ທ່ານ ນາງ ສ້ອຍສຸວັນ ສຸວັນນະວົງ ຜູ້ບໍລິຫານສູນບ້ານຮ່ວມໃຈ ແລະ ທ່ານ ນາງ ວິດາລີ ຈັນທະຜາສຸກ ເຈົ້າຂອງໂຮງແຮມ ຜາສຸກ ວຽງ ຈັນທຣາ ໄດ້ປະກອບສ່ວນຊຸກຍູ້ເສື້ອໂປໂລ ຈໍານວນ 70 ຜືນ ລວມມູນຄ່າ 5.250.000 ກີບ ໃຫ້ສໍາມະນາກອນ ຊຸດຝຶກອົບຮົມທິດສະດີການເມືອງສະເພາະດ້ານ ຂະແໜງສື່ມວນຊົນ, ຈັດຂື້ນໂດຍ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ທີ່ສະຖາບັນສື່ມວນຊົນ ວັດທະນະທໍາ ແລະ ທ່ອງທ່ຽວ ຕາງໜ້າຮັບໂດຍ ພັນຕີ ວັນໄຊ ເພັງສະຫວັດ ຫົວໜ້າຫ້ອງ.
ທ່ານ ນາງ ສ້ອຍສຸດາ ສຸວັນນະວົງ ໄດ້ກ່າວວ່າ: ສູນບ້ານຮ່ວມໃຈ ຍິນດີໃນການປະກອບສ່ວນຊຸກເສື້ອ ໃຫ້ສໍາມະນາກອນ ເພື່ອນໍາໃຊ້ເຂົ້າໃນການຈັດກິດຈະກໍາຕ່າງໆ ພ້ອມທັງອວຍພອນໃຫ້ຊຸດຝຶກອົບຮົມຄັ້ງນີ້ ດຳເນິນໄປດ້ວຍຜົນສໍາເລັດຕາມແຜນການທີ່ວາງໄວ້.
ໂອກາດນີ້, ທ່ານ ນາງ ວິດາລີ ຈັນທະຜາສຸກ ກໍ່ໄດ້ສະແດງຄວາມຍິນດີ ທີ່ໄດ້ເປັນສ່ວນໜຶ່ງໃນການປະກອບສ່ວນຊຸກຍູ້ ໃຫ້ສໍາມະນາກອນ ຊຸດຝຶກອົບຮົມທິດສະດີການເມືອງສະເພາະດ້ານ ຂະແໜງສື່ມວນຊົນ ຄັ້ງນີ້ ແລະ ຂໍໃຫ້ສໍາມະນາກອນທີ່ເຂົ້າຮ່ວມຝຶກອົບຮົມ ປະສົບຜົນສໍາເລັດ ເພື່ອນໍາເອົາຄວາມຮູ້ໄປນໍາໃຊ້ເຂົ້າໃນວຽກງານວິຊາສະເພາະ ແລະ ພັດທະນາປະເທດຊາດຕໍ່ໄປ.
ພັນຕີ ວັນໄຊ ເພັງສະຫວັດ ຫົວໜ້າຫ້ອງ ໄດ້ຕາງໜ້າໃຫ້ສໍາມະນາກອນ ຊຸດຝຶກອົບຮົມທິດສະດີການເມືອງສະເພາະດ້ານ ຂະແໜງສື່ມວນຊົນ ກ່າວສະແດງຄວາມຂອບໃຈ ມາຍັງສູນບ້ານຮ່ວມໃຈ ແລະ ໂຮງແຮມ ຜາສຸກ ວຽງ ຈັນທຣາ ທີ່ໄດ້ນໍາເສື້ອມາມອບໃຫ້ໃນຄັ້ງນີ້ ພ້ອມທັງອວຍພອນໃຫ້ທ່ານທັງສອງ ຈົ່ງມີສຸຂະພາບແຂງແຮງ, ປະສົບຜົນສໍາເລັດໃນຊີວິດສ່ວນຕົວ ແລະ ຄອບຄົວ, ທຸລະກິດຈະເລີນກ້າວໜ້າຍິ່ງໆຂື້ນ.
