ສື່ມວນຊົນລາວ ປະກອບສ່ວນຢ່າງຕັ້ງໜ້າ ເຂົ້າໃນວຽກງານການເມືອງຂອງພັກ ໃນໄລຍະໃໝ່

ສື່ມວນຊົນລາວມີຄວາມບຸກໜ້າບືນຕົວ ດຸໜັ່ນຫ້າວຫັນ ປະກອບສ່ວນຢ່າງຕັ້ງໜ້າຕໍ່ຜົນສໍາເລັດ ບໍ່ວ່າຈະຢູ່ ໃນໄລຍະຕໍ່ສູ້ກູ້ຊາດ ຕ້ານຈັກກະພັດຜູ້ຮຸກຮານ ກໍຄືໃນໄລຍະແຫ່ງການປົກປັກ ຮັກສາ ແລະ ສ້າງສາພັດທະນາປະເທດຊາດ ພ້ອມນີ້, ສື່ມວນຊົນ ຍັງຮັກສາໄດ້ມູນເຊື້ອຄວາມຈົ່ງຮັກພັກດີຕໍ່ພັກ ແລະ ລັດຢ່າງສະ ເໝີຕົ້ນສະເໝີປາຍ ທັງເຮັດໜ້າທີ່ໂຄສະນາແນວທາງນະໂຍບາຍຂອງພັກ, ມະຕິຄໍາສັ່ງກົດໝາຍຂອງລັດ, ຜົນສໍາເລັດໃນການສ້າງສາພັດທະນາປະເທດຊາດ ແນວທາງການຕ່າງປະເທດຂອງພັກໃຫ້ຊາວໂລກໄດ້ຮັບຮູ້ ທັງເຮັດໜ້າທີ່ຕອບໂຕ້ຖ້ອຍທໍານອງພວກຄົນບໍ່ດີ ທີ່ໃສ່ຮ້າຍປ້າຍສີຕໍ່ລະບອບໃໝ່ຂອງພວກເຮົາໄດ້ຢ່າງທັນການ. ນອກຈາກນີ້, ສື່ມວນຊົນລາວ ຍັງໄດ້ມີການພັດທະນາຍົກລະດັບຄວາມສາມາດ ແລະ ອຸປະກອນທີ່ທັນສະໄໝ ເປັນແຕ່ລະບາດກ້າວ ເພື່ອຮອງຮັບກັບໜ້າທີ່ການເມືອງຂອງພັກ ໃນໄລຍະໃໝ່.

ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກ ທັງເປັນຫົວໜ້າບັນນາທິການໃຫຍ່ໜັງສືພິມປະຊາ ຊົນ ໄດ້ກ່າວວ່າ: ເນື່ອງໃນໂອກາດ ວັນສື່ມວນຊົນ-ການພິມຈໍາໜ່າຍ ຄົບຮອບ 74 ປີ ທັງເປັນວັນສ້າງຕັ້ງໜັງສືພິມປະຕິວັດ ສະບັບທໍາອິດທີ່ມີຊື່ວ່າ ລາວອິດສະລະ ກໍຄືໜັງສືພິມປະຊາຊົນ ສຽງຂອງສູນກາງພັກ ໃນປັດຈຸບັນ, ຊຶ່ງໃນໄລຍະຜ່ານມາ, ໜັງສືິພິມປະຊາຊົນ ກໍໄດ້ມີບົດບາດສໍາຄັນ ໃນການໂຄສະນາໜາກຜົນຂອງການປະຕິວັດ, ປຸກລະດົມປະຊາຊົນທຸກຊັ້ນຄົນ ເຂົ້າຮ່ວມຈັດຕັ້ງຜັນຂະຫຍາຍ ແນວທາງນະໂຍບາຍຂອງພັກ ທັງຕອບໂຕ້ຖ້ອຍທໍານອງຂອງພວກປະຕິການຂາຍຊາດ ແລະ ພວກຄົນບໍ່ດີ ຢູ່ພາຍໃນ ແລະ ພາຍນອກ ພ້ອມທັງປຸກລະດົມປະຊາຊົນທຸກຊັ້ນຄົນ ທໍາການຜະລິດ, ສ້າງເສດຖະກິດຄອບຄົວ ເພື່ອໃຫ້ມີຊີວິດການເປັນຢູ່ດີຂຶ້ນ, ໂຄສະນາໃນພາລະກິດການປ່ຽນແປງໃໝ່ຮອບດ້ານຢ່າງມີຫລັກການຂອງພັກ, ເສີມສ້າງຄວາມສາມັກຄີປອງ ດອງທົ່ວປວງຊົນທັງຊາດ, ໂຄສະນາ, ປຸກລະດົມ, ຊຸກຍູ້ການພັດ ທະນາສ້າງສາ ເສດຖະກິດຂອງປະເທດ ຫັນປ່ຽນເສດຖະກິດທຳມະຊາດເປັນເສດຖະກິດສິນຄ້າ, ການສຶກສາອົບຮົມການ ເມືອງ-ແນວຄິດ, ສ້າງທັດສະນະຫລັກໝັ້ນ ແລະ ຄວາມເຊື່ອໝັ້ນຕໍ່ອຸດົມຄະຕິ ແລະ ການນຳພາຂອງພັກ ໃນການຊຸກຍູ້, ປຸກລະດົມທົ່ວປວງຊົນເຮັດໜ້າທີ່ ປ້ອງກັນຊາດ-ປ້ອງກັນຄວາມສະຫງົບ. ນອກຈາກນີ້, ຍັງໄດ້ໂຄສະນາດຶງດູດເອົາການຮ່ວມມື, ການຊ່ວຍເຫລືອ ແລະ ການລົງທຶນຈາກຕ່າງປະເທດ ຕະຫລອດເຖິງການເສີມຂະຫຍາຍປະຊາທິປະໄຕ ແລະ ຕໍ່ສູ້ຕ້ານກັບປະກົດການຫຍໍ້ ທໍ້ຕ່າງໆທີ່ເກີດຂຶ້ນ.

