ສູ້ຊີວິດເຮັດການຜະລິດ ຊີວິດການເປັນຢູ່ດີຂຶ້ນ

ໂດຍ: ວຽງໃຈ ຄໍາມະນີວົງ

ເຖິງຍາມໃດກໍຕາມ ພັກ-ລັດເຮົາ ກໍໄດ້ເອົາໃຈໃສ່ໃນການກໍ່ສ້າງພື້ນຖານໂຄງລ່າງ ເພື່ອເປັນປັດໄຈສໍາຄັນໃນການແກ້ໄຂຄວາມຫຍຸ້ງຫຍາກຂອງປະຊາຊົນທີ່ເກີດຂຶ້ນ ລວມທັງການສ້າງຄວາມສາມາດຫຼາຍດ້ານ ເພື່ອເຮັດໃຫ້ເສດຖະກິດ-ສັງຄົມ ໄດ້ມີການຄະຫຍາຍຕົວຢ່າງຕໍ່ເນື່ອງ ຊຶ່ງອັນພົ້ນເດັ່ນແມ່ນສາມາດເຮັດໃຫ້ປະເທດຊາດມີສະຖຽນລະພາບດ້ານການເມືອງຢ່າງໜັກແໜ້ນ, ຄວາມເປັນເອກະລາດ, ອໍານາດອະທິປະໄຕ, ຜືນແຜ່ນດິນອັນຄົບຖ້ວນ ແລະ ໝາກຜົນຂອງການປະຕິວັດໄດ້ຮັບການປົກປ້ອງຢ່າງເຂັ້ມແຂງ, ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ແລະ ສືບຕໍ່ໄດ້ຮັບການຈັດຕັ້ງປະຕິບັດຢ່າງຕັ້ງໜ້າຕິດພັນກັບການຈັດຕັ້ງປະຕິບັດຍຸດທະສາດການກໍ່ສ້າງຮາກຖານການເມືອງ, ພັດທະ ນາຊົນນະບົດ ແກ້ໄຂຄວາມທຸກຫຍາກຂອງປະຊາຊົນຕາມ 4 ເນື້ອໃນ 4 ຄາດໝາຍ ຢູ່ເຂດຈຸດສຸມຕ່າງໆໃນຂອບເຂດທົ່ວປະເທດ, ດັ່ງນັ້ນແຂວງໄຊສົມບູນ ໂດຍສະເພາະອົງການຈັດຕັ້ງທີ່ກ່ຽວຂ້ອງກໍໄດ້ເອົາໃຈ ໃສ່ໃນການລົງເຄື່ອນໄຫວສຸກຍູ້ປະຊາຊົນ ປູກຝັງລຽ້ງສັດເປັນສິນຄ້າ ເພື່ອແກ້ໄຂຄວາມທຸກຫຍາກຂອງປະຊາຊົນ ນີ້ກໍແມ່ນອີກທາງເລືອກໜຶ່ງ ແລະ ເປັນປັດໄຈສຳຄັນໃຫ້ແກ່ການພັດທະນາຊົນນະບົດ ແລະ ແກ້ໄຂຄວາມທຸກຍາກ ຊຶ່ງຍາມໃດພັກ ແລະ ລັດຖະບານ ກໍໄດ້ເອົາໃຈໃສ່ຊຸກຍູ້ສົ່ງເສີມຂະບວນການດັ່ງກ່າວ ຈາກການຜະລິດແບບທຳມະຊາດ ຫັນໄປສູ່ການຜະລິດເປັນສິນຄ້າໂດຍນຳໃຊ້ເຕັກນິກວິທະຍາສາດ ແລະ ວິຊາການເຂົ້າຊ່ວຍຜູ້ທີ່ມີເງື່ອນໄຂໃນການປູກ, ການລ້ຽງ ໃຫປະສົບຜົນສໍາເລັດ ຕົວຢ່າງ ຄອບຄົວຂອງ ທ່ານ ແສງແກ້ວ ແຂກພິມມ່ວງ ປັດຈຸບັນ ຢູ່ບ້ານນາໄຊ ເມືອງລ້ອງຊານ ແຂວງໄຊສົມບູນ ຕາມການລາຍງານຂອງທ່ານວ່າ: ອາຊີບຫຼັກເປັນພະນັກງານຄູສອນ, ນອກນັ້ນທ່ານຍັງໄດ້ຢຶດຖືເອົາການປູກ, ການລ້ຽງເປັນອາຊີບເສີມ ໂດຍສະເພາະແມ່ນລ້ຽງໝູ, ລ້ຽງໄກ່ພັນໄຂ່, ລ້ຽງປາ ຍ້ອນວ່າໃນເມື່ອກ່ອນ ເຂດນີ້ຍັງເປັນເຂດທີ່ຫ່າງໄກສອກຫຼີກ, ບໍ່ມີຕະຫຼາດ, ອາຫານການກິນກໍຍັງຊອກຫາແບບອາໄສທຳມະຊາດ ຫາມາພໍແຕ່ກຸ້ມຢູ່ກຸ້ມກິນພາຍໃນຄອບຄົວຕົນເອງເທົ່ານັ້ນ ມາຮອດປີ 2017 ພັກ-ລັດ ໂດຍສະເພາະຫ້ອງການກະສິກໍາປ່າໄມ້ເມືອງ ກໍໄດ້ເອົາໃຈໃສ່ໃຫ້ການສຸກຍູ້ ແລະ ຊີ້ນໍາທາງດ້ານເຕັກຕິກ ແລະ ວິທີການ ບວກກັບຄວາມມັກຮັກ ແລະ ເງື່ອນໄຂຂອງຄອບຄົວຕົນເອງ ທີ່ມີເນື້ອທີ່ດິນເໝາະສົມ ເມື່ອເຫັນໄດ້ແນວນັ້ນ ຕົນເອງຈຶ່ງໄດ້ເກີດມີຄວາມຄິດຢາກຜະລິດເປັນສິນຄ້າ ເພື່ອສົ່ງຂາຍຢູ່ພາຍໃນບ້ານ ແລະ ເມືອງລ້ອງຊານ, ແຕ່ຍັງຂາດ ທຶນຮອນ, ຈາກນັ້ນ ກໍໄດ້ໄປປຶກສານໍາພາກສ່ວນທີ່ກ່ຽວຂ້ອງເພື່ອຂໍກູ້ຢືມເງິນຈໍານວນ 40 ລ້ານກີບ ມາເຮັດຄອກໄກ່, ຊື້ໄກ່ພັນໄຂ່ໄດ້ 1.000 ໂຕ, ຊື້ປາຈໍານວນໜຶ່ງ ມາປ່ອຍໃສ່ໜອງທີ່ມີແລ້ວ ຕອນນັ້ນກໍລ້ຽງແບບປະສົມປະສານ, ເຫັນວ່າສາມາດສ້າງລາຍຮັບເຂົ້າຄອບຄົວໄດ້ດີພໍສົມຄວນ ຕະຫຼາດພາຍໃນເມືອງກໍຍັງມີຄວາມຕ້ອງການຫຼາຍ, ມາຮອດປີ 2022 ຈຶ່ງໄດ້ຮີບໂຮມທຶນຮອນຂອງຕົນ ຂະຫຍາຍຟາມໄກ່ພັນໄຂ່ອອກຕື່ມອີກ ຈາກ 1.000 ໂຕ ມາເປັນ 5.000 ໂຕ ແຕ່ກໍຍັງບໍ່ພຽງພໍຕໍ່ກັບຄວາມຕ້ອງການຂອງຕະຫຼາດ. ມາຮອດປີ 2023 ກໍໄດ້ຂະຫຍາຍເພີ່ມອີກ ຈາກ 5.000 ໂຕ ມາເປັນ 10.000 ໂຕ, ໜອງປາຈາກ 