ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກະຊວງພະລັງງານ ແລະ ບໍ່ແຮ່ ຮ່ວມກັບ ພະແນກພະລັງງານ ແລະ ບໍ່ແຮ່ ແຂວງໄຊສົມບູນ ຈັດຝຶກອົບຮົມກ່ຽວກັບ ພາກທິດສະດີ, ເຜີຍແຜ່ບັນດານິຕິກຳ, ລະບຽບການ ແລະ ມາດຕະການ ໃນການຄຸ້ມຄອງຄວາມປອດໄພຂອງເຂື່ອນ ໃຫ້ພະນັກງານ ຂະແໜງພະລັງງານ ແລະ ບໍ່ແຮ່ ໃນວັນທີ 9 ກໍລະກົດ 2024 ທີ່ແຂວງໄຊສົມບູນ ໂດຍການເປັນປະທານຂອງທ່ານ ພູທະນູທອງ ໄຊສົມບັດ ຮອງຫົວໜ້າກົມຄຸ້ມຄອງຄວາມປອດໄພອຸດສາຫະກຳພະລັງງານ.
ທ່ານ ພູທະນູທອງ ໄຊສົມບັດ ໄດ້ເນັ້ນໃຫ້ຜູ້ເຂົ້າຮ່ວມ ເອົາໃຈໃສ່ເປັນເຈົ້າການໃນການຄົ້ນຄວ້າ, ຝຶກອົບຮົມ ແລະ ຮຽນຮູ້ກ່ຽວກັບບັນດານິຕິກຳ ແລະ ຂັ້ນຕອນໃນການຈັດຕັ້ງປະຕິບັດ ໃນໄລຍະການອອກແບບ, ໄລຍະການກໍ່ສ້າງ ໃນວຽກງານຄຸ້ມຄອງຄວາມປອດໄພຂອງເຂື່ອນທົ່ວປະເທດ ເພື່ອຮັບປະກັນໃຫ້ບັນດາເນື້ອໃນ ຂອງວຽກງານທີ່ຈະນຳມາສະເໜີ, ຄົ້ນຄວ້າ, ປຶກສາຫາລື ຊອກຫາວິທີການທີ່ສອດຄ່ອງ ເພື່ອເປັນພື້ນຖານເຮັດໃຫ້ການຄຸ້ມຄອງຄວາມປອດໄພຂອງເຂື່ອນ ຢູ່ ສປປ ລາວ ໃນໄລຍະຕໍ່ໜ້າ ໃຫ້ມີຄວາມປອດໄພ, ມີຄຸນນະພາບ ແລະ ມີປະສິດທິຜົນສູງ.
ການຈັດຝຶກອົບຮົມຄັ້ງນີ້ ເພື່ອຮັບປະກັນການຈັດຕັ້ງປະຕິບັດວຽກງານຖືກຕ້ອງສອດຄ່ອງກັບກົດໝາຍ, ລະບຽບການ, ຂັ້ນຕອນທີ່ມາດຕະການເຕັກນິກໄຟຟ້າຂອງລາວກຳນົດໄວ້ ເພື່ອຮັບປະກັນການກໍ່ສ້າງ ສອດຄ່ອງກັບການອອກແບບທີ່ໄດ້ມີການຮັບຮອງ, ການຄຸ້ມຄອງຄຸນນະພາບຂອງການກໍ່ສ້າງ ຖືກຕ້ອງຕາມເຕັກນິກ, ຫລັກວິສະວະກຳຂອງລາວ ຫລື ສາກົນ ເພື່ອໃຫ້ການກໍ່ສ້າງໄດ້ມາດຕະຖານ, ໝັ້ນຄົງ ແລະ ປອດໄພ.
ທ່ານ ພູໄຊ ວຽງວິໄຊ ໄດ້ບັນລະຍາຍກ່ຽວກັບ ພາລະບົດບາດ ຂອງກົມຄຸ້ມຄອງຄວາມປອດໄພອຸດສາຫະກຳພະລັງງານ, ກົດໝາຍວ່າດ້ວຍຄວາມປອດໄພຂອງເຂື່ອນ ແລະ ການກວດກາຄວາມປອດໄພຂອງເຂື່ອນທົ່ວປະເທດ ພ້ອມທັງຮັບຟັງການບັນລະຍາຍ ກ່ຽວກັບການກວດກາຄວາມປອດໄພຂອງເຂື່ອນ ໃນໄລຍະການອອກແບບຕາມການຮັບຮອງ, ການຄຸ້ມຄອງຄຸນນະພາບຂອງການກໍ່ສ້າງ ຖືກຕ້ອງຕາມເຕັກນິກ, ຫລັກວິສະວະກຳຂອງລາວ ຫລື ສາກົນ ແລະ ຮັບຟັງການສະເໜີກ່ຽວກັບການກວດກາຄວາມປອດໄພຂອງເຂື່ອນ ໃນໄລຍະກໍ່ສ້າງ ແລະ ອື່ນໆ.
ຂ່າວ: ບັງອອນ ເພັດມະນີ