ໃນຕອນບ່າຍ ຂອງວັນທີ 5 ທັນວາ 2020 ນີ້ ທາງສູນສະຖິຕິແຫ່ງຊາດ, ຄະນະຊີ້ນໍາການເດີນສໍາຫຼວດຂັ້ນສູນກາງ, ຂັ້ນແຂວງ ແລະ ຂັ້ນເມືອງຜົ້ງສາລີ ໄດ້ລົງຕິດຕາມການຈັດຕັ້ງປະຕິບັດໜ້າທີ່ວຽກງານ ຂອງນັກເດີນສໍາຫຼວດສະຖິຕິກະສິກໍາ ຢູ່ທີ່ບ້ານຂຸນສຸກນ້ອຍ, ເມືອງຜົ້ງສາລີ, ແຂວງຜົ້ງສາລີ ໂດຍພາຍໃຕ້ການນໍາພາ ຂອງ ທ່ານ ເລືອມສົນສີວິໄລ ຮອງຫົວຫນ້າສູນສະພິຕິແກ່ງຊາດ, ມີທ່ານ ທອງສຸກ ເປົາສຸລີ ກຳມະການພັກແຂວງ, ເລຂາພັກເມືອງ,ເຈົ້າເມືອງໆຜົ້ງສາລີ, ຮອງຫົວຫນ້າຄະນະຊີ້ນໍາການເດີນສໍາຫຼວດ ສະຖິຕິກະສິກຳຂັ້ນແຂວງ, ມີທ່ານ ສຸບຸນລ້ຽງ ເນດບຸນນອງ ຫົວຫນ້າສູນສະຖິຕິປະຈຳແຂວງ, ຄະນະຊີ້ນຳຂັ້ນແຂວງ, ຫົວຫນ້າຫ້ອງການສຳຫລວດສະຖິຕິກະສິກຳແຂວງຜົ້ງສາລີ ຕະຫຼອດຮອດທີມງານຂັນສູນກາງ, ແຂວງ, ເມືອງ ນັກກວດກາ ແລະ ນັກເດີນ ສໍາຫຼວດ ສະຖິຕິກະສິກໍາຂອງເມືອງຜົ້ງສາລີ ແລະ ຄະນະປົກຄອງບ້ານຂຸນສຸກນ້ອຍ ພ້ອມດ້ວຍຄອບຄົວເປົ້າໝາຍທີ່ຖືກສໍາພາດເຂົ້າຮ່ວມ.

ໂອກາດນີ້ທ່ານ ດວງມີໄຊ ສະພູນສຸກ ພະນັກງານຫ້ອງການກະສິກຳ-ປ່າໄມ້ເມືອງ, ນັກກວດກາສຳຫລວດສະຖິຕິກະສິກຳເມືອງ ຕາງຫນ້າທີມງານສຳຫລວດກະສິກຳເມືອງຜົ້ງສາລີເຂດທີ 1 ແລະ ທ່ານ ສົມພອນ ໄຊຍະແກ້ວ ຮອງເລຂາພັກບ້ານ-ຮອງນາຍບ້ານຂຸນສຸກນ້ອຍ ໄດ້ຂຶ້ນລາຍງານການຈັດຕັ້ງປະຕິບັດໜ້າທີ່ວຽກງານການເດີນສໍາຫຼວດສະຖິຕິກະສິກໍາພາກສະໜາມຢູ່ບ້ານຂຸນສຸກນ້ອຍ ເມືອງຜົ້ງສາລີ ເຊີງບ້ານດັ່ງກ່າວມີທັງຫມົດ 34 ຫລັງຄາ, ມີ 34 ຄົວເຮືອນ, ມີ 36 ຄອບຄົວ ໃນນີ້ມີຄົວເຮືອນຕົວແທນໃນການສໍາຫລວດສະຖິຕິກະສິກໍາ ມີ 16 ຄົວເຮືອນ, ສຳຮອງ 4 ຄົວເຮືອນ.

ໂອກາດນີ້ທ່ານເຈົ້າເມືອງຜົ້ງສາລີ ແລະ ທ່ານຮອງຫົວຫນ້າສູນສະຖິຕິແຫ່ງຊາດ ໄດ້ຍ້ອງຍໍຊົມເຊີຍຕໍ່ນັກກວດກາ, ນັກເດີນສຳຫລວດ ແລະ ຄົວເຮືອນຕົວແທນ ທີ່ໄດ້ປະຕິບັດຫນ້າທີ່ຢ່າງຕັ້ງຫນ້າ ແລະ ສະຫນອງຂໍ້ມູນຕາມຄວາມເປັນຈິງ ພ້ອມເນັ້ນໃຫ້ສືບຕໍ່ເດີນສຳຫລວດເພື່ອເຮັດໃຫ້ບັ້ນການເດີນສຳຫລວດສະຖິຕິກະສິກຳ ຄັ້ງທີ III ປີ 2020 ໃຫ້ໄດ້ຮັບຜົນດີ ແລະ ສຳເລັດຕາມຄາດຫມາຍ ແລະ ທາງຄະນະຍັງໄດ້ລົງເດີນສຳພາດເກັບກຳຂໍ້ມູນສະຖິຕິກະສິກຳນຳຄົວເຮືອນຕົວຈິງຂອງບ້ານດັງກ່າວຕື່ມອີກ.

ຂ່າວ: ສົມຄິດ ແກ້ວນວນລາ (ແຂວງຜົ້ງສາລີ)

Loading...