ສູນກາງສະຫະພັນແມ່ຍິງລາວ ແລະ ອົງການ ສະຫະປະຊາຊາດກອງທຶນປະຊາກອນ (ຫຼື UNFPA) ຮ່ວມກັບ ອົງການ ແພຣນ ສາກົນປະຈໍາ ສປປ ລາວ ແລະ ບັນດາຄູ່ຮ່ວມງານໄດ້ພາກັນສະເຫຼີມສະຫຼອງໃຫ້ເດັກຍິງທຸກໆຄົນໃນ ສປປ ລາວ

ທ່ານນາງ ອິນລາວັນ ແກ້ວບຸນພັນ ປະທານຄະນະບໍລິຫານງານສູນກາງສະຫະພັນແມ່ຍິງລາວ ໄດ້ມີຄຳເຫັນກ່າວເປີດພິທີບາງຕອນທ່ານກ່າວວ່າ: ອົງການ UNFPA ແລະ ພາກສ່ວນຕ່າງໆ ທີ່ໄດ້ເອົາໃຈໃສ່ຈັດຕັ້ງປະຕິບັດບັນດາຕົວຊີ້ວັດ ຂອງເປົ້າໝາຍການພັດທະນາແບບຍືນຍົງ ໂດຍສະເພາະ ຕົວຊີ້ບອກ SDG2, SDG3, SDG4, SDG 5 ແລະ SDG8 ທີ່ເຊື່ອມໃສ່ຂອບວຽກນາງ ນ້ອຍ.” ພິທີສະເຫຼີມສະຫຼອງໃນຄັ້ງນີ້ຈັດຂຶ້ນພາຍໃຕ້ຄໍາຂວັນ “ປັດຈຸບັນແມ່ນເວລາຂອງພວກເຮົາ-ສິດທິຂອງພວກເຮົາ, ອະນາຄົດຂອງພວກເຮົາ” ເຊິ່ງໄດ້ຍົກໃຫ້ເຫັນຄວາມໝາຍຄວາມສໍາຄັນຂອງການເຮັດວຽກຮ່ວມກັນ ເພື່ອໃຫ້ເດັກຍິງມີຄວາມສຸກ ແລະ ສາມາດໃຊ້ສິດຂອງພວກເຂົາ ພ້ອມທັງມີສ່ວນຮ່ວມຢ່າງເຕັມສ່ວນຢ່າງສະເໝີພາບໃນຊຸມຊົນ ແລະ ສັງຄົມ.

ທ່ານນາງ ອິນລາວັນ ແກ້ວບຸນພັນ ກ່າວຕື່ມວ່າ: ພິທີສະເຫຼີມສະຫຼອງໃນຄັ້ງນີ້ ສຸດທີ່ມີຄວາມໝາຍຄວາມສຳຄັນຍິ່ງ ເນື່ອງຈາກເປັນວາລະຄົບຮອບ 03 ປີ ຂອງການຈັດຕັ້ງປະຕິບັດກອບແຜນງານ “ນາງ ນ້ອຍ ປີ 2030” ເພື່ອແກ້ໄຂສິ່ງທ້າທາຍຂອງເດັກຍິງລາວ ທີ່ປະເຊີນກັບບັນຫາເລື່ອງການເຂົ້າເຖິງການສຶກສາ, ສຸຂະພາບຈະເລີນພັນ, ເພດສຳພັນ, ການຈ້າງງານ ແລະ ຄວາມສະເໝີພາບຍິງ-ຊາຍ ລວມທັງໂອກາດໃນການມີສ່ວນຮ່ວມ ແລະ ການຕັດສິນໃຈໃນເລື່ອງຕ່າງໆ ໃນຊີວິດຂອງເຂົາເຈົ້າ.

ໂອກາດນີ້, ທ່ານ ນາງ ມາຣຽມ ເອ ຄານ, ຜູ້ຕາງໜ້າອົງການ UNFPA ປະຈຳ ສປປ ລາວ ໄດ້ກ່າວວ່າ “ໄວໜຸ່ມຍິງຈໍານວນຫຼາຍກວ່າ 600 ລ້ານຄົນໃນທົ່ວໂລກ ແລະ 700.000 ກວ່າຄົນໃນລາວ ລ້ວນແຕ່ມີຄວາມຫວັງ ແລະ ຄວາມໄຟ່ຝັນທີ່ຢາກເຮັດໃຫ້ເກີດເປັນຈິງ. ການລົງທຶນຕໍ່ກັບສິດທິຂອງພວກເຂົາໃນຕອນນີ້ຈະສາມາດຖອດຖອນອຸປະສັກທີ່ມາປິດກັ້ນທ່າແຮງຂອງເດັກຍິງເຫຼົ່ານີ້ ເຊິ່ງກໍ່ຄື ຄວາມກ້າວໜ້າຂອງ ຊຸມຊົນ ແລະ ສັງຄົມ.” ງານສະເຫຼີມສະຫຼອງຄັ້ງນີ້ຍັງໄດ້ຢໍ້າເຕືອນເຖິງຄຳໝັ້ນສັນຍາຂອງຄູ່ຮ່ວມມືທຸກຝ່າຍໃນການເປັນພັນທະມິດ ແລະ ເປັນຕົວແບບສົ່ງເສີມຄວາມສະເໝີພາບທາງບົດບາດຍິງ-ຊາຍ ແລະ ສ້າງຄວາມເຂັ້ມແຂງໃຫ້ແກ່ໄວໜຸ່ມຍິງຕື່ມອີກ.

ຂ່າວ: ບຸນຖະໜອມ ພານລີ

ພາບ: ພູເງິນ ບົວທອງ