ທ່ານ ວັນໄຊ ຕະວິນຍານ ຍັງໃຫ້ຮູ້ຕື່ມວ່າ: ໃນຕໍ່ໜ້ານີ້, ໜັງສື ພິມປະຊາຊົນ ຈະສືບຕໍ່ປັບປຸງກົນໄກການເຮັດວຽກຂອງແຕ່ລະແນກໃຫ້ເປັນຕ່ອງໂສ້ ທີ່ຮັບປະກັນບໍ່ໃຫ້ເກີດຄວາມຜິດພາດ ເຮັດໃຫ້ມີຄວາມວ່ອງໄວທັນເຫດການຂຶ້ນກວ່າເກົ່າ ພ້ອມທັງເນື້ອໃນຂ່າວ ແລະ ບົດ ໃຫ້ມີເນື້ອໃນອຸດົມສົມບູນ ເລິກເຊິ່ງ ແລະ ຫລາກຫລາຍຂຶ້ນກວ່າເກົ່າ ແນໃສ່ບົດນໍາ, ບົດຄວາມ, ບົດວຽກດີຄົນເດັ່ນ ແລະ ບົດປະເພດອື່ນໆໃຫ້ຫລາຍ. ສຳລັບການນໍາສະເໜີຂ່າວຈະເຮັດໃຫ້ສັ້ນກະທັດຮັດ-ສ້າງເພື່ອນຮ່ວມງານ ໃຫ້ຫລາຍກວ່າເກົ່າ ພ້ອມທັງເລັ່ງໃສ່ປັບປຸງເວັບໄຊ້ໜັງສືພິມປະຊາ ຊົນ ໃຫ້ອອກຂ່າວວ່ອງໄວທັນສະໄໝ, ສູ້ຊົນເອົາໜັງສືພິມລົງສູ່ຮາກຖານ ໃຫ້ກວ້າງຂວາງກວ່າເກົ່າ ເພື່ອພັດທະນາຕົນເອງໃຫ້ມີຄວາມກ້າວໜ້າເຕີບໃຫຍ່ເຂັ້ມແຂງຂຶ້ນເລື້ອຍໆ. ທັງນີ້ກໍເພື່ອເຮັດຫລ້ອນໜ້າທີ່ວຽກງານຂອງຕົນ ໃນການຮັບໃຊ້ໜ້າທີ່ການເມືອງ ທີ່ພັກ ແລະ ລັດມອບໝາຍໃຫ້. ນອກຈາກນີ້, ຈະສືບຕໍ່ເສີມຂະ ຫຍາຍມູນເຊື້ອ ໜັງສືພິມປະຕິວັດ ໃຫ້ກາຍເປັນກະບອກສຽງອັນແຫລມຄົມຂອງພັກ.

ຂ່າວ: ສົມຫວັງ