ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສ້າງຄວາມເຂັ້ມແຂງກ່ຽວກັບວຽກງານພັດທະນາ ແຮ່ເກືອໂປຕາສ ແລະ ແຮ່ຕິດພັນ ຢູ່ 11 ແຂວງໃນທົ່ວປະເທດ
ພິທີເຊັນບົດບັນທຶກຄວາມເຂົ້າໃຈ (MOU) ວ່າດ້ວຍການ ຮ່ວມມືສ້າງຄວາມເຂັ້ມແຂງກ່ຽວກັບ ວຽກງານພັດທະນາ ແຮ່ເກືອໂປຕາສ ແລະ ແຮ່ຕິດພັນ ຢູ່ນະຄອນຫຼວງວຽງຈັນ, ແຂວງ ວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ, ຈຳປາສັກ, ອັດ ຕະປື, ຜົ້ງສາລີ, ອຸດົມໄຊ, ຫຼວງນໍ້າທາ ແລະ ໄຊຍະບູລີ, ລະຫວ່າງກົມທໍ່ລະນີສາດ ແລະ ແຮ່ທາດ, ກະຊວງພະລັງງານ ແລະ ບໍ່ແຮ່ ສປປ ລາວ ກັບ ກົມທໍ່ລະນີສາດອຸດສາຫະກຳນິວເຄຍ, ພະແນກຊັບພະຍາກອນທຳມະຊາດ ແຂວງ ຊິງໄຫ ສປ ຈີນໄດ້ຈັດຂື້ນໃນວັນທີ 26 ກຸມພາ 2024 ທີ່ໂຮງແຮມ ດອນຈັນ ພາເລດ,ໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ທອງພັດ ອິນທະວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່ ແລະ ທ່ານ ຈາງ ຊີຢວນ (Zhang Qiyuan) ຫົວໜ້າກົມສໍາຫຼວດ ແລະ ພັດທະນາທໍລະນີສາດ ແລະ ແຮ່ທາດ ແຂວງ ຊິງໄຫ ສປ ຈີນ.
ທ່ານ ສຸຂັນສັກ ສີສຸກ ຫົວໜ້າກົມທໍລະນີສາດ ແລະ ແຮ່ທາດ ໃຫ້ຮູ້ວ່າ: ການເຊັນບົດບັນທຶກຄວາມເຂົ້າໃຈ (MOU)ຄັ້ງນີ້,ເພື່ອສ້າງຄວາມເຂັ້ມແຂງ ໃນວຽກງານພັດທະນາ ແຮ່ເກືອໂປຕາສ ແລະ ແຮ່ຕິດພັນ ຢູ່ ສປປ ລາວ (ໂດຍສະເພາະໃນ 11 ແຂວງ) ເປັນການຜັນຂະຫຍາຍສາຍພົວພັນມິດຕະພາບສອງຊາດ ລາວ-ຈີນ ອັນມີມູນເຊື່ອຍາວນານ, ເປັນຄູ່ຮ່ວມຊະຕາກໍາ ລາວ-ຈີນ, ຈີນ-ລາວ ແລະ ສົ່ງເສີມຮ່ວມກັນກໍ່ສ້າງໜຶ່ງແລວໜຶ່ງເສັ້ນທາງທີ່ມີຄຸນນະພາບສູງ, ຜັນຂະຫຍາຍໃນການຮ່ວມມືໃນທຸກຂົງເຂດວຽກງານ ລະຫວ່າງ ລາວ-ຈີນ.
ໂຄງການດັ່ງກ່າວ ກໍານົດອາຍຸເບື້ອງຕົ້ນ ແມ່ນ 3 ປີ, ໂດຍຝ່າຍຈີນ ຈະເປັນຜູ້ຮັບຜິດຊອບທາງດ້ານເງິນທຶນ, ອຸປະກອນ, ເຄືອງມື ແລະ ພາຫະນະ ພ້ອມວິຊາການຝ່າຍຈີນ ສົມທົບກັບວິຊາ ການຝ່າຍລາວ ຮ່ວມກັນດໍາເນີນການສໍາຫຼວດແຮ່ເກືອໂປຕາສ ໃນເຂດເປົ້າໝາຍ ໂຄງການ 11 ແຂວງ.
Cr: ສູນຂ່າວພະລັງງານ ແລະບໍ່ແຮ່