ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສູນກາງແນວລາວສ້າງຊາດ ຈັດກອງປະຊຸມສາມັນຄົບຄະນະ ຄັ້ງທີ 4 ສະໄໝທີ 10

ຕອນເຊົ້າ ວັນທີ 12 ມີນາ 2019, ທີ່ສູນ ICTC, ນະຄອນຫຼວງວຽງຈັນ, ກອງປະຊຸມສາມັນຄົບຄະນະກຳມະການສູນກາງແນວລາວສ້າງຊາດ ຄັ້ງທີ 4 ສະໄໝທີ 10 ໄດ້ຈັດຂຶ້ນ ໂດຍການເປັນປະທານຂອງທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ແລະໂດຍມີບັນດາພະເຖລານຸເຖລະ, ປະທານແນວລາວສ້າງຊາດນະຄອນຫຼວງ ແລະ ຂອງບັນດາແຂວງໃນທົ່ວປະເທດ ພ້ອມດ້ວຍການນຳຂອງບັນດາອົງການຈັດຕັ້ງມະຫາຊົນຂັ້ນສູນກາງເຂົ້າຮ່ວມຫຼາຍກ່ວາ 300 ຄົນ.
ຈຸດປະສົງໃນການຈັດກອງປະຊຸມໃນຄັ້ງນີ້ ແມ່ນເພື່ອທົບທວນຄືນຜົນຂອງການຈັດຕັ້ງປະຕິບັດວຽກງານແນວລາວ ສ້າງຊາດໃນປີ 2018 ແລະ ທິດທາງແຜນການປີ 2019. ນອກນັ້ນ, ບັນດາຜູ້ເຂົ້າຮ່ວມກອງປະຊຸມຍັງຈະໄດ້ພ້ອມກັນປຶກສາຫາລື ແລະ ຜ່ານເນື້ອໃນຂອງເອກະສານສຳຄັນຈຳນວນໜຶ່ງຄື : ຮ່າງບົດສະຫຼຸບຕີລາຄາການເຄື່ອນໄຫວວຽກງານແນວລາວສ້າງຊາດປີ 2018 ແລະ ທິດ ທາງແຜນການເຄື່ອນໄຫວວຽກງານປີ 2019, ຄຳແນະນຳກ່ຽວກັບການຜັນຂະຫຍາຍຜົນ ສຳເລັດຂອງກອງປະຊຸມພົບປະຜູ້ຊົງຄຸນວຸດທິບັນດາເຜົ່າທົ່ວປະເທດຄັ້ງທີ 3 ປີ 2018, ຮັບຟັງການປະກອບຄຳຄິດຄຳເຫັນຂອງຜູ້ຕາງໜ້າກຳມະການສູນກາງແນວລາວສ້າງຊາດ ກ່ຽວກັບການເຕົ້າ ໂຮມຄວາມສາມັກຄີຂອງພີ່ນ້ອງເຊື້ອສາຍລາວທີ່ດຳລົງຊີວິດຢູ່ປະເທດຝຣັ່ງ, ຮັບຟັງການປະກອບຄຳຄິດຄຳເຫັນຂອງບັນດາຜູ້ຕາງໜ້າອົງການພາຄີ.

  

ນອກນີ້, ບັນດາຜູ້ເຂົ້າຮ່ວມກອງປະຊຸມ ຍັງຈະໄດ້ຟັງ ການແລກປ່ຽນຄຳຄິດຄຳເຫັນຂອງບັນດາກຳມະການສູນກາງແນວລາວສ້າງຊາດຈາກສູນກາງ, ທ້ອງຖິ່ນ ແລະ ຕ່າງປະເທດ ຕື່ມອີກ. ກອງປະຊຸມດັ່ງກ່າວດຳເນີນໄປຮອດວັນທີ 13 ມີນາ 2019 .