ກອງປະຊຸມສົ່ງເສີມການທ່ອງທ່ຽວ ເຊື່ອມຕໍ່ 4 ແຂວງພາກ ໃຕ້ ຄື: ສາລະວັນ, ເຊກອງ, ຈໍາປາສັກ ແລະ ອັດຕະປື ຈັດຂຶ້ນໃນລະຫວ່າງວັນທີ 22-24 ກໍລະກົດ 2024 ທີ່ແຂວງສາລະວັນ ໄດ້ລາຍງານໃຫ້ຮູ້ວ່າ: ໃນ 6 ເດືອນຕົ້ນປີ 2024 ມີນັກທ່ອງທ່ຽວເຂົ້າມາ 4 ແຂວງພາກໃຕ້ (ສາລະວັນ-ເຊກອງ-ຈໍາປາສັກ-ອັດຕະປື) ລວມ 391 ພັນກວ່າເທື່ອຄົນ ໃນນີ້, ນັກທ່ອງທ່ຽວພາຍໃນ 122 ພັນກວ່າເທື່ອຄົນ, ນັກທ່ອງທ່ຽວສາກົນ 130.530 ເທື່ອຄົນ ແລະ ນັກທ່ອງທ່ຽວຊາຍແດນ 137.874 ເທື່ອຄົນ, ປະເມີນລາຍຮັບຈາກການທ່ອງທ່ຽວ 59 ລ້ານກວ່າໂດລາ.
ຈາກຕົວເລກດັ່ງກ່າວ ສະແດງໃຫ້ເຫັນວ່າແຂວງພາກໃຕ້ມີທ່າອ່ຽງທີ່ຈະພັດທະນາ ແລະ ດຶງດູດນັກທ່ອງທ່ຽວ ໃຫ້ນັບມື້ນັບຫລາຍຂຶ້ນ ໂດຍສະເພາະ ໃນທ້າຍປີ 2024 ເຊິ່ງເປັນປີທ່ອງທ່ຽວລາວ ສະນັ້ນ, 4 ແຂວງພາກໃຕ້ ຕ້ອງໄດ້ເພີ່ມທະວີການພັດທະນາ ແລະ ປັບປຸງຄຸນນະພາບ ສິ່ງອໍານວຍຄວາມສະດວກ ດ້ານການທ່ອງທ່ຽວ ແລະ ການບໍລິການ ໃຫ້ແທດເໝາະກັບກະແສນັກທ່ອງທ່ຽວໃນປັດຈຸບັນ ເພື່ອໃຫ້ກາຍເປັນຈຸດໝາຍປາຍທາງການທ່ອງທ່ຽວ ແລະ ສາມາດດຶງດູດໃຫ້ນັກທ່ອງທ່ຽວ ໃຊ້ເວລາທ່ອງທ່ຽວໃຫ້ຫລາຍຂຶ້ນ.
ທ່ານ ວັນນະໄຊ ຊາດຕະກຸນຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງຈໍາປາສັກ ກ່າວຕື່ມວ່າ: ໃນຕໍ່ໜ້າພວກເຮົາຈະສືບຕໍ່ຊຸກຍູ້ສົ່ງເສີມວຽກງານການທ່ອງທ່ຽວ ເພື່ອເຊື່ອມຕໍ່ 4 ແຂວງພາກໃຕ້ ໃນເຂດພູພຽງບໍລະເວນ, ພ້ອມດຽວກໍເຊີນຊວນນັກທ່ອງທ່ຽວໃຫ້ເຂົ້າມາທ່ອງທ່ຽວແຂວງຈໍາປາສັກ ໂດຍແຂວງຈໍາປາສັກ ມີແຫລ່ງທ່ອງທ່ຽວທີ່ລືຊື່ທາງທໍາມະຊາດ, ວັດທະນະທໍາ, ປະຫວັດສາດ ແລະ ກະສິກໍາ ເປັນຕົ້ນ ວັດພູຈໍາປາສັກ (ມໍລະດົກໂລກ) ນໍ້າຕົກຕາດຄອນພະເພັງ, ມະຫານະທີສີທັນດອນ, ນໍ້າຕົກຕາດເຍືອງ, ນ້ຳຕົກຕາດຟານ ແລະ ທ່ອງທ່ຽວສວນກາເຟ.