1 ໜອງ ກໍເພີ່ມຂຶ້ນມາເປັນ 8 ໜອງ ໃນນັ້ນມີປາທົ່ວໄປ 4 ໜອງ, ປາດຸກ 4 ໜອງ, ປ່ອຍປາແຕ່ລະຄັ້ງບໍ່ຫຼຸດ 120.000 ໂຕຂຶ້ນໄປຕໍ່ງວດ, ມາຮອດປັດຈຸບັນເຫັນວ່າການຜະລິດໄຂ່ໄກ່ ແລະ ປາ ແມ່ນມີຄວາມອີ່ມຕົວແລ້ວ ແຕ່ຄວາມຮຽກຮ້ອງຕ້ອງການຊີ້ນໝູຢູ່ພາຍໃນແຂວງຍັງມີຈຳນວນຫຼາຍ ດັ່ງນັ້ນຈຶ່ງໄດ້ ມາລ້ຽງໝູເພີ່ມອີກ ຈໍານວນ 3 ຟາມ, 3 ຮຸ່ນ, ແຕ່ລະຮຸ່ນມີ 100 ໂຕ, ປີໜຶ່ງສາມາດສົ່ງໝູອອກຂາຍໄດ້ 300 ໂຕ, ໃນເບື້ອງຕົ້ນແມ່ນ ຄອບຄົວຕົນເອງໄດ້ນຳໃຊ້ແຮງງານພາຍໃນຄອບຄົວເທົ່ານັ້ນ, ມາຮອດປັດຈຸບັນນີ້ໄດ້ຈ້າງແຮງງານປະຈໍາທັງໝົດ 7 ຄົນ ມາເປັນຜູ້ຊ່ວຍຈັດການບໍລິຫານວຽກພາຍໃນຟາມ ຊຶ່ງພາຍຫຼັງທີ່ໄດ້ຫັນມາລ້ຽງໄກ່ພັນໄຂ່, ລ້ຽງປາ, ລ້ຽງໝູ່ສົ່ງອອກຂາຍມານີ້ ໄດ້ເຮັດໃຫ້ຄອບຄົວຂອງຕົນ ມີລາຍຮັບເຂົ້າຄອບຄົວເປັນຈໍານວນຫຼາຍຂຶ້ນ, ໃນນັ້ນມີລາຍຮັບຈາກການຂາຍປາ 600-700 ລ້ານກີບຕໍ່ປີ, ເກັບໄຂ່ໄກ່ອອກຂາຍໄດ້ 230 ແຕະຕໍ່ມື້, ເປັນເງິນ 390 ລ້ານກີບຕໍ່ເດືອນ, ຂາຍໝູ 110 ໂຕຕໍ່ເດືອນ, ໄຂ່ໄກ່ ບ່ອນສົ່ງປະຈໍາແມ່ນສົ່ງໃຫ້ບໍລິສັດພູເບ້ຍມາຍນິງ ຈຳນວນ 900 ແຕະຕໍ່ອາທິດ, ນອກນັ້ນກໍສົ່ງຂາຍໃນຕະຫຼາດເມືອງລ້ອງຊານ, ເມືອງຮົ່ມ ແລະ ເມືອງລ່ອງແຈ້ງ, ສຳລັບປາ, ນອກຈາກຕະຫຼາດເມືອງລ້ອງຊານ, ເມືອງຮົ່ມ, ເມືອງລ້ອງແຈ້ງແລ້ວ ຍັງຂາຍທົ່ວໄປ, ໝູ ສົ່ງຂາຍໃຫ້ແຕ່ຕະຫຼາດເມືອງລ້ອງແຈ້ງເທົ່ານັ້ນ. ດັ່ງນັ້ນ ສິນຄ້າທີ່ຜະລິດຈາກຟາມຄອບຄົວຂອງທ່ານແສງແກ້ວ ນອກຈາກຈະຂາຍສົ່ງອອກຕະຫຼາດ ພາຍໃນແຂວງ ແລະ ເມືອງແລ້ວ ເພິ່ນຍັງໄດ້ມີການຂາຍຍ່ອຍຢູ່ພາຍໃນເຮືອນຂອງເພິ່ນຕື່ມອີກ ເປັນຕົ້ນ ໄຂ່ໄກ່, ປາ ແລະ ຊີ້ນໝູ ສະໜອງໃຫ້ແກ່ປະຊາຊົນພາຍໃນບ້ານ ແລະ ບ້ານໃກ້ຄຽງໄດ້ບໍລິໂພກໃນລາຄາຍ່ອມເຍົາ ເພື່ອອຳນວຍຄວາມສະດວກ ແລະ ຍັງເປັນການຊ່ວຍຫຼຸດຜ່ອນຄ່າໃຊ້ຈ່າຍໃຫ້ແກ່ສັງຄົມຕື່ມອີກ, ໃນປີ 2023 ຜ່ານມານີ້ ຄອບຄົວຂອງ ທ່ານ ແສງແກ້ວ ແຂກພິມມ່ວງ ສາມາດສ້າງລາຍຮັບເຂົ້າຄອບຄົວຂອງຕົນເອງໄດ້ທັງໝົດປະມານ 1.600 ລ້ານກວ່າກີບ. ພ້ອມນັ້ນ ທ່ານຍັງໄດ້ກ່າວຕໍ່ນັກຂ່າວພວກເຮົາວ່າ: ປັດຈຸບັນນີ້ ຍັງມີແຜນຈະຂະຫຍາຍຟາມ ແລະ ຜະລິດໝູໃຫ້ໄດ້ປີໜຶ່ງຫຼາຍກ່ວາ 900 ໂຕ ເພື່ອສະໜອງໃຫ້ຕະຫຼາດ ທົ່ວແຂວງໄຊສົມບູນ ແລະ ຄາດການວ່າຈະລ້ຽງໝູແມ່ພັນ ເພື່ອຜະລິດໝູນ້ອຍມາລ້ຽງພາຍໃນຟາມຕົນເອງບໍ່ໃຫ້ໄດ້ຊື້ຈາກຜູ້ອື່ນ ເພື່ອເປັນການຫຼຸດຜ່ອນຕົ້ນທຶນລົງ. ນອກນັ້ນ, ກໍຈະໄດ້ແບ່ງປັນຂາຍໃຫ້ກັບປະຊາຊົນທີ່ມີຄວາມສົນໃຈຢາກລ້ຽງໝູນຳອີກ.

ການຜະລິດກະສິກຳເປັນສິນຄ້າ ເຫັນວ່າຄອບຄົວຂອງທ່ານ ແສງແກ້ວ ແຂກພິມມ່ວງ ມີເສດຖະກິດດີຂຶ້ນ, ເຮັດໃຫ້ຊີວິດການເປັນຢູ່ຫຼຸດພົ້ນອອກຈາກຄວາມທຸກຍາກໄດ້, ນີ້ກໍຍ້ອນຄວາມດຸໝັ່ນ ຊື່ສັດ ປະຍັດ ແລະ ອົດທົນ ບວກກັບຄວາມມີຫົວຄິດປະດິດສ້າງ ກ້າເຮັດກ້າຕັດສິນໃຈ, ສູ້ຊົນຜ່ານຜ່າທຸກຄວາມຫຍຸ້ງຍາກມາ ຈຶ່ງເຮັດໃຫ້ຄອບຄົວຂອງ ທ່ານ ແສງແກ້ວ ແຂກພິມມ່ວງ ມີເສດຖະກິດດີຂຶ້ນແບບກ້າວກະໂດດ ແລະ ຍັງສາມາດເປັນຄອບຄົວຕົວແບບທີ່ໂດດເດັ່ນ, ເປັນແບບຢ່າງນຳໜ້າຢ່າງເປັນຮູບປະທຳໃນການສ້າງເສດຖະກິດຄອບຄົວ, ສາມາດນຳເອົາໄປເປັນບົດຮຽນໃຫ້ແກ່ຄອບຄົວອື່ນໆ ທີ່ຕ້ອງການສ້າງເສດຖະກິດຄອບຄົວຕົນເອງໃຫ້ໝັ້ນຄົງ ແລະ ຫຼຸດພົ້ນອອກຈາກຄວາມທຸກຍາກໄດ້ເທື່ອລະກ້າວ.