ເມື່ອບໍ່ດົນຜ່ານມາ ເມືອງຫົງສາ ແຂວງໄຊຍະບູລີ ເຊຶ່ອມຊຶມເອກະສານມະຕິທີ່ສໍາຄັນຂອງພັກ-ລັດ ຂຶ້ນຢູ່ທີ່ສະໂມສອນເມືອງ ໃຫ້ກຽດເຜີຍແຜ່ຂອງທ່ານ ພອນສະຫວັນ ໄຊສົມພັນ ກໍາມະການພັກແຂວງ ເຈົ້າເມືອງຫົງສາ.
ເອກະສານສຳຄັນທີ່ນຳມາເຜີຍແຜ່ໃນຄັ້ງນີ້ ປະກອບມີມະຕິຂອງກົມການເມືອງສູນກາງພັກ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ ສະບັບເລກທີ 04 ລົງວັນທີ 11 ເມສາ 2024 ມະຕິຂອງລັດຖະບານ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ ສະບັບເລກທີ 05 ລົງວັນທີ 21 ພຶດສະພາ 2024 ແລະ ຄໍາສັ່ງເລກທີ 01 ຂອງຄະນະປະຈຳພັກແຂວງໄຊຍະບູລີ ລົງວັນທີ 12 ມິຖຸນາ 2024 ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່ ຢູ່ແຂວງໄຊຍະບູລີ.
ຈຸດປະສົງຂອງການເຜີຍແຜ່ໃນຄັ້ງນີ້ ເພື່ອເຮັດໃຫ້ບັນດາຄະນະພັກແຕ່ລະຂັ້ນ ແລະ ຜູ້ເຂົ້າຮ່ວມໄດ້ຮັບຮູ້ເຂົ້າໃຈເຊຶ່ອມຊຶມກໍາແໜ້ນຢ່າງເລິກເຊິ່ງ ກ່ຽວກັບການສ້າງເສດຖະກິດເອກະລາດເປັນເຈົ້າຕົນເອງ ຄວາມເປັນເຈົ້າໃນການປະຕິບັດພັນທະໜ້າທີ່ຂອງແຕ່ລະພາກສ່ວນຢ່າງທົ່ວເຖິງ ເປັນການສ້າງບາດກ້າວບຸກທະລຸໃນການພັດທະນາ ຮັບປະກັນໃຫ້ແກ່ການເຕີບໂຕທາງດ້ານເສດຖະກິດ ດ້ວຍຈັງຫວະທີ່ໝັ້ນທ່ຽງ ແລະ ຕໍ່ເນື່ອງ ຮັບປະກັນການພັດທະນາແບບຢືນຍົງ ຕາມທິດສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່ ເຊິ່ງຈະເປັນເງື່ອນໄຂພື້ນຖານຮັບປະກັນການແກ້ໄຂຄວາມຫຍຸ້ງຍາກ ທາງດ້ານ ເສດຖະກິດ-ການເງິນ ຄື: ການພັດທະນາເສດຖະກິດຕະຫຼາດຕາມທິດສັງຄົມນິຍົມ ຢູ່ປະ ເທດເຮົາໃຫ້ນັບມື້ເປັນຮູບປະທໍາດີຂຶ້ນເປັນກ້າວໆ ດ້ວຍຈິດໃຈບຸກທະລຸຍົກສູງຄວາມຮັບຜິດຊອບຂອງຄະນະພັກແຕ່ລະຂັ້ນ ສ້າງຄວາມຢູ່ດີກິນດີໃຫ້ປະຊາຊົນພາຍໃນແຂວງ ເຮັດໃຫ້ແຂວງ ເມືອງມີສະຖຽນລະພາບທາງດ້ານການເມືອງ ແລະ ສັງຄົມມີຄວາມສະຫງົບໂດຍພື້ນຖານ ບົນພື້ນຖານຄວາມຮັບຮູ້ເຂົ້າໃຈເພື່ອແນ່ໃສ່ການແກ້ໄຂບັນຫາຕົວຈິງຂອງພັກ ຂອງຊາດ ໃຫ້ມີການຫັນປ່ຽນຢ່າງຈະແຈ້ງແຂງແຮງກວ່າເກົ່າ ເພື່ອສ້າງຄວາມເຊື່ອໝັ້ນຢ່າງໜັກແໜ້ນຕໍ່ການນໍາພາຂອງພັກ ການຄຸ້ມຄອງບໍລິຫານຂອງລັດ ໃນການສຶບຕໍ່ນໍາພາປະເທດຊາດໃຫ້ຫຼຸດພົ້ນອອກຈາກຄວາມຫຍຸ້ງຍາກ ທາງດ້ານເສດຖະກິດ-ການເງິນ ພ້ອມນີ້ ມອບໃຫ້ຄະນະພັກ ຄະນະນໍາທຸກຂັ້ນ ເປັນເຈົ້າການໃນການນໍາພາ-ຊີ້ນໍາ ໃນການນໍາເອົາເນື້ອໃນຈິດໃຈຂອງການເຜີຍແຜ່ເຊື່ອມຊຶມຄັ້ງນີ້ ໄປຈັດຕັ້ງເຊື່ອມຊຶມ ແລະ ຫັນເປັນອັນລະອຽດຕາມຂອບເຂດຄວາມຮັບຜິດຊອບຂອງຕົນ ໃຫ້ເກີດໝາກຜົນຕົວຈິງ.
ຂ່າວ-ພາບ: ກິດຕິສັກ ບົວໄລ
