ໃນວັນທີ 06 ທັນວາ 2022, ສົມເດັດ ພຣະຣາຊາ ອັງຣີ ແຫ່ງ ຣາຊະອານາຈັກ ລຸກຊໍາບວກ ແລະ ຄະນະ ໄດ້ເຄື່ອນໄຫວຢ້ຽມຢາມບັນດາໂຄງການຊ່ວຍເຫຼືອຂອງລຸກຊໍາບວກ ຢູ່ນະຄອນຫຼວງວຽງຈັນ ເປັນຕົ້ນ: ສະຖາບັນປັດສະເຕີລາວ; ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ; ແລະ ສູນຫົວໃຈລາວ-ລຸກຊໍາບວກ, ໂຮງໝໍມະໂຫສົດ.
ຢູ່ ສະຖາບັນ ປັດສະເຕີລາວ, ສົມເດັດ ພຣະຣາຊາ ອັງຣີ ໄດ້ຮັບການຕ້ອນຮັບໂດຍ ທ່ານ ດຣ. ສະໜອງ ທອງຊະນະ, ຮອງລັດຖະມົນຕີກະຊວງສາທາລະນະສຸກ ແລະ ພະນັກງານສະຖາບັນປັດສະເຕີລາວ ຈໍານວນໜຶ່ງ. ສະຖາບັນດັ່ງກ່າວ ໄດ້ຮັບການຊ່ວຍເຫຼືອຈາກລັດຖະບານ ລຸກຊໍາບວກ ທັງໝົດ 6.715.880 ເອີໂຣ, ຊຶ່ງປະກອບດ້ວຍການຈັດຊື້ອຸປະກອນການແພດ, ໂຄງການຮ່ວມມື ລະຫວ່າງ ລາວ-ລຸກຊໍາບວກ ເພື່ອການຄົ້ນຄວ້າ ແລະ ການສ້າງຄວາມອາດສາມາດໃນການເຝົ້າລະວັງພະຍາດຕິດແປດ (ໂຄງການ PARECIDS) ສໍາລັບ ການດໍາເນີນງານຂອງຫ້ອງວິເຄາະ ສໍາລັບ ພະຍາດທີ່ປ້ອງກັນໄດ້ດ້ວຍວັກຊີນ ແລະ ການຊ່ວຍເຫຼືອເພື່ອຕ້ານ ແລະ ສະກັດການແຜ່ລະບາດຂອງ ພະຍາດ ໂຄວິດ-19.
ສໍາລັບຢູ່ ຄະນະນິຕິສາດ ແລະ ລັດຖະສາດ, ສົມເດັດ ພຣະຣາຊາ ອັງຣີ ໄດ້ຮັບການຕ້ອນຮັບໂດຍ ທ່ານ ພຸດ ສິມມາລາວົງ, ລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍຄະນະຄູ-ອາຈານ ແລະ ນັກສຶກສາ ຄະນະນິຕິສາດ ແລະ ລັດຖະສາດ ຈໍານວນໜຶ່ງ. ໃນໂອກາດດັ່ງກ່າວ, ສົມເດັດ ພຣະຣາຊາ ອັງຣີ ໄດ້ຮັບຟັງການລາຍງານ ກ່ຽວກັບ ການຈັດຕັ້ງປະຕິບັດໂຄງການສະໜັບສະໜູນການສິດສອນ ແລະ ຝຶກອົບຮົມກົດໝາຍ ເພື່ອສົ່ງເສີມການສ້າງລັດແຫ່ງກົດໝາຍ ຢູ່ ສປປ ລາວ ຂອງ ທ່ານ ຮສ. ວຽງວິໄລ ທ່ຽງຈັນໄຊ, ຄະນະບໍດີ ຄະນະນິຕິສາດ ແລະ ລັດຖະສາດ. ພ້ອມທັງໄດ້ຢ້ຽມຊົມ ຫໍສະໝຸດ ທີ່ທັນສະໄໝ, ຫ້ອງຮຽນຕົວແບບ ຢູ່ ຄະນະດັ່ງກ່າວ.
ສ່ວນຢູ່ ສູນຜ່າຕັດຫົວໃຈ ລາວ-ລຸກຊໍາບວກ, ໂຮງໝໍມະໂຫສົດ, ສົມເດັດ ພຣະຣາຊາ ອັງຣີ ກໍໄດ້ຮັບການຕ້ອນຮັບໂດຍ ທ່ານ ດຣ. ສະໜອງ ທອງຊະນະ, ຮອງລັດຖະມົນຕີກະຊວງສາທາລະນະສຸກ, ອະດີດລັດຖະມົນຕີ ກະຊວງສາທາລະນະສຸກພ້ອມດ້ວຍບັນດາແພດໝໍ ແລະ ພະຍາບານ ຈໍານວນໜຶ່ງ. ສູນດັ່ງກ່າວ ໄດ້ຮັບການຊ່ວຍເຫຼືອຈາກລັດຖະບານ ລຸກຊໍາບວກ ໃນໄລຍະປີ 2019-2021 ດ້ວຍມູນຄ່າ 554.909,27 ເອີໂຣ ໂດຍຜ່ານໂຄງການ ADS (Aide Au Development De La Santé), ເຊິ່ງເປັນອົງການຈັດຕັ້ງສາກົນທີ່ບໍ່ສັງກັດລັດຖະບານ (NGO). ປະຈຸບັນ, ໂຄງການດັ່ງກ່າວ ໄດ້ສືບຕໍ່ຈັດຕັ້ງປະຕິບັດ ໃນໄລຍະທີ 5, ເຊິ່ງເຫັນວ່າ ເປັນໂຄງການທີ່ມີຄວາມໝາຍ ແລະ ຄວາມສໍາຄັນຢ່າງຍິ່ງ ເພື່ອປິ່ນປົວຄົນເຈັບພະຍາດຫົວໃຈ ໂດຍການນໍາເອົາຊ່ຽວຊານຈາກ ລຸກຊໍາບວກ, ຝຣັ່ງ, ເຢຍລະມັນ ເຂົ້າມາຜ່າຕັດ ຢູ່ ສປປ ລາວ.
ໃນຕອນບ່າຍຂອງວັນດຽວກັນ, ສົມເດັດ ພຣະຣາຊາ ອັງຣີ ພ້ອມຄະນະ ຍັງໄດ້ໄປຢ້ຽມຊົມ ພິພິດທະພັນວັດສີສະເກດ ແລະ ໃນຕອນຄໍ່າສົມເດັດ ພຣະຣາຊາ ອັງຣີ ພ້ອມດ້ວຍຄະນະ ໄດ້ເຂົ້າຮ່ວມງານສະເຫຼີມສະຫຼອງວັນສ້າງຕັ້ງສາຍພົວພັນການທູດ ລະຫວ່າງ ລາວ ແລະ ລຸກຊໍາບວກ ຄົບຮອບ 25 ປີ, ທີ່ ໂຮງແຮມ ຄຣາວ ພລາຊາ, ຈັດໂດຍ ສະຖານເອກອັກຄະລັດຖະທູດ ແຫ່ງ ຣາຊະອານາຈັກ ລຸກຊໍາບວກ ປະຈໍາ ສປປ ລາວ.
Loading...