ພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຂວງສະຫວັນນະເຂດ ສະຫລຸບຊຸດການຝຶກອົບຮົມຄູສອນເປົ່າແຄນ, ຜະລິດແຄນ ແລະ ດົນຕີພື້ນເມືອງ ແຂວງສະຫວັນນະເຂດ ໃນວັນທີ 15 ມິຖຸນາ 2024 ໂດຍການເຂົ້າຮ່ວມຂອງ ທ່ານ ນາງ ຫລິງທອງ ແສງຕາວັນ ຮອງເຈົ້າແຂວງສະຫວັນນະເຂດ.
ໂອກາດນີ້, ທ່ານ ຄໍາສິດ ພົມມະຈັນ ຄະນະບໍລິຫານສະມາຄົມນັກປະພັນລາວ, ສະ ມາຄົມນັກສິລະປິນແຫ່ງຊາດ ທັງເປັນຫົວໜ້າສູນຝຶກອົບຮົມຄູສອນເປົ່າແຄນ, ຜະ ລິດແຄນ ແລະ ດົນຕີພື້ນເມືອງ ແຂວງສະຫວັນນະເຂດ ໃຫ້ຮູ້ວ່າ: ການຈັດຕັ້ງປະຕິ ບັດໂຄງການສ້າງຄູຝຶກສອນເປົ່າແຄນ ແລະ ສອນຜະລິດແຄນ ເອກະລັກຂອງແຂວງສະຫວັນນະເຂດ ໄດ້ເລີ່ມມາແຕ່ວັນທີ 1 ຫາ 15 ມິຖຸນາ 2024, ອີງຕາມທິດຊີ້ນໍາ ຂອງເຈົ້າແຂວງສະຫວັນນະເຂດ ກໍຄືປະຕິບັດຕາມແນວທາງນະໂຍບາຍ ຂອງລັດຖະບານ ໃນການອະນຸລັກແຄນລາວ ແລະ ສຽງແຄນລາວ ສົມກັບວ່າ “ສຽງແຄນເຊື້ອຊາດລາວ ແມ່ນມໍລະດົກວັດທະນະທໍາ ທາງດ້ານນາມມະທໍາ ຂອງມວນມະນຸດໂລກ’’ ທັງເປັນການສືບສານສຽງແຄນ ຂອງປະທານ ໄກສອນ ພົມວິິິິຫານ ວິລະບຸລຸດ ແຫ່ງຊາດລາວ.
ຈຸດປະສົງການຝຶກອົບຮົມຄັ້ງນີ້ ເພື່ອໃຫ້ຄົນຮຸ່ນໜຸ່ມ ຂອງແຂວງສະຫວັນນະເຂດ ມີຄວາມຮັກ, ມີຄວາມມຸ່ງໝັ້ນໃນການເປົ່າແຄນ ຊຶ່ງບົ່ງບອກເຖິງຄວາມເປັນເຊື້ອຊາດລາວ ຢ່າງແທ້ຈິງ ກ້າວໄປເຖິງມີຄວາມສາມາດ ໃນການຜະລິດແຄນທີ່ເປັນເອກະລັກ ຂອງແຂວງສະຫວັນນະເຂດ.
ການຝຶກອົບຮົມຄັ້ງນີ້, ຜູ້ເຂົ້າມາຮຽນ ທັງໝົດ 10 ຄົນ, ຍິງ 1 ຄົນ ໄດ້ຮຽນຮູ້ ການເປົ່າແຄນ, ຜະລິດແຄນ ເປັນຕົ້ນ ໄດ້ຮຽນປະສົມທອງແດງໃສ່ເງິນ ເພື່ອເຮັດລີ້ນແຄນເອງ, ທົດລອງນໍາໃຊ້ເຄື່ອງມືໄຟຟ້າເຂົ້າໃນການຄວັດຜົ້ງເຕົ້າແຄນ, ທົດລອງນໍາໃຊ້ແອັບຈູນເນີ້ ຜ່ານໂທລະສັບ ເຂົ້າໃນການຂຸດຫາສຽງຂອງລີ້ນແຄນ, ມີການປະດິດສ້າງແຄນ ໃຫ້ມີຫລາຍຂະໜາດ ແລະ ຫລາຍຮູບແບບ, ເຊິ່ງຜະລິດແຄນໄດ້ 18 ດວງ ແລະ ປະມູນຂາຍແລ້ວ 8 ດວງ ເປັນມູນຄ່າ 66 ລ້ານກີບ.
ສະຖານທີ່ຂອງໂຄງການ ແມ່ນຕັ້ງຢູ່ອາຄານຫ້ອງການກະສິກໍາ ແລະ ປ່າໄມ້ເກົ່າ ບ້ານທ່າແຮ່, ນະຄອນໄກສອນ ພົມວິຫານ ແຂວງສະຫວັນນະເຂດ ເພື່ອໃຫ້ແຂກຄົນມາທ່ຽວຊົມ, ທັດສະນະສຶກສາ ຫລື ເຂົ້າຮ່ວມກິດຈະກໍານໍາໄດ້, ທັງເປັນກິດຈະກໍາເຊື່ອມໂຍງກັບພິພິທະພັນ ແລະ ຫໍສະໝຸດແຂວງໃນເຂດຕົວເມືອງເກົ່າຕື່ມອີກ.
ຂ່າວ-ພາບ: ອັກສອນສິນ ພົມມະຈັນ
