ເນື່ອງຈາກເຫດການຝົນຕົກໜັກຕິດຕໍ່ກັນຫຼາຍວັນ, ເຮັດໃຫ້ນໍ້າໄຫຼຊຸ, ດິນເຈື່ອນ ແລະ ໄດ້ມີເສົາໄຟຟ້າຫັກ 2 ຕົ້ນ ຢູ່ບ້ານນາແມດ ເມືອງແບງ ໃນເດືອນ ກັນຍາ 2024. ມາໃນວັນທີ່ 14 ກັນຍາ 2024 ນີ້ ສູນບໍລິການໄຟຟ້າລາວ ປະຈໍາເມືອງແບງ ແຂວງອຸດົມໄຊ ໄດ້ເກັບກູ້ລະບົບຕາຄ່າຍຈາກເສົາໄຟຟ້າລົ້ມໃນຄໍ່າຄືນຂອງວັນທີ 13 ກັນຍາ ຜ່ານມາ. ປັດຈຸບັນສາມາດສ້ອມແປງພາກແຮງກາງ 22 ກິໂລໂວນ ສໍາເລັດ 100% ແລະ ປ່ອຍໄຟຄືນປົກກະຕິ. ໃນກໍລະນີເກີດຈາກ ປັດໃຈພາຍນອກກະທົບໃສ່ລະບົບຂອງໄຟຟ້າລາວ ໂດຍສະເພາະເຫດການໄພພິບັດທາງທຳມະຊາດ ເຊັ່ນ: ພາຍຸ, ລົມແຮງ, ຝົນຕົກ, ຟ້າຜ່າ, ນໍ້າຖ້ວມ, ຕົ້ນໄມ້ຫັກລົ້ມທັບສາຍໄຟ, ສາຍໄຟຂາດ ຕໍ່ກັບບັນຫາເຫຼົ່ານີ້ ໄຟຟ້າລາວບໍ່ສາມາດຫຼີກລ່ຽງໄດ້ ທຸກບັນຫາທີ່ເກີດຂຶ້ນ ແມ່ນສ້າງຄວາມເສຍຫາຍ, ຜົນກະທົບຕໍ່ກັບໄຟຟ້າລາວ ແລະ ຜູ້ຊົມໃຊ້ໄຟຟ້າ.
ສະນັ້ນ, ຕໍ່ກັບເຫດການທີ່ເກີດຂຶ້ນໃນໄລຍະຜ່ານມາ ໃນນາມຄະນະພັກ, ຄະນະນໍາຜູ້ບໍລິຫານລັດວິສາຫະກິດໄຟຟ້າລາວ ພ້ອມດ້ວຍ ອ້າຍນ້