ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມສໍາມະນາຂອງ ສະມາຊິກລັດຖະສະພາເພດຍິງ ລະຫວ່າງຊາດອາຊຽນ ຫລື ໄວປາ(WAIPA) ຄັ້ງທີ 2 ໄດ້ຈັດຂຶ້ນໃນລະຫວ່າງວັນທີ 5-6 ກຸມພາ 2024 ທີ່ສະພາແຫ່ງຊາດ, ສປປ ລາວ ພາຍໃຕ້ຫົວຂໍ້: “ສົ່ງເສີມລັດຖະສະພາ ທີ່ເອົາໃຈໃສ່ບົດບາດຍິງ-ຊາຍ ເພື່ອປະຊາຄົມອາຊຽນ ທີ່ເຂັ້ມແຂງ, ເຊື່ອມຈອດ ແລະ ກວມລວມ”. ໃຫ້ກຽດເຂົ້າຮ່ວມຂອງທ່ານ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ-ສັງຄົມ ທັງເປັນປະທານໄວປາ; ມີບັນດາຮອງປະທານກຳມາທິການ, ເລ ຂາທິການໃຫຍ່ໄອປາ, ສະມາຊິກລັດຖະສະພາ ຈາກບັນດາປະເທດສະມາຊິກໄອປາ(AIPA) 8 ປະເທດ ຄື: ບຣູໄນ, ກຳປູເຈຍ, ອິນໂດເນເຊຍ, ມາເລເຊຍ, ຟີລິບປິນ, ສິງກະໂປ, ໄທ ແລະ ຫວຽດນາມ; ພ້ອມ ດ້ວຍປະເທດສັງເກດການ, ຜູ້ຕາງໜ້າສະຫະປະຊາຊາດ ແລະ ອົງການຈັດຕັ້ງສາກົນ.
ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ຕີລາຄາສູງຕໍ່ບັນດາປະເທດອາຊຽນ ທີ່ໄດ້ມີການສົ່ງເສີມການມີສ່ວນຮ່ວມ ຂອງເພດຍິງ ໃນລັດຖະສະພາ ແລະ ການເປັນຜູ້ນໍາ ຂອງເພດຍິງໃນຕໍາແໜ່ງທີ່ສຳຄັນຕ່າງໆ ແລະ ມີອັດຕາສ່ວນເພີ່ມຂຶ້ນ ໂດຍເຫັນໄດ້ຈາກອັດຕາສ່ວນຂອງເພດຍິງ ໃນລັດຖະ ສະພາຂອງບັນດາປະເທດອາຊຽນ ໄດ້ເພີ່ມຂຶ້ນຈາກ 12% (ໃນປີ 2000) ເປັນ 23% (ໃນປີ 2023). ບັນດາປະເທດອາຊຽນ ກໍຄື ສປປ ລາວ ໄດ້ໃຫ້ຄວາມສຳຄັນຕໍ່ການສົ່ງເສີມ ແລະ ການພັດ ທະນາ ຄວາມສະເໝີພາບລະຫວ່າງຍິງ-ຊາຍ ເຊິ່ງບັນດາປະເທດພວກເຮົາໄດ້ເປັນພາຄີ ຂອງສົນທິສັນຍາວ່າດ້ວຍສິດທິມະນຸດ, ສົນທິສັນຍາ ວ່າດ້ວຍການລົບລ້າງທຸກການຈຳແນກຕໍ່ແມ່ຍິງ (CEDAW), ສົນທິສັນ ຍາ ວ່າດ້ວຍສິດທິທາງການເມືອງ ແລະ ສິດຂອງພົນລະເມືອງ (ICCPR). ໃນຂອບອາຊຽນ ພວກເຮົາໄດ້ມີຖະແຫລງການຮ່ວມ ວ່າດ້ວຍການສົ່ງເສີມແມ່ຍິງ, ສັນຕິພາບ ແລະ ຄວາມໝັ້ນຄົງໃນອາຊຽນ; ຖະແຫລງການອາຊຽນ ວ່າດ້ວຍຄວາມສະເໝີພາບຍິງ-ຊາຍ ແລະ ການພັດທະນາຄອບຄົວ; ຖະແຫລງການອາຊຽນ ວ່າດ້ວຍການເອົາໃຈໃສ່ ບັນດາບົດບາດຍິງ-ຊາຍ ໃນການຈັດຕັ້ງປະຕິບັດວິໄສທັດ 2025 ຂອງປະຊາຄົມອາຊຽນ ແລະ ການພັດທະນາແບບຍືນຍົງ. ໃນຂອບລັດຖະສະ ພາ, ແຕ່ລະປີ ໄດ້ມີກອງປະຊຸມ ເພື່ອຕິດຕາມກວດກາ ການຈັດ ຕັ້ງປະຕິບັດບັນດາມະຕິ, ຖະແຫລງການທີ່ໄດ້ວາງອອກ ແນ ໃສ່ເຮັດໃຫ້ແມ່ຍິງມີສ່ວນຮ່ວມ ແລະ ມີບົດບາດທາງດ້ານການເມືອງ ນັບມື້ນັບສູງຂຶ້ນ.
ກອງປະຊຸມ ໄດ້ລວມເອົາບັນດາສະມາຊິກລັດຖະສະພາ ມາເຕົ້າໂຮມກັນ ເພື່ອຊອກຫາວິທີທາງແກ້ໄຂໃນກອງປະຊຸມເວທີຜູ້ນໍາ ທາງການເມືອງຂອງເພດຍິງ ເຊິ່ງເປົ້າໝາຍແມ່ນເພື່ອສ້າງຄວາມເຂັ້ມ ແຂງການມີສ່ວນຮ່ວມ ຂອງເພດຍິງໃນດ້ານການ ເມືອງ ແລະ ການເປັນຜູ້ນຳ, ການເຊື່ອມໂຍງເຂົ້າກັບພາກພື້ນ ໂດຍການເພີ່ມທະວີການຮ່ວມມືໃນທົ່ວພາກພື້ນ, ຂໍ້ລິເລີ່ມນີ້ ສອດ ຄ່ອງກັນກັບຫົວຂໍ້ລວມຂອງສະພາແຫ່ງຊາດລາວ ໃນນາມເປັນປະທານ AIPA.
ພ້ອມນີ້, ຫົວຂໍ້ຍ່ອຍທີ່ໄດ້ຮັບການຄົ້ນຄວ້າ ໂດຍຜ່ານກອງປະຊຸມເວທີຜູ້ນໍາທາງການເມືອງ ຂອງເພດຍິງລວມມີ: ສົ່ງເສີມການມີສ່ວນຮ່ວມ ຂອງເພດຍິງທາງດ້ານການເມືອງ, ຄວາມເປັນຜູ້ນໍາຂອງເພດຍິງ ໃນການສົ່ງເສີມຄວາມເຂັ້ມແຂງ ແລະ ຮັກສາສັນຕິພາບແບບຍືນຍົງ; ສົ່ງເສີມການເຊື່ອມຕໍ່ ແລະ ການຮ່ວມມື ລະຫວ່າງຮຸ່ນຄົນຕໍ່ຮຸ່ນຄົນ ຂອງຜູ້ນຳເພດຍິງ.
ຂ່າວ-ພາບ: ສພຊ