ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສື່ມວນຊົນຮຽນຮູ້ການໃຊ້ຊິວິດປົກກະຕິແບບໃໝ່ທີ່ປອດໄພ ຫຼື NEW NORMAL.

ກອງປະຊຸມຮັບຟັງສະພາບການລະບາດຂອງພະຍາດໂຄວິດ 19 ແລະ ທ່າອ່ຽງຂອງພະຍາດໂຄວິດ 19 ໃນອະນາຄົດ ຈັດຂຶ້ນໃນຕອນເຊົ້າວັນທີ 20.05.2020 ທີ່ສູນສື່ສານເພື່ອສຸຂະພາບ ແລະ ສຸຂະສຶກສາ ກະຊວງສາທາລະນະສຸກ ມີທ່ານ ວິສິດ ຄຳລືຊາ ຫົວໜ້າສູນສື່ສານເພື່ອສຸຂະພາບ ແລະ ສຸຂະສຶກສາ ກະຊວງສາທາລະນະສຸກ, ທ່ານ ສັງຂານ ຈູມຄຳພັນ ຮອງຜູ້ອຳນວຍການໃຫຍ່ ວິທະຍຸກະຈາຍສຽງແຫ່ງຊາດລາວ, ຜູ້ຕາງໜ້າຈາກອົງການອະນາໄມໂລກ ພ້ອມດ້ວຍບັນນາທິການ ແລະ ນັກຂ່າວຈາກສື່ຕ່າງໆເຂົ້າຮ່ວມ.

ທ່ານ ວິສິດ ຄຳລືຊາ ຫົວໜ້າສູນສື່ສານເພື່ອສຸຂະພາບ ແລະ ສຸຂະສຶກສາ ມີຄຳເຫັນວ່າ: ການຈັດກອງປະຊຸມຄັ້ງນີ້, ເພື່ອໃຫ້ຜູ້ເຂົ້າຮ່ວມໂດຍສະເພາະ ບັນດາສື່ມວນຊົນໄດ້ຮັບຮູ້ສະພາບການລະບາດຂອງພະຍາດ ໂຄວິດ 19 ໃນປັດຈຸບັນ ແລະ ທິດທາງ ຫລື ທ່າອ່ຽງຂອງພະຍາດດັ່ງກ່າວ ວ່າຈະເປັນແນວໃດ? ພາຍຫລັງມີມາດຕະການຜ່ອນຜັນຂອງລັດຖະບານ, ການປັບຕົວ ຫລື ໃຊ້ຊີວິດໃຫ້ມີຄວາມປອດໄພ ຄວນເຮັດແນວໃດ? ຈຶ່ງຈະສາມາດຢຸດຢັ້ງການແຜ່ລະບບາດຂອງເຊື້ອພະຍາດໂຄວິດ19 ໄດ້ແບບຖາວອນ.

ດຣ. ນາງ ຈິດສະຫວ່າງ ຈັນທະວີສຸກ ວິຊາການສະເພາະກິດດ້ານການສື່ສານຄວາມສ່ຽງ ຂອງອົງການອະນາໄມໂລກ ໄດ້ລາຍງານສະພາບການລະບາດຂອງພະຍຍາດ ໂຄວິດ 19 ແລະ ແນະນຳການໃຊ້ຊີວິດພາຍຫລັງລັດຖະບານໄດ້ຜ່ອນຜັນບາງມາດຕະການວ່າ: ໄລຍະເກີດການລະບາດຂອງພະຍາດໂຄວິດ 19 ຄະນະສະເພາະກິດກະຊວງສາທາລະນະສຸກ ໄດ້ຮ່ວມມືກັບອົງການອະນາໄມໂລກ ແລະ ພາກສ່ວນກ່ຽວຂ້ອງ ເອົາໃຈໃສ່ປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດ ຂອງພະຍາດດັ່ງກ່າວຢ່າງເຂັ້ມງວດ ມາຮອດປັດຈຸບັນຕົວເລກສະສົມຜູ້ຕິດເຊື້ອພະຍາດໂຄວິດ 19 ຢູ່ໃນປະເທດລາວຍັງຢູ່ທີ່ 19 ຄົນ ປິ່ນປົວດີແລ້ວ 14ຄົນ ຍັງປິ່ນປົວຢູ່ໂຮງໝໍ 5ຄົນ ທັງໝົດມີອາການເບົາບາງ.

ສະນັ້ນ ເພື່ອບໍ່ໃຫ້ພະຍາດໂຄວິດ 19 ກັບຄືນມາລະບາດເປັນຮອບທີ 2 ທຸກຄົນໃນທົ່ວປະເທດຕ້ອງເປັນເຈົ້າການປະຕິບັດຕາມຄຳແນະນຳ ຂອງກະຊວງສາທາລະນະສຸກໃນການປ້ອງກັນສະກັດກັ້ນການລະບາດຂອງພະຍາດໂຄວິດ 19 ຢ່າງເຂັ້ມງວດ ໂດຍສະເພາະການໃຊ້ຊິວິດປົກກະຕິແບບໃໝ່ທີ່ປອດໄພ ຫຼືເອີ້ນວ່າ NEW NORMAL. ພາຍຫຼັງໄດຮັບຟັງການບັນລະຍາຍ ວິທີການຮັກສາສຸຂະພາບ ແລະ ການແນະນຳຕ່າງໆກ່ຽວກັບສະພາບການລະບາດຂອງພະຍາດໂຄວິດ 19 ຈາກວິຊາການສະເພາະກິດດ້ານການສື່ສານຄວາມສ່ຽງ ຂອງອົງການອະນາໄມໂລກແລ້ວ ຜູ້ເຂົ້າຮ່ວມໄດ້ສົນທະນາແລກປ່ຽນຄຳຄິດຄຳເຫັນ ພ້ອມທັງຄົ້ນຄິດຮ່ວມກັນໃນການປຸກລະດົມ, ເຜີຍແຜ່ໂຄສະນາໃຫ້ປະຊາຊົນຮັບຮູ້ເຂົ້າໃຈ ກ່ຽວກັບການໃຊ້ຊີວິດປົກກະຕິແບບໃໝ່ແນວໃດໃຫ້ມີຄວາມປອດໄພ ເພື່ອປ້ອງກັນຕົນເອງ, ຄອບຄົວ ແລະ ຄົນອ້ອມຂ້າງຈາກພະຍາດໂຄວິດ 19.