະຫວ່າງວັນທີ 18 ກໍລະກົດ ຫາ ວັນທີ 31 ສິງຫາ 2024

ໂຄງການດັ່ງກ່າວ, ຈັດຂຶ້ນໂດຍມະຫາວິທະຍາໄລສ້າງຄູ ເຈີ້ຈຽງ ໂດຍໄດ້ຮັບການສະໜັບສະໜູນຈາກກະຊວງການຄ້າ ສປ ຈີນ. ຈຸດປະສົງ ເພື່ອແລກປ່ຽນການຮ່ວມມືດ້ານສື່ມວນຊົນ ລະຫວ່າງ ສປ ຈີນ ກັບ ບັນດາປະເທດ ໜຶ່ງແລວ ໜຶ່ງເສັ້ນທາງ. ເຊິ່ງຜ່ານ ການຝຶກອົບຮົມເປັນເວລາ ສອງອາທິດ, ນັກສຳມະນາກອນໄດ້ຮຽນຮູ້ກ່ຽວກັບການພັດທະນາສື່ມວນຊົນຂອງຈີນຢ່າງຮອບດ້ານໃນໄລຍະປະຫວັດສາດທີ່ແຕກຕ່າງກັນ, ໄດ້ຍົກໃຫ້ເຫັນຍຸດທະສາດທີ່ມີປະສິດທິຜົນທີ່ສື່ມວນຊົນຈີນໃຊ້ໃນການເລົ່າ ເລື່ອງຂອງປະເທດຊາດແລະ ເສີມຂະຫຍາຍພາບການຮ່ວມມືກັບພາພຶ້ນ ແລະ ສາກົນ.

ພ້ອມທັງໄດ້ແລກປ່ຽນຄວາມຮູ້, ເພີ່ມທະວີຄວາມເຂົ້າໃຈຂອງຜູ້ເຂົ້າຮ່ວມກ່ຽວກັບການເຊື່ອມໂຍງສື່ມວນຊົນທ້ອງຖິ່ນ, ການຄຸ້ມຄອງສື່ມວນຊົນ, ອຸດສາຫະກຳວິດີໂອສັ້ນ, ຂະແໜງຮູບເງົາ ແລະ ການສ້າງຄວາມເຂົ້າໃຈຂອງປະຊາຊົນ ແລະ ຊຸກຍູ້ຄວາມກ້າວໜ້າ ຂອງ ສັງຄົມ. ພ້ອມກັນນັ້ນ, ຍັງໄດ້ຮັບຮູ້ເຖິງຄວາມເປັນມາສື່ມວນຊົນຂອງປະເທດໜຶ່ງແລວ ໜຶ່ງເສັນທາງ ແລະ ໄດ້ຍົກໃຫ້ເຫັນຄວາມສຳຄັນຂອງການຮ່ວມມືດ້ານສື່ມວນ ຊົນລະຫວ່າງ ສປ ຈີນກັບຄູ່ຮ່ວມມື ໜຶ່ງແລວ ໜຶ່ງເສັ້ນທາງ.

ພ້ອມນີ້ຍັງຢ້ຽມຢາມສະຖານທີ່ວັດທະນະທຳທີ່ມີຄວາມໝາຍ ເຊັ່ນ: ບູຮານນະຄະດີ ລຽນຊູ ແລະ ທະເລຊາບ ເຊິ່ງສະຖານທີ່ດັ່ງກ່າວແມ່ນ ເປັນສະຖານທີ່ມໍລະດົກທາງວັດທະນະທຳ ຂອງ ສປ ຈີນ.

ໃນໄລຍະຜ່ານມາມະຫາໄລສ້າງຄູ ແຂວງ ເຈີ້ຈຽງ, ສປ ຈີນ ເຄີຍຈັດໂຄງການດັ່ງກ່າວນີ້ມາແລ້ວຫລາຍຄັ້ງ ແລະ ໃນທ້າຍປີ 2024 ນີ້ ຈະຈັດຂຶ້ນອີກຄັ້ງເພື່ອແນໃສ່ຊຸກຍູ້ສົ່ງເສີມຂໍ້ລິເລີ່ມ ຫນຶ່ງແລວ ຫນຶ່ງເສັ້ນທາງໃຫ້ນັບມື້ກວ້າງຂວາງແລະປະສົບຜົນສໍາເລັດກວ່າເກົ່າ.