ອົງການໄອຍະການປະຊາຊົນສູງສຸດ (ອອປສ) ຈັດກອງປະຊຸມ ສ້າງຄວາມເຂັ້ມແຂງວຽກງານຕິດຕາມກວດກາທົ່ວໄປ ໃຫ້ພະນັກງານອົງການໄອຍະການປະຊາຊົນ 7 ແຂວງພາກເໜືອ ຢູ່ເມືອງຫລວງນໍ້າທາ ແຂວງຫລວງນ້ຳທາ ໂດຍການເປັນປະທານຂອງ ທ່ານ ຄຳເພັດ ສົມວໍລະຈິດ ຄະນະປະຈຳພັກ, ຮອງຫົວໜ້າອົງການໄອຍະການປະຊາຊົນສູງສຸດ, ມີຜູ້ຕາງໜ້າຈາກ ອອປສ, ອົງການໄອຍະການປະຊາຊົນ 7 ແຂວງພາກເໜືອ ຄື: ແຂວງຜົ້ງສາລີ, ບໍ່ແກ້ວ, ຫລວງນໍ້າທາ, ອຸດົມໄຊ, ໄຊຍະບູລີ, ຫົວພັນ, ຫລວງພະບາງ ແລະ ຜູ້ຊ່ຽວຊານ ທີ່ມາຈາກ ສະຖາບັນຊ່ວຍເຫລືອທາງດ້ານກົດໝາຍ ແລະ ວິຊາການ ຣາຊະອານາຈັກລຸກຊໍາບວກ, ພ້ອມດ້ວຍ ຄະນະຮັບຜິດຊອບກອງປະຊຸມ ເຂົ້າຮ່ວມ.
ໂອການດັ່ງກ່າວ, ທ່ານ ຄໍາເພັດ ສົມວໍລະຈິດ ໄດ້ຍົກໃຫ້ເຫັນຄວາມໝາຍ ແລະ ຄວາມສຳຄັນ ຕໍ່ກັບວຽກງານການຕິດຕາມກວດກາທົ່ວໄປ ເຊິ່ງແມ່ນໜ້າທີ່ ແລະ ຄວາມຮັບຜິດຊອບ ຂອງອົງການໄອຍະການປະຊາຊົນ ໃຫ້ໄດ້ຮັບການເຄົາລົບ ແລະ ປະຕິບັດ ຢ່າງຖືກຕ້ອງ ແລະ ເປັນເອກະພາບ ໃນຂອບເຂດທົ່ວປະເທດ ໂດຍຮຽກຮ້ອງໃຫ້ຜູ້ແທນກອງປະຊຸມ ຈົ່ງພ້ອມກັນແລກປ່ຽນຄຳເຫັນ ຢ່າງເລິກເຊິ່ງ ເພື່ອສ້າງຄວາມຮັບຮູ້ທີ່ເປັນເອກະພາບກ່ຽວກັບການຕິດຕາມກວດກາທົ່ວໄປ ໂດຍສະເພາະກ່ຽວກັບ ການປະຕິບັດກົດໝາຍ ສະແດງອອກໃນຕົວຈິງ, ການຕິດຕາມກວດກາການປະຕິບັດກົດໝາຍ, ການຕິດຕາມກວດກາການອອກນິຕິກໍາ, ການປ້ອງກັນອາຊະຍາກໍາ, ການຕິດຕາມກວດກາການປະຕິບັດຄໍາຕັດສິນຂອງສານ ແລະ ການຕິດຕາມກວດກາການດໍາເນີນຄະດີປົກຄອງ ແລະ ບົດຮຽນຂອງຕ່າງປະເທດຈໍານວນໜຶ່ງ.
ທັງນີ້, ກໍເພື່ອແນໃສ່ ຍົກສູງການຕິດຕາມກວດກາທົ່ວໄປ ຂອງອົງການໄອຍະການປະຊາຊົນ ຢູ່ ສປປ ລາວ ໃຫ້ມີບາດກ້າວອັນໃໝ່ທີ່ໜັກແໜ້ນ ເພື່ອຍົກສູງສະຕິເຄົາລົບ ແລະ ປະຕິບັດກົດໝາຍ, ສ້າງກົນໄກປະສານງານ ກ່ຽວກັບການຕິດຕາມກວດກາທົ່ວໄປ ໃຫ້ມີບາດກ້າວໃໝ່ ອັນໜັກແໜ້ນ, ໄດ້ຮັບຜົນດີ, ຍົກສູງຄຸນນະພາບ ຂອງການຕິດຕາມກວດກາ ຂອງອົງການໄອຍະການປະຊາຊົນ ໃນຕໍ່ໜ້າ ຢ່າງມີປະສິດທິຜົນ, ເຮັດໃຫ້ສັງຄົມມີ ຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ສ້າງເງື່ອນໄຂໃຫ້ປະຊາຊົນ ໄດ້ທໍາມາຫາກິນ, ດໍາລົງຊີວິດຢ່າງຜາສຸກ, ປະກອບສ່ວນສໍາຄັນ ເຂົ້າໃນການພັດທະນາເສດຖະກິດ-ສັງຄົມ ຂອງປະເທດ ຂະຫຍາຍຕົວ ແລະ ຈະເລີນຮຸ່ງເຮືອງ ຢ່າງບໍ່ຢຸດຢັ້ງ ຕາມທິດສັງຄົມນິຍົມ.
ຂ່າວ-ພາບ: ໄອຍະການ
