ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສື່ມວນຊົນຫລາຍກວ່າ 30 ຄົນຈາກ 16 ພາກສ່ວນອ້ອມຂ້າງສູນກາງເຂົ້າຮ່ວມຮັບຟັງການເຜີຍແຜ່ກົດໝາຍ ວ່າດ້ວຍການປະກັນສັງຄົມ ສະບັບປັບປຸງເລກທີ 54/ສພຊ ຈັດຂື້ນຢູ່ເມືອງວັງວຽງ, ແຂວງວຽງຈັນ ໃນວັນທີ 9 ສິງຫາ 2023 ນີ້ ເຊີ່ງຈັດຂຶ້ນໂດຍອົງການປະກັນສັງຄົມແຫ່ງຊາດ, ກະຊວງແຮງງານ ແລະ ສະຫວັດດີການສັງຄົມ ຮ່ວມກັບກະຊວງຖະແຫຼງຂ່າວ, ວັດທະນາທໍາ ແລະ ທ່ອງທ່ຽວ ພາຍໃຕ້ການເປັນປະທານ ໂດຍທ່ານ ນາງ ບົວຫອມ ພົມມະຈັນ, ຮອງຫົວໜ້າອົງການປະກັນສັງຄົມແຫ່ງຊາດ ແລະ ທ່ານ ວັນນະສິນ ສິມມະວົງ, ຮອງຫົວໜ້າກົມສື່ມວນຊົນ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ.
ຈຸດປະສົງການເຜີຍແຜ່ໃນຄັ້ງນີ້ ເພື່ອເຮັດໃຫ້ສື່ມວນຊົນຮັບຮູ້ ແລະ ເຂົ້າໃຈກ່ຽວກັບອົງການປະກັນສັງຄົມແຫ່ງ ຊາດ ກໍຄື ກົດໝາຍ ວ່າດ້ວຍການປະກັນສັງຄົມເລິກເຊີ່ງກວ່າເກົ່າແລ້ວນໍາເອົາເນື້ອໃນດັ່ງກ່າວໄປໂຄສະນາເຜີຍແຜ່ຕໍ່ ແນ່ໃສ່ເຮັດໃຫ້ສັງຄົມໄດ້ຮັບຮູ້ຄວາມສໍາຄັນ ແລະ ຜົນດີຂອງການເຂົ້າຮ່ວມການປະກັນສຸຂະພາບ, ລວມເຖີງຂັ້ນຕອນຕ່າງໆ ຂອງການເຂົ້າຮ່ວມເປັນສະມາຊິກຂອງອົງການປະກັນສັງຄົມແຫ່ງຊາດ ໂດຍສະເພາະການເຂົ້າຮ່ວມເປັນສະມາຊິກແບບສະໝັກໃຈເນື່ອງຈາກຍັງມີໜ້ອຍເມື່ອທຽບໃສ່ຄວາມຮຽກຮ້ອງຕ້ອງການຕົວຈິງ.
ລະບົບປະກັນສັງຄົມ ແມ່ນໜຶ່ງໃນນະໂຍບາຍປົກປ້ອງທາງສັງຄົມ ຕາມແນວທາງນະໂຍບາຍຂອງພັກ ແລະ ລັດ ຖະບານ ໂດຍແມ່ນອົງການປະກັນສັງຄົມແຫ່ງຊາດ ກະ ຊວງ ແຮງງານ ແລະ ສະຫວັດດີການສັງຄົມ ເປັນຜູ້ຈັດຕັ້ງປະຕິບັດ ເພື່ອປົກປ້ອງສິດ ແລະ ຜົນປະໂຫຍດຂອງສະມາ ຊິກປະກັນສັງຄົມ ດ້ວຍການປະກອບທຶນສົມທົບ ແລະ ການສະໜອງການອຸດໜູນປະກັນສັງຄົມ ຊຶ່ງເປັນການສະເລ່ຍຄວາມສ່ຽງ, ການຊ່ວຍ ເຫຼືອຊຶ່ງກັນ ແລະ ກັນ ແນໃສ່ຄ້ຳປະກັນດ້ານສະຫວັດດີການຂັ້ນພື້ນຖານ,ມີສະພາບໍລິຫານ ທີ່ປະກອບດ້ວຍຕົວແທນ ສາມຝ່າຍ ຕາງໜ້າຈາກລັດຖະ ບານ, ຜູ້ໃຊ້ແຮງງານ ແລະ ຜູ້ອອກແຮງງານ ຊຶ່ງມີພາລະບົດບາດໃນການຊີ້ນໍາ ແລະ ພິຈາລະນາການບໍລິຫານ ຄຸ້ມຄອງກອງທຶນປະກັນສັງຄົມ.
ກອງທຶນປະກັນສັງຄົມໄດ້ສະໜອງການອຸດໜູນທັງ ໝົດ 09 ປະເພດ ໃນນີ້ ອົງການປະກັນສັງຄົມຮັບຜິດຊອບຈັດຕັ້ງປະຕິບັດ 08 ການອຸດໜູນຄື: ປ່ວຍການ, ອຸປະຕິ ເຫດແຮງງານ ຫລື ພະ ຍາດອາຊີບ, ອອກລູກ, ເສຍກຳ ລັງແຮງງານ, ບຳນານ, ເສຍຊີວິດ, ສະມາຊິກຄອບຄົວ ແລະ ວ່າງງານ; ສ່ວນອຸດໜູນປະກັນສຸຂະພາບ ແມ່ນຫ້ອງການປະກັນສຸຂະພາບແຫ່ງຊາດ ກະຊວງສາທາລະນະສຸກເປັນຜູ້ຈັດຕັ້ງປະຕິບັດ ຕາມກົດໝາຍວ່າດ້ວຍການປະກັນສຸຂະ ພາບ ນັບແຕ່ເດືອນ ກໍລະກົດປີ 2019 ເປັນຕົ້ນມາ.
ປັດຈຸບັນ, ສະມາຊິກປະກັນສັງຄົມທີ່ຈ່າຍເງິນສົມທົບ ມີຈໍານວນ 388.660 ຄົນ ແລະ ມີຜູ້ເກີດສິດໃນການຄຸ້ມ ຄອງຈາກລະບົບປະກັນສັງຄົມ (ຜູ້ປະກັນຕົນ,ຄູ່ສົມລົດ ແລະ ລູກ) ລວມທັງໝົດ 828.403 ຄົນ.