ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສະຫະພັນຄວບຄຸມຢາສູບອາຊຽນ ຮ່ວມກັບມູນນິທິປຸກລະດົມ ເພື່ອການບໍ່ສູບຢາ ປະຈຳປະເທດໄທ ຈັດກອງປະຊຸມສໍາມະນາໃຫ້ ສື່ມວນຊົນລາວ ເພື່ອສ້າງຄວາມເຂັ້ມແຂງກ່ຽວກັບວຽກງານຄວບຄຸມຢາສູບ ໃນ ສປປ ລາວຈັດ ຂຶ້ນໃນລະຫວ່າງວັນທີ 19-20 ທັນວານີ້, ທີ່ ໂຮງແຮມປະຈັກຕຣາ ແຂວງອຸດອນທານີ ປະເທດໄທ ໂດຍເປັນກຽດເຂົ້າຮ່ວມຂອງທ່ານ ນາງ ຄັດທະນະພອນ ພັນດວງສີ ຮອງຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ ສປປ ລາວ, ມີ ທ່ານ ນາງ ບັງອອນ ຣິດທິພັກດີ ທີ່ປຶກສາກິດຕິມະສັກສະຫະພັນຄວບຄຸມຢາສູບອາຊຽນ ປະເທດໄທ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ບັງອອນ ຣິດທິພັກດີ ກ່າວວ່າ: ການຈັດສໍາມະນາໃນຄັ້ງນີ້ຂຶ້ນມີຄວາມໝາຍ-ຄວາມສຳຄັນຫຼາຍ ເພື່ອໃຫ້ສື່ມວນຊົນລາວ ໄດ້ແລກປ່ຽນບົດຮຽນກ່ຽວກັບວຽກງານການຄວບຄຸມຢາສູບ, ຄວາມອັນຕະລາຍຂອງຢາສູບທຳມະດາ ແລະ ຢາສູບໄຟຟ້າ ຊຶ່ງເປັນວຽກງານໜຶ່ງສຳຄັນຫຼາຍ ໃນປັດຈຸບັນ ແລະ ເຊື່ອວ່າ ຂໍ້ມູນໃໝ່ໆທີ່ໄດ້ຮັບໃນຄັ້ງນີ້ຈະເປັນປະໂຫຍດຕໍ່ ສປປ ລາວ ກໍຄືສື່ມວນຊົນລາວ ເນື່ອງຈາກວ່າ ສປປ ລາວ ກໍໄດ້ຫ້າມຊື້-ຂາຍ ຢາສູບໄຟຟ້າຄືກັນກັບປະເທດໄທ. ປັດຈຸບັນຢາສູບໄຟຟ້າຍັງມີການລັກລອບຊື້-ຂາຍ ແລະ ມີການນຳໃຊ້ເປັນຈຳນວນຫຼາຍໃນກຸ່ມເດັກນ້ອຍ, ໄວໜຸ່ມ. ສະນັ້ນ, ສື່ມວນຊົນລາວຕ້ອງໄດ້ເຂົ້າມາມີບົດບາດໃນວຽກງານດັ່ງກ່າວນີ້ ເພື່ອເຜີຍແຜ່ຂໍ້ມູນທີ່ຖືກຕ້ອງ, ຊັດເຈນ ແລະ ວ່ອງໄວທັນກັບສະຖານະການ ແລະ ສາມາດຊ່ວຍໃຫ້ສັງຄົມໄດ້-ຮັບຮູ້ ເຂົ້າໃຈກ່ຽວກັບບັນຫາຕ່າງໆກ່ຽວກັບຢາສູບ. ພ້ອມນັ້ນຕ້ອງໄດ້ມີການບັງຄັບໃຊ້ກົດໝາຍ, ບັງຄັບໃຊ້ນະໂຍບາຍທີ່ໄດ້ກຳນົດອອກມາຢ່າງຈິງຈັງ, ຖ້າຫາກເດັກນ້ອຍ ສູບຢາໄຟຟ້າແລ້ວຈະພາໃຫ້ຕິດງ່າຍ, ຕິດແລ້ວຈະເລີກຍາກ. ນອກນັ້ນ, ຢາສູບໄຟຟ້າຍັງພາໃຫ້ຜູ້ສູບເກີດມີການເຈັບປ່ວຍເປັນໂລກພະຍາດຕ່າງໆ, ປັດຈຸບັນຢາສູບໄຟຟ້າຍັງມີຮູບແບບໃໝ່ໆຫຼາຍຊະນິດ. ສະນັ້ນສື່ມວນຊົນລາວຕ້ອງເປັນຜູ້ເຮັດໜ້າທີເຝົ້າລະວັງໃນການເຕືອນ, ໃຫ້ຂໍ້ມູນທີ່ຖືກຕ້ອງໃນການສົ່ງເສີມ, ໂຄສະນາໃຫ້ສັງຄົມ ທັງປຸກລະດົມພ້ອມປົກປ້ອງເດັກນ້ອຍໃນບັນຫາດັ່ງກ່າວ, ຖ້າດັ່ງນັ້ນຈະເຮັດໃຫ້ເດັກຕິດຢາສູບໄຟຟ້າເປັນຈຳນວນຫຼາຍ ແລະ ຈະແກ້ໄຂລຳບາກໃນອະນາຄົດ.