ໃນລະຫວ່າງວັນທີ 23 – 30 ມິຖຸນາຜ່ານມານີ້ ຄະນະສື່ມວນຊົນຈາກໜັງສືພິມໄຊນ່າ ເດລີ ອາຊຽນ-ຈີນ ຫຼື ASEAN Media Tour 2024 ໄດ້ເຄືອນໄຫວສໍາພາດຕາມແລວເສັ້ນທາງລົດໄຟ ລາວ-ຈີນ. ຄະນະນັກຂ່າວດັ່ງກ່າວ ປະກອບດ້ວຍສຳນັກຂ່າວທີ່ມາຈາກບັນດາປະເທດສະມາຊິກອາຊຽນ ແລະ ຈີນ ເຂົ້າຮ່ວມ.
ເນື່ອງຈາກໃນປີ 2024 ນີ້ ເປັນປີແຫ່ງການແລກປ່ຽນລະຫວ່າງປະຊາຊົນຈີນ ແລະ ອາຊຽນ ແລະ ລາວເຮົາເປັນປະທານໝູນວຽນຂອງອາຊຽນໃນປີນີ້ ດັ່ງນັ້ນ Chinese Mission to ASEAN ແລະ China Daily ຈຶ່ງໄດ້ຮ່ວມກັນຈັດກິດຈະກໍາ ອາຊຽນມີເດຍທົວຂຶ້ນ ເພື່ອລົງສຳພາດ ສຶກສາຮຽນຮູ້ ຕາມແລວເສັ້ນທາງລົດໄຟ ລາວ-ຈີນ ຈຸດປະສົງເພື່ອໃຫ້ຜູ້ເຂົ້າຮ່ວມມີໂອກາດໄດ້ສໍາພັດ ເຖິງຄວາມສໍາເລັດຂອງການຮ່ວມມື ໜຶ່ງແລວໜຶ່ງເສັ້ນທາງ ຫຼື BRI ແລະໄດ້ໄກ້ຊິດຂອງການ ແລກປ່ຽນດ້ານຕ່າງຯລະຫວ່າງຈີນ ແລະ ອາຊຽນ ເຊິ່ງເລີ່ມຕົ້ນຕັ້ງແຕ່ ວັນທີ 23 ຫາ 30 ມິຖຸນາຜ່ານ ມານີ້ ເຊິ່ງນັກຂ່າວຈາກປະເທດສະມາຊິກອາຊຽນ ແລະ ຈີນ ໄດ້ສຳພາດຮອງຜູ້ອໍານວຍການລັດວິສະຫະກິດລົດໄຟຈີນ-ລາວ ກ່ຽວກັບສະພາບການແລ່ນລົດ ການຂົນສົ່ງສິນຄ້າຂ້າມແດນ, ສໍາພາດຮອງລັດຖະມົນຕີກະຊວງ ຖວທ ກ່ຽວກັບຈໍານວນນັກທ່ອງທ່ຽວເພີ່ມຂຶ້ນ ຍ້ອນການມີລົດໄຟລາວ-ຈີນ ຫຼັງຈາກນັ້ນ ໄດ້ເດີນທາງໄປຫຼວງພະບາງ ສໍາພາດປະຊາຊົນ ບ້ານ ບວມອໍ້ ເຊິ່ງເປັນບ້ານທີ່ໄດ້ຮັບຜົນກະທົບຈາກໂຄງການສ້າງທາງລົດໄຟລາວ-ຈີນ ເຊິ່ງເຫັນວ່າປະຊາຊົນມີຊີວິດການເປັນຢູ່ດີຂຶ້ນພາຍຫຼັງທີ່ທາງໂຄງການໄດ້ຍົກຍ້າຍມາຢູ່ສະຖານທີ່ໃໝ່ ແລະ ໄດ້ປຸກເຮືອນໃຫ້ຢູ່ຢ່າງແໜ້ນໜາຖາວອນ ຖະໜົນຫົນທາງເຂົ້າບ້ານກໍ່ສະດວກສະບາຍ.
