ໃນລະຫວ່າງວັນທີ 2-4 ເມສາ 2024 ນີ້ ທີ່ນະຄອນຫຼວງວຽງຈັນ ສູນແກ້ໄຂຂໍ້ຂັດແຍ່ງທາງດ້ານເສດຖະກິດ ກະຊວງຍຸຕິທໍາ ໄດ້ເປີດຊຸດຝຶກອົບຮົມການຕັດສີນຂໍ້ຂັດແຍ່ງການຄ້າສາກົນໂດຍກໍາມະການຂຶ້ນ. ໂດຍການເປັນປະທານຂອງທ່ານ ນາງ ດວງມະນີ ລາວມາວ ຫົວໜ້າສູນແກ້ໄຂຂໍ້ຂັດແຍ່ງທາງດ້ານເສດຖະກິດ, ເຂົ້າຮ່ວມມີ ທ່ານ ກຣິສມາ ປຣາດານ (Grishma Pradhan) ທະນາຍ-ທີ່ປຶກສາ ໂຄງການພັດທະນາກົດໝາຍສາກົນ (CLDP), ຜູ້ຕາງໜ້າຈາກກະຊວງຍຸຕິທຳ, ກະຊວງການ ຕ່າງປະເທດ, ກະຊວງແຜນການ ແລະ ການລົງທຶນ, ຄະນະສານການຄ້າ ສານປະຊາຊົນສູງສຸດ, ສານປະຊາຊົນພາກກາງ ແລະ ສານປະຊາຊົນນະຄອນຫຼວງວຽງຈັນ, ສະພາການຄ້າ ແລະ ອຸດສາຫະກໍາແຫ່ງຊາດລາວ, ບັນດາອາຈານຈາກຄະນະນິຕິສາດ, ນັກຮຽນກົດໝາຍປະລິນຍາໂທ, ມະຫາວິທະຍາໄລແຫ່ງຊາດ, ພະນັກງານຈາກ ສກສ, ກະຊວງຍຸຕິທຳ ພ້ອມດ້ວຍຄະນະຮັບຜິດຊອບ.
ຈຸດປະສົງຂອງການຝຶກອົບຮົມໃນຄັ້ງນີ້ ກໍເພື່ອສ້າງຄວາມຮັບຮູ້ ແລະ ເຂົ້າໃຈໃຫ້ແກ່ນັກຝຶກອົບຮົມກ່ຽວກັບການຕັດສີນຂໍ້ຂັດແຍ່ງການຄ້າສາກົນໂດຍກໍາມະການ, ໂດຍສະເພາະ ແມ່ນຂະບວນການຕັດສິນຂໍ້ຂັດແຍ່ງການຄ້າສາກົນ ໃນບັນດາປະເທດອາຊຽນ ລວມທັງເຕັກນິກການຂຽນຄໍາຕັດສີນ ແລະ ການບັງຄັບການປະຕິບັດຄໍາຕັດສີນຂອງສານ, ສິດທິຂອງຄູ່ກໍລະນີ ໃນການເລືອກການຕັດສີນຂໍ້ຂັດແຍ່ງການຄ້າສາກົນ ສິດທິຂອງຄູ່ກໍລະນີພາຍ ໃນ ແລະ ຕ່າງປະເທດ, ຄໍາຕົກລົງຂອງຄູ່ກໍລະນີ ເພື່ອຕັດສິນຂໍ້ຂັດແຍ່ງໂດຍກໍາມະການ, ການປະກອບຄະນະກໍາມະການຕັດສິນ, ການດໍາເນີນການຕັດສິນ, ມາດຕະການປົກປ້ອງ ແລະ ຜົນປະໂຫຍດຂອງຄູ່ກໍລະນີ. ການຂຽນຄໍາຕັດສິນຂອງກໍາມະການ ແລະ ການບັງຄັບການປະຕິບັດຄໍາຕັດສິນຂອງກໍາມະການ.
ຮູບການຕັດສິນຂໍ້ຂັດແຍ່ງທາງດ້ານເສດຖະກິດດ້ວຍກໍາມະການ ແມ່ນຮູບການໜຶ່ງທີ່ມີຄວາມສໍາຄັນຫຼາຍ ເພາະເປັນການລົງຄໍາເຫັນຊີ້ຂາດຂອງຜູ້ຕັດສິນ ຫຼື ຄະນະກໍາມະການຕັດສີນຕໍ່ສິດ ແລະ ຜົນປະໂຫຍດຂອງຄູ່ກໍລະນີ, ເປັນຄໍາຊີ້ຂາດວ່າການຮ້ອງຂໍມີເຫດຜົນ ຫຼື ບໍ່ມີເຫດຜົນ ຫຼື ມີເຫດຜົນບາງສ່ວນ, ເມື່ອມີຄໍາຕັດສີນຂອງກໍາມະການແລ້ວແມ່ນບໍ່ສາມາດອຸທອນໄດ້ ເພາະສະນັ້ນ, ມັນຮຽກຮ້ອງເຖິງຄວາມຮູ້, ຄວາມສາມາດ ແລະ ຄວາມຊໍານານງານລວມທັງຈັນຍາບັນຂອງຜູ້ຕັດສິນ. ໃນການຝຶກອົບຮົມດັ່ງກ່າວ ຜູ້ເຂົ້າຮ່ວມກໍໄດ້ມີການປະກອບຄໍາຄິດຄຳເຫັນ ແລະ ແລກປ່ຽນບົດຮຽນໃນບັນດາຫົວຂໍ້ຕ່າງໆ ຢ່າງເປັນຂະບວນການທີ່ຝົດຟື້ນ, ແນໃສ່ເຮັດໃຫ້ຜູ້ເຂົ້າຮ່ວມຝຶກອົບຮົມ ນໍາເອົາຄວາມຮູ້ທີ່ໄດ້ຮັບໄປໝູນໃຊ້ເຂົ້າໃນການຈັດຕັ້ງປະຕິບັດວຽກງານຢ່າງມີປະສິດທິພາບ ແລະ ປະສິດທິຜົນສູງ.
ຂ່າວ-ພາບ: ໄຊຍະສິດ ບັນຍາວົງ
