ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສູນວັດທະນະທຳເດັກ ແລະ ຫໍສະຫມຸດແຂວງ ລົງເຄື່ອນໄຫວກິດຈະກໍາ ກ່ຽວກັບສິດທິເດັກ ແລະ ສົ່ງເສີມການອ່ານ ຢູ່ ໂຮງຮຽນ ປະຖົມສົມບູນພູຂຽວ

ຕອນເຊົ້າວັນທີ 19 ມິຖຸນາ 2020 ນີ້ ສູນວັດທະນະທໍາເດັກ ແລະ ຫໍສະຫມຸດ ແຂວງອຸດົມໄຊ ລົງເຄື່ອນໄຫວສ້າງກິດຈະກຳ ກ່ຽວກັບສິດທິເດັກ ແລະ ການຊຸກຍູ້ ສົ່ງເສີມການອ່ານ ໃຫ້ແກ່ນ້ອງນັກຮຽນ ຢູ່ທີ່ໂຮງຮຽນ ປະຖົມສົມບູນ ພູຂຽວ ເຊິ່ງນຳໂດຍ ທ່ານ ສີວິໄລ ຊາມາລັດ ອຳນວຍການສູນວັດທະນະທຳເດັກ ແຂວງ.

ການລົງເຄື່ອນໄຫວກິດຈະກໍາໃນຄັ້ງນີ້ ກໍເພື່ອເຮັດໃຫ້ເດັກນັກຮຽນ ຮັບຮູ້, ເຂົ້າໃຈ ຕໍ່ກັບສິດທິດຂອງຕົນເອງ ແລະ ພ້ອມທີ່ຈະເຄື່ອນໄຫວ, ດຳລົງຊີວິດຢູ່ໃນສັງຄົມ ໄດ້ຢ່າງມີປະສິດທິພາບ ເຮັດໃຫ້ເດັກນ້ອຍ ມີຄວາມຮູ້, ຄວາມສາມາດ ແລະ ຈະເລີນເຕີບໂຕເປັນຜູ້ໃຫຍ່ທີ່ດີຂອງສັງຄົມ, ເປັນບຸກຄະລາກອນທີ່ມີຄຸນນະພາບໃນອະນາຄົດ, ເຊິ່ງສິດທິຂອງເດັກ ປະກອບມີ 4 ສິດທິ ຄື ສິດທິໃນການຢູ່ລອດ, ສິດທິໃນການມີສ່ວນຮ່ວມ, ສິດທິໃນການພັດທະນາ – ສຶກສາ ແລະ ສິດທິໃນການປົກປ້ອງ. ນອກນັ້ນ, ຍັງເປັນການຊຸກຍູ້ສົ່ງເສີມໃຫ້ນ້ອງນັກຮຽນ ຮັກໃນການອ່ານ ເພື່ອສຶກສາ ແລະ ຊອກຮູ້ຮໍ່າຮຽນ ຈາກປຶ້ມຕຳລາ, ເຮັດໃຫ້ນັກຮຽນມີຄວາມຮູ້, ຄວາມສະຫລາດ, ກ້າສະແດງອອກ, ສາມາດປະພຶດຕົນຢ່າງມີລະບຽບ, ມີວິໄນ, ມີຄວາມສາມັກຄີ ທັງເປັນການພັດທະນາດ້ານການສຶກສາຂອງຕົນເອງໃຫ້ນັບມື້ນັບດີຂຶ້ນເທື່ອລະກ້າວ. ເຊິ່ງກິດຈະກຳຫຼັກໆ ລົງເຄື່ອນໄຫວສ້າງກິດຈະກຳ ກ່ຽວກັບສິດທິເດັກ ແລະ ການຊຸກຍູ້ ສົ່ງເສີມການອ່ານ ໃຫ້ແກ່ນ້ອງນັກຮຽນ ຢູ່ທີ່ໂຮງຮຽນ ປະຖົມສົມບູນ ພູຂຽວ ຄັ້ງນີ້ມີການ  ຖາມ – ຕອບ ຄໍາຖາມກ່ຽວກັບສິດທິຂອງເດັກ ເພື່ອແລກເອົາຂອງຂວັນ – ລາງວັນ, ຫຼິ້ນເກມມ່ວນຊື່ນ, ການອ່ານນິທານ,ຮ້ອງເພງ ແລະ ອື່ນໆ… ການເຄື່ອນໄຫວກິດຈະກຳດັ່ງກ່າວ ຖືເປັນວຽກງານຫນຶ່ງຂອງສູນວັດທະນະທໍາເດັກ ຮ່ວມກັບ ຫໍສະຫມຸດ ແຂວງອຸດົມໄຊ ເຊິ່ງຈະໄດ້ສືບຕໍ່ເຄື່ອນໄຫວຢ່າງເປັນປົກກະຕິ ໂດຍມີເປົ້າຫມາຍຢູ່ບັນດາໂຮງຮຽນປະຖົມສົມບູນ ພາຍໃນເທດສະບານ ເມືອງໄຊ.

ການເຄື່ອນໄຫວກິດຈະກຳໃນຄັ້ງນີ້ ມີ ທ່ານ ນາງ ຈັນສຸກ ສຸລິດາ ອໍານວຍການໂຮງຮຽນປະຖົມສົມບູນ ພູຂຽວ ພ້ອມດ້ວຍພະນັກງານຄູ ແລະ ນ້ອງນັກຮຽນ ພາຍໃນໂຮງຮຽນດັ່ງກ່າວ ເຂົ້າຮ່ວມຢ່າງເປັນຂະບວນຟົດຟື້ນ.

ຂ່າວ: ຄານມະນີ ຮຽນດໍຈັນ