ຫຼັງຈາກນັ້ນ ຄະນະນັກຂ່າວ ໄດ້ເດີນທາງເຂົ້າໄປປະເທດຈີນ ຜ່ານດ່ານບໍ່ເຕັນບໍ່ຫານ ເພື່ອສຶກສາ ແລະ ສຳພາດກ່ຽວກັບການຂົນສົ່ງສິນຄ້າ ຈຸດປ່ຽນຖ່າຍສິນຄ້າຈາກລາວ ມາຈີນ ນອກຈາກນີ້ ຄະນະ ASEAN Media Tour 2024 ສິບປະເທດສະມາຊິກອາຊຽນຍັງໄດ້ ຮຽນຮູ້ ແລະສໍາພັດກັບວິຖີຊີວິດຂອງ ປະຊາຊົນ ທີ່ອາໄສໃນ ເຂດຊາຍແດນ ລຽບຕາມເສັ້ນທາງລົດໄຟລາວ-ຈີນ ກິ່ງແຂວງ 12 ພັນນາ ແລະຢ້ຽມຊົມສະຖານທີ່ສຳຄັນຕ່າງໆ ໂດຍສະເພາະມະຫາວິທະຍາໄລພູ່ເອີ ທີ່ມີນັກສຶກສາລາວ ໄປສຶກສາຮຽນຮູ້ກ່ຽວກັບການຂັບລົດໄຟ ແລະ ການບໍລິການເທິງລົດໄຟ ໄດ້ສຳພາດນັກວິຊາການດ້ານເຕັກນິກທາງລົດໄຟ ແລະຄະນະ, ຄະນະ ASEAN Media Tour 2024 ໄດ້ເດີນທາງໄປຄຸນມິງ ເຊິ່ງເປັນສະຖານີລົດໄຟປາຍທາງຈາກລາວ ນັກຂ່າວໄດ້ພາດພະນັກງານ ແລະ ເຮັດວຽກຮ່ວມກັບນັກວິຊາການດ້ານເຕັກນິກລົດໄຟ ລົງຢ້ຽມຊົມຕະຫຼາດດອກໄມ້ສົດ ແລະ ສະຖານທີ່ອື່ນໆ ຕື່ມອີກ.
ໂຄງການລົດໄຟລາວ-ຈີນ ເປັນໂຄງການຮ່ວມມື ໜຶ່ງແລວ ໜຶ່ງເສັ້ນທາງ ທີ່ມີຄວາມສຳຄັນຫຼາຍຕໍ່ຈີນ ແລະ ບັນດາປະເທດໃນອາຊຽນ ນັບແຕ່ເປີດແລ່ນລົດມາ ແຕ່ປີ 2021 ເປັນຕົ້ນມາ ການຂົນສົ່ງຜູ້ໂດຍສານ ແລະ ຂົນສົ່ງສິນຄ້ານັບມື້ນັບເພີ່ມຂຶ້ນຢ່າງວ່ອງໄວ ນອກນີ້ ລົດໄຟລາວ-ຈີນ ຍັງປ່ຽນ ລາວ ຈາກປະເທດທີ່ບໍ່ມີທາງອອກສູ່ທະເລ ໃຫ້ກາຍມາເປັນສູນກາງເຊື່ອມໂຍງທາງບົກ ສົ່ງເສີມການເຊື່ອມຕໍ່ໃນພາກພື້ນເປັນຢ່າງດີ ແລະ ກະຕຸ້ນການພັດທະນາເສດຖະກິດ ແລະ ຄວາມຢູ່ດີກິນດີຂອງປະຊາຊົນລາວບັນດາເຜົ່າທີ່ອາໄສລຽບຕາມເສັ້ນທາງລົດໄຟລາວ-ຈີນ.
ຂ່າວ-ພາບ: ໄພມະນີ ທໍາມະວົງສາ
