ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສໍາມະນາຂອງຊາວໜຸ່ມກະຊວງການຕ່າງປະເທດ ກ່ຽວກັບ ບັນຫາພົ້ນເດັ່ນຂອງພາກພື້ນ ແລະ ສາກົນ

ວັນທີ 28 ສິງຫາ 2020 ຄະນະບໍລິຫານງານຊາວໜຸ່ມກະຊວງການຕ່າງປະເທດ ໄດ້ຈັດຕັ້ງກອງປະຊຸມສໍາມະນາວິທະຍາສາດ ກ່ຽວກັບ ບັນຫາພົ້ນເດັ່ນຂອງພາກພື້ນ ແລະ ສາກົນ ພາຍໃຕ້ການເປັນປະທານຂອງ ທ່ານ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນໍາວຽກງານ 3 ອົງການຈັດຕັ້ງມະຫາຊົນຂອງກະຊວງການຕ່າງປະເທດ, ມີຊາວຫນຸ່ມຈາກພາກສ່ວນຕ່າງໆ ເຂົ້າຮ່ວມຫຼາຍກວ່າ 300 ທ່ານ.
ຈຸດປະສົງຂອງກອງປະຊຸມສໍາມະນາດັ່ງກ່າວ ເພື່ອເປັນການສ້າງໂອກາດໃຫ້ແກ່ຊາວໜຸ່ມຂອງກະຊວງການຕ່າງປະເທດ ກໍຄື ນັກການທູດໜຸ່ມນ້ອຍ ໄດ້ແລກປ່ຽນທັດສະນະ ແລະ ຂໍ້ມູນຂ່າວສານຮ່ວມກັນ ຊຶ່ງໄດ້ຈັດໃນຮູບແບບຂອງເວທີໃນການປຶກສາຫາລື ໂດຍມີວິທະຍາກອນຈາກບັນດາໜ່ວຍຊາວໜຸ່ມກົມທີ່ກ່ຽວຂ້ອງຂອງກະຊວງການຕ່າງປະເທດ ຂຶ້ນນໍາສະເໜີບົດໃນຫົວຂໍ້ຕ່າງໆ ທີ່ເປັນບັນຫາພົ້ນເດັ່ນຂອງພາກພື້ນ ແລະ ສາກົນ. ທັງນີ້, ກໍເພື່ອແນ່ໃສ່ໃນການເສີມສ້າງຄວາມຮູ້ຄວາມສາມາດ ແລະ ພັດທະນາທັກສະໃນການວິເຄາະວິໄຈບັນຫາໃຫ້ມີິຄວາມເລິກເຊິ່ງ, ຮອບດ້ານ ແລະ ເປັນການເສີມສ້າງຄວາມກ້າຫານ ໃນການສະແດງຄວາມຄິດເຫັນ. ຄຽງຄູ່ກັນນັ້ນ, ກໍເປັນການປະກອບສ່ວນໃນການຍົກລະດັບຄວາມຮູ້ຄວາມສາມາດຂອງບຸກຄະລາກອນ ກໍຄືຊາວໜຸ່ມ ທີ່ຈະກາຍມາເປັນພະນັກງານສືບທອດຂອງກະຊວງການຕ່າງປະເທດ ໃນຕໍ່ໜ້າ. ນອກນັ້ນ, ທ່ານປະທານ ກໍຍັງໄດ້ຍົກໃຫ້ເຫັນຜົນສໍາເລັດ ແລະ ຄວາມສໍາຄັນຂອງການເຄື່ອນ ໄຫວວຽກງານການຕ່າງປະເທດ ຕາມແນວທາງ ແລະ ນະໂຍບາຍຂອງພັກ ແລະ ລັດຖະບານໃນໄລຍະໃໝ່ ເພື່ອແນ່ໃສ່ໃນການສ້າງເງື່ອນໄຂ ແລະ ສະພາບແວດລ້ອມທີ່ເອື້ອອໍານວຍ ໃຫ້ແກ່ການປົກປັກຮັກສາ ແລະ ສ້າງສາປະເທດຊາດ. ກອງປະຊຸມສໍາມະນາໃນຄັ້ງນີ້ ໄດ້ດໍາເນີນໄປພາຍໃຕ້ບັນຍາກາດອັນຟົດຟື້ນ ແລະ ໄດ້ຮັບໝາກຜົນເປັນຢ່າງດີ, ຜູ້ເຂົ້າຮ່ວມມີຄວາມສົນໃຈຮັບຟັງການບັນລະຍາຍ ແລະ ແລກປ່ຽນຄໍາຄິດຄໍາເຫັນກັນຢ່າງຕັ້ງໜ້າ.

Cr: ກົມການຂ່າວ, ກະຊວງການຕ່າງປະເທດ