ກະຊວງພະລັງງານ ແລະ ບໍ່ແຮ່ (MEM) ຂອງ ສປປ ລາວ ຮ່ວມກັບ ສູນພະລັງງານອາຊຽນ (ACE) ເປັນເຈົ້າພາບຈັດ ກອງປະຊຸມພາກທຸລະກິດພະລັງງານອາຊຽນ ຄັ້ງທີ 24 (AEBF-24) ໃນວັນທີ 25 -27 ກັນຍາ 2024 ທີ່ຫໍປະຊຸມແຫ່ງຊາດ ກອງປະຊຸມດັ່ງກ່າວເປັນເວທີເສວະນາລະດັບສູງ ແລະ ການແລກປ່ຽນຄວາມຮູ້ລະຫວ່າງ ພາກລັດ ນັກວິຊາການ ຜູ້ນໍາດ້ານອຸດສາຫະກຳ ນັກລົງທຶນ ແລະ ຜູ້ຊ່ຽວຊານດ້ານພະລັງງານ ມີ ພາກສ່ວນທີ່ກ່ຽວຂ້ອງຈາກ ອາຊຽນ ພ້ອມນັ້ນກອງປະຊຸມຄັ້ງນີ້ໄດ້ປຶກສາຫາລືກ່ຽວກັບການຮ່ວມມືໃນພາກພື້ນ ແລະ ຄົ້ນຄວ້າການແກ້ໄຂດ້ານພະລັງງານຍືນຍົງເພື່ອອະນາຄົດຂອງອາຊຽນ.
ທ່ານ ສຸກວິສັນ ຄິນສະໝອນ ຮອງຫົວໜ້າກົມແຜນການ ແລະ ການຮ່ວມມື ກະຊວງພະລັງງານ ແລະ ບໍ່ແຮ່ ໄດ້ກ່າວວ່າ: ພາຍໃຕ້ການເປັນປະທານອາຊຽນຂອງ ສປປ ລາວ ຈັດຂຶ້ນພາຍໃຕ້ຄຳຂວັນ ເພີ່ມທະວີການເຊື່ອມຈອດ ແລະ ຄວາມຍືນຍົງ ສະແດງໃຫ້ເຫັນເຖິງຄຳໝັ້ນສັນຍາຮ່ວມກັນໃນການຮັບປະກັນຄວາມປອດໄພພະລັງງານຫັນເປັນສີຂຽວ ແລະ ແຫຼ່ງພະລັງງານແບບຍືນຍົງ ໃນຂະນະທີ່ ອາຊຽນໄດ້ພ້ອມກັນມີສ່ວນຮ່ວມໃນການສົນທະນາ ແບ່ງປັນການປະຕິບັດທີ່ດີທີ່ສຸດ ແລະ ສ້າງການເຊື່ອມຕໍ່ທີ່ຍືນຍົງ ເຊື່ອມຕໍ່ພາກພື້ນອາຊຽນ ເພື່ອສ້າງການປ່ຽນແປງທາງບວກດ້ານພະລັງງານ.
ກອງປະຊຸມ AEBF-24 ກາຍເປັນເວທີສໍາຄັນຂອງ ສປປ ລາວ ໃນຊຸກຍູ້ບູລິມະສິດດ້ານພະລັງງານ ລວມທັງການເພີ່ມທະວີຄວາມໝັ້ນຄົງດ້ານພະລັງງານ ການສົ່ງເສີມພະລັງງານທົດແທນ ແລະ ການພັດທະນາການເຊື່ອມຈອດທາງດ້ານພະລັງງານໃນພາກພື້ນ ກອງປະຊຸມດັ່ງກ່າວຊ່ວຍໃຫ້ ສປປ ລາວ ຮ່ວມກັບ ACE ກາຍເປັນຜູ້ນໍາພາສູ່ການປຶກສາຫາລື ກ່ຽວກັບການແກ້ໄຂບັນຫາພະລັງງານແບບຍືນຍົງ ເຊິ່ງມີຄວາມສໍາຄັນຢ່າງຍິ່ງໃນການເສີມສ້າງຄວາມເຂັ້ມແຂງທາງດ້ານເສດຖະກິດ ແລະ ສິ່ງແວດລ້ອມຂອງພາກພື້ນ.
ທ່ານ ດຣ ແອນດີ້ ຕິຣ໌ຕາ ຫົວໜ້າຝ່າຍບໍລິຫານ ສູນພະລັງງານອາຊຽນ ທັງເປັນປະທານກອງປະຊຸມ AEBF-24 ໄດ້ເນັ້ນໃຫ້ເຫັນເຖິງຄວາມມຸ່ງໝັ້ນຂອງ ACE ໃນການສະໜັບສະໜູນການເປັນປະທານອາຊຽນຂອງ ສປປ ລາວ ໄດ້ກ່າວວ່າ: ກອງປະຊຸມນີ້ເປັນຂີດໝາຍສຳຄັນໃນຄວາມພະຍາຍາມທີ່ຈະສືບຕໍ່ເພີ່ມທະວີການຮ່ວມມືໃນພາກພື້ນຂະແໜງພະລັງງານ ເປັນເວທີສະແດງໃຫ້ເຫັນຄວາມຄືບໜ້າຂອງກຸ່ມ ແລະ ນະວັດຕະກໍາ ເວທີສົນທະນາຄັ້ງນີ້ຈະມີບົດບາດອັນສຳຄັນເພື່ອຊຸກຍູ້ການປະຕິບັດງານອາຊຽນ ແຜນປະຕິບັດງານເພື່ອການຮ່ວມມືດ້ານພະລັງງານ (APAEC) ຮ່ວມກັນ ພວກເຮົາມີຄວາມມຸ່ງໝັ້ນດ້ານຄວາມປອດໄພທາງດ້ານພະລັງງານ ການເຂົ້າເຖິງ ແລະ ຄວາມຍືນຍົງ ການວາງພື້ນຖານສໍາລັບອະນາຄົດດ້ານພະລັງງານທີ່ທົນທານ ແລະ ຍືນຍົງໃນທົ່ວອາຊຽນ.
AEBF-24 ເນັ້ນໜັກເຖິງຄວາມສຳຄັນຂອງການຮ່ວມມືໃນພາກພື້ນໃນການແກ້ໄຂສິ່ງທ້າທາຍດ້ານພະລັງງານ ການມີສ່ວນຮ່ວມສະແດງໃຫ້ເຫັນເຖິງຄວາມມຸ່ງໝັ້ນຮ່ວມກັນເພື່ອຄວາມກ້າວໜ້າຄວາມປອດໄພດ້ານພະລັງງານ ຄວາມສາມາດເຂົ້າເຖິງ ແລະ ຄວາມຍືນຍົງໃນທົ່ວພາກພື້ນອາຊຽນ ເພີ່ມທະວີການເສີມຂະຫຍາຍການຮ່ວມມື ໃນມື້ທຳອິດຂອງກອງປະຊຸມ ຜູ້ຊ່ຽວຊານ ແລະ ນັກວິຊາການທີ່ເຂົ້າຮ່ວມ ໄດ້ປຶກສາຫາລືກ່ຽວກັບນະວັດຕະກໍາ ວິທີການ ສິ່ງທ້າທາຍດ້ານພະລັງງານ ແລະ ສິ່ງແວດລ້ອມໃນພາກພື້ນ.
