ກົມຊັບສິນທາງປັນຍາ ຮ່ວມກັບ ອົງການຊັບສິນທາງປັນຍາໂລກ ແລະ ສະໜັບສະໜູນໂດຍ ສໍານັກງານລິຂະສິດຂອງປະເທດຍີ່ປຸ່ນ (JCO) ໄດ້ຈັດ ກອງປະຊຸມ ສໍາມະນາ ໃຫ້ຄໍາປຶກສາ ກ່ຽວກັບການຄຸ້ມຄອງລິຂະສິດແບບລວມໝູ່ ໃນວັນທີ 23 ກໍລະກົດ 2024 ທີ່ ໂຮງແຮມ ລາວເທວ. ທ່ານ ໄຊສົມເພັດ ນໍລະສິງ ໄດ້ກ່າວວ່າ: ຈຸດປະສົງເພື່ອເສີມສ້າງຄວາມຮູ້ ແລະ ຄວາມເຂົ້າໃຈ ຕໍ່ກັບວຽກງານການຄຸ້ມຄອງລິຂະສິດແບບລວມໝູ່, ເຊິ່ງການຈັດຕັ້ງລິຂະສິດແບບລວມໝູ່ ແມ່ນອົງກອນໜຶ່ງ ເຄື່ອນໄຫວພາຍໃຕ້ການອະນຸຍາດຕາມລະບຽບການຄຸ້ມຄອງ ຂອງກະຊວງ ອຄ, ສ້າງຕັ້ງຂຶ້ນຕາມການຕົກລົງເຫັນດີຂອງບັນດາຜູ້ປະດິດຄິດແຕ່ງ, ເຈົ້າຂອງລິຂະສິດ, ເຈົ້້າຂອງສິດກ່ຽວຂ້ອງກັບລິຂະສິດ ເຊັ່ນ ນັກປະພັນ, ຜູ້ຖືສິດ, ນັກສະແດງ, ຜູ້ບັນທຶກສຽງ ແລະ ອົງການກະຈາຍສຽງ-ແຜ່ພາບ, ດໍາເນີນການເຄື່ອນໄຫວເພື່ອຄຸ້ມຄອງ ແລະ ປົກປ້ອງສິດຜົນປະໂຫຍດຂອງເຈົ້າຂອງລິຂະສິດ ແລະ ສິດກ່ຽວຂ້ອງກັບລິຂະສິດ, ໂດຍສະພາະ ການເຈລະຈາການໃຫ້ອະນຸຍາດນໍາໃຊ້, ການເກັບຄ່າຕອບແທນໃນນາມເຈົ້າຂອງລິຂະສິດ ແລະ ສິດກ່ຽວຂ້ອງກັບລິຂະສິດ, ແບ່ງປັນ ແລະ ແຈກຢາຍຄ່າລິຂະສິດ ແລະ ຄ່າຕອບແທນ ລວມທັງຜົນປະໂຫຍດອື່ນໆ ທີ່ໄດ້ຈາກການອະນຸຍາດນໍາໃຊ້ຜົນງານລິຂະສິດ ແລະ ດໍາເນີນການແກ້ໄຂຂໍ້ຂັດແຍ່ງ ຕາມການມອບໝາຍຂອງເຈົ້າຂອງສິດ ຫຼື ຜູ້ຖືສິດ ໃນຜົນງານລິຂະສິດ ໃນກໍລະນີມີການຮ້ອງຟ້ອງ ຫຼື ລະເມີດລິຂະສິດ.
ທ່ານ ກ່າວຕື່ມອີກວ່າ: ສະພາບ ສປປ ລາວ ເຮົາ ມີການເຕີບໃຫຍ່ຂະຫຍາຍຕົວຂອງອຸດສາຫະກາດົນຕຼີ ຢ່າງຫຼວງຫຼາຍ ຕົວຢ່າງບົດເພງດັງໆ ປາຄໍ່ໃຫຍ່ ສາວແຫຼ້ບ້ານນາ, ໃສ່ໃຈໄດ້ແຕ່ມອງ ທີ່ມີຊື່ສຽງໂດ່ງດັງໃນທົ່ວສັງຄົມ ອັນນີ້ແມ່ນຫົວຄິດປະດິດແຕ່ງຂອງຄົນລາວ ແມ່ນຊັບສິນທາງປັນຍາ ທີ່ພາກລັດຕ້ອງໃຫ້ການປົກປ້ອງ ແລະ ຊ່ວຍໃຫ້ເຈົ້າຂອງລິຂະສິດໄດ້ນຳໃຊ້ສິດຂອງຕົນຢ່າງເຕັມທີ່ ທັງສິດທາງດ້ານເສດຖະກິດ ແລະ ສິດວາລິຍະທຳ. ເພື່ອເກັບລາຍຮັບຈາກລິຂະສິດ ມັນຈຳເປັນຕ້ອງມີໜ່ວຍງານຕາງໜ້າໃຫ້ເຈົ້າຂອງລິຂະສິດ ທີ່ເອີ້ນວ່າ ອົງການລິຂະສິດແບບລວມໝູ່ Collective management organization (CMO) ທີ່ໄດ້ຮັບການຈົດທະບຽນ ແລະ ຮັບຮອງເປັນທາງການຈາກລັດຖະບານກໍຄື ກະຊວງ ອຄ ຕໍ່ວຽກງານດັ່ງກ່າວ ກົມຊັບສິນທາງປັນຍາ ໄດ້ກຳນົດນິຕິກຳ ແລະ ລະບຽບການຄຸ້ມຄອງ ກໍຄື ກົດໝາຍຊັບສິນທາງປັນຍາ ສະບັບປັບປຸງ 2023 ສຳເລັດ ແລະ ຮັບຮອງຈາກສະພາໃນວັນທີ 20 ທັນວາ 2023, ກົດໝາຍສະບັບນີ້ ກໍໄດ້ກໍານົດສິດໜ້າທີ່
ແລະ ພາລະບົດບາດ ຂອງການຈັດຕັ້ງລິຂະສິດແບບລວມໝູ່ ສ່ວນຂໍ້ຕົກລົງຂອງ ກະຊວງ ອຄ ປັດຈຸບັນ ກົມພວກເຮົາກຳລັງຮ່າງຂໍ້ຕົກລົງເພື່ອຮັບຮອງ ແລະ ສ້າງຕັ້ງ CMO.
ໃນຂະນະທີ່ ວຽກງານການຄຸ້ມຄອງ ແລະ ປົກປ້ອງລິຂະສິດ ໄດ້ເລີ້ມຕົ້ນ ນັບແຕ່ປີ 2009 ເປັນຕົ້ນມາ, ມາຮອດປັດຈຸບັນໄດ້ປົກປ້ອງການຂໍແຈ້ງຂໍ້ມູນລິຂະສິດປະມານ 828 ຜົນງານ, ທີ່ຕິດພັນກັບຂົງເຂດສິລະປະກຳ ແລະ ວັນນະກຳ.
ກອງປະຊຸມສຳມະນາຄັ້ງນີ້ ຜູ້ເຂົ້ຮ່ວມຈະໄດ້ຮັບຟັງການຖ່າຍທອດຄວາມຮູ້ ແລະ ແລກປ່ຽນບົດຮຽນອັນລໍ້າຄ່າ ຈາກນັກວິທະຍາກອນທັງພາຍໃນ ແລະ ຕ່າງປະເທດ ເຫັນວ່າ ມີຫຼາຍຫົວຂໍ້ທີ່ສໍາຄັນ ແລະ ເປັນປະໂຫຍດຫຼາຍ ໃຫ້ແກ່ຜູ່ເຂົ້າຮ່ວມໄດ້ຮຽນຮູ້ ແລະ ເຂົ້າໃຈຢ່າງເລິກເຊິ່ງຕໍ່ກັບບົດບາດ ແລະ ຄວາມສຳຄັນຂອງວຽກງານລິຂະສິດ ແລະ ການຄຸ້ມຄອງລິຂະສິດແບບລວມໝູ່ ໃນການປົກປ້ອງສິດຜົນປະໂຫຍດໃຫ້ແກ່ເຈົ້າຂອງລິຂະສິດ ຫຼື ຜູ້ຖືສິດ ແລະ ຕໍ່ການພັດທະນາເສດຖະກິດ-ສັງຄົມ-ວັດທະນາທຳ.
ຂ່າວ- ຮູບ: ພຸດຕີ້
ເສດຖະກິດ-ການຄ້າ
