ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສົກຮຽນ 2019-2020 ທົ່ວແຂວງຫຼວງພະບາງມີນັກສອບເສັງຈົບຊັ້ນ ມ7 ຫຼາຍກ່ວາ 4.200 ຄົນ

ວັນທີ່ 29 ກໍລະກົດນີ້ ພະແນກສຶກສາທິການ ແລະ ກິລາແຂວງຫຼວງພະບາງ ໄດ້ຈັດພິທີເປີດການສອບເສັງ ຈົມຊັ້ນມັດທະຍົມປາຍ ມ7 ສົກຮຽນ 2019-2020, ມີ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ, ພ້ອມດ້ວຍຜູ້ຕາງໜ້າກະຊວງສຶກສາທິການ ແລະ ກິລາ, ຄະນະຊີ້ນຳການສອບເສັງ, ຄູສອນ ແລະນັກສອບເສັງເຂົ້າຮ່ວມ. ພິທີ ທ່ານ ຊາຍສະຫວັນ ຈັນມານິດ ຮັກສາການຫົວໜ້າພະແນກສຶກສາ ທິການ ແລະ ກິລາແຂວງ ໄດ້ລາຍງານການກະກຽມການສອບເສັງວ່າ: ສົກຮຽນ 2019-2020 ທົ່ວແຂວງມີໂຮງຮຽນມັດທະຍົມສຶກສາທັງໝົດ 114 ແຫ່ງ, ຫ້ອງຮຽນ 1.281 ຫ້ອງ, ໃນນັ້ນ ມີໂຮງຮຽນມັດທະຍົມສົມບູນ 46 ແຫ່ງ, ໂຮງຮຽນມັດທະຍົມຕົ້ນ 67 ແຫ່ງ ແລະໂຮງຮຽນມັດທະຍົມປາຍ 1 ແຫ່ງ, ມີນັກຮຽນທັງໝົດ 46.917 ຄົນ, ຍີງ 21.566 ຄົນ, ສະເພາະການສອບເສັງຈົບຊັ້ນ ມ7 ມີຜູ້ເຂົ້າສອບເສັງ 4.232 ຄົນ, ຍິງ 1.755 ຄົນ, ແບ່ງເປັນ 39 ສູນສອບເສັງ ຈັດຫ້ອງສອບເສັງມີທັງໝົດ 217 ຫ້ອງ, ສອບເສັງ 4 ວິຊາຫຼັກຄື: ພາສາລາວ-ວັນນະຄະດີ, ຊີວະສາດ, ຄະນິດສາດ ແລະພູມສາດ ເລີ້ມສອບເສັງແຕ່ ວັນທີ່ 29 ຫາ 30 ກໍລະກົດ ເປັນເອກະພາບພ້ອມກັນໃນທົ່ວປະເທດ. ໂອກາດນີ້ ທ່ານ ວົງສະຫວັນ ເທບພະຈັນ ໄດ້ກ່າວເປີດການສອບເສັງໂດຍຮຽກຮ້ອງໃຫ້ຄະນະຊີ້ນຳ ແລະຄະນະຮັບຜິດຊອບການສອບເສັງ ພ້ອມດ້ວຍຜູ້ເຂົ້າສອບເສັງ ຈົ່ງພ້ອມກັນປະຕິບັດລະບຽບການສອບເສັງໃຫ້ເຂັ້ມງວດ, ສະເພາະຜູ້ເຂົ້າສອບເສັງ ຈົ່ງຕັ້ງໜ້າຄົ້ນຄ້ວາ ແລະຕອບຫົວບົດສອບເສັງໃຫ້ທັນເວລາ ເພື່ອເຮັດໃຫ້ຕົນເອງສອບເສັງໄດ້ຄະແນນດີ ແລະເສັງຈົບຊັ້ນຕາມຄວາມຫວັງໄວ້.
ຕອນທ້າຍ ຄະນະປະທານ ໄດ້ເປີດຫົວບົດສອບເສັງວິຊາທຳອິດຢ່າງເປັນທາງການ ພ້ອມທັງລົງຊີ້ນຳການສອບເສັງຢູ່ບາງສູນ ຕື່ມອີກ.