ກະຊວງ ຖະແຫລງຂ່າວ, ວັດທະນາທຳ ແລະທ່ອງທ່ຽວ ຮ່ວມກັບຄະນະກຳມະທິການສົ່ງເສີມເພື່ອຄວາມກ້າວໜ້າແມ່ຍິງ, ແມ່ ແລະ ເດັກ ຈັດຝຶກອົບຮົມໃຫ້ບັນດານັກຂ່າວສື່ມວນຊົນໃນຫົວຂໍ້: ສ້າງຄວາມເຂັ້ມແຂງໃຫ້ສື່ມວນຊົນກ່ຽວກັບວຽກງານການປ້ອງກັນ ແລະລືບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ລະຫວ່າງວັນທີ 23 ຫາ 24 ສິງຫານີ້ ໂດຍໄດ້ຮັບການສະໜັບສະໜູນຈາກອົງການສະຫະປະຊາຊາດເພື່ອປະຊາກອນ ຫຼື UNFPA ໂດຍການເຂົ້າຮ່ວມຂອງ ທ່ານ ອຸ່ນທວງ ຂາວພັນ ຮອງລັດຖະມົນຕີ ທັງເປັນປະທານຄະນະກຳມາທິການສົ່ງເສີມເພື່ອຄວາມກ້າວໜ້າແມ່ຍິງ ແລະ ແມ່-ເດັກ ກະຊວງຖະແຫລງຂ່າວ, ວັດທະນາທຳ ແລະທ່ອງທ່ຽວ, ມີທ່ານ ນາງ ມາລ່ຽນ ເອຄານ ຜູ້ຕາງໜ້າຈາກອົງການສະຫະປະຊາຊາດເພື່ອປະຊາກອນ ຫຼື UNFPA ປະຈໍາລາວ, ມີວິທະຍາກອນມາຈາກອົງການສະຫະປະຊາຊາດເພື່ອປະຊາກອນ ພ້ອມສຳມະນາກອນຈາກ 5ສື່ຫຼັກຂອງກະຊວງ ຖະແຫລງຂ່າວ, ວັດທະນາທໍາ ແລະທ່ອງທ່ຽວເຂົ້າຮ່ວມ.
ຊຸດຝຶກອົບຮົມໃນຄັ້ງນີ້ ເພື່ອຍົກລະດັບໃຫ້ບັນດານັກຂ່າວສື່ມວນຊົນເຂົ້າໃຈເຖິງຂໍ້ມູນຂ່າວສານກ່ຽວກັບວຽກງານການປ້ອງກັນ ແລະລືບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ຊື່ງເປັນສ່ວນໜຶ່ງໃນການເຜີຍແຜ່ ແລະປູກຈິດສຳນຶກທົ່ວປວງຊົນໃນສັງຄົມ ຮັບຮູ້ເຂົ້າໃຈຢ່າງເລິກເຊິ່ງກ່ຽວກັບຜົນຮ້າຍຂອງການໃຊ້ຄວາມຮຸນແຮງຕໍ່ແມ່ຍິງ.
ໃນໂອກາດນີ້ ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫລງຂ່າວ, ວັດທະນາທຳ ແລະທ່ອງທ່ຽວ ຊີ້ໃຫ້ເຫັນວ່າ: ບັນຫາການນຳໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ແມ່ນປະກົດການຫຍໍ້ທໍ້ຫນຶ່ງທີ່ເກີດຂື້ນໃນສັງຄົມລາວ ກໍ່ຄືຫລາຍປະເທດທົ່ວໂລກ ໂດຍສະເພາະໃນຍຸກປະຈຸບັນມີການເຜີຍແຜ່ຮູບພາບ, ວິດີໂອຄວາມຮຸນແຮງຕ່າງໆ ຜ່ານສື່ສັງຄົມອອນລາຍ ເຊິ່ງເຫັນໄດ້ວ່າ ເປັນໄພອັນຮ້າຍແຮງຫນຶ່ງ ທີ່ຈະສົ່ງຜົນເສຍຕໍ່ລະບົບສັງຄົມ ໃນໄລຍະຍາວ ກໍ່ຄືອະນາຄົດຂອງແມ່ຍິງແລະ ເດັກນ້ອຍ, ສະນັ້ນການຝຶກອົບຮົມໃນຄັ້ງນີ້ ຈີ່ງມີຄວາມສໍາຄັນໃນການຍົກລະດັບຄວາມຮູ້ດ້ານວຽກງານການປ້ອງກັນ ແລະລືບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ໃຫ້ສື່ມວນຊົນທີ່ເປັນກະບອກສຽງຂອງພັກ-ລັດ ແລະສັງຄົມ ໃນການສົ່ງຂໍ້ມູນຂ່າວສານ, ເຜີຍແຜ່ນະໂຍບາຍ ແລະ ແຜນງານຕ່າງໆຂອງພັກລັດໄດ້ເປັນຢ່າງດີ.
ຊຸດຝຶກອົບຮົມໃນຄັ້ງນີ້ສື່ມວນຊົນໄດ້ຮຽນຮູ້ກ່ຽວກັບວິທີການຂຽນຂ່າວ, ການນໍາໃຊ້ຄຳເວົ້າ ແລະ ວິທີການເລືອກຮູບພາບໃນການນຳສະເໜີບົດຂ່າວ ກ່ຽວກັບການປ້ອງກັນ ແລະ ລືບລ້າງການໃຊ້ຄວາມຮຸນແຮງຕໍ່ແມ່ຍິງ, ພາລະບົດບາດການຈັດຕັ້ງ ແລະການເຄື່ອນໄຫວຂອງຄະນະກຳມະທິການ ເພື່ອຄວາມກ້າວໜ້າແມ່ຍິງ ແລະ ແມ່-ເດັກ ກະຊວງ ຖວທ ແລະ ຫົວຂໍ້ກ່ຽວກັບຈັນຍາບັນໃນການຂຽນຂ່າວກ່ຽວກັບການປ້ອງກັນ ແລະ ລືບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ.
ໂດຍ: ຈັນທະສອນ ສີຫານາດ
Loading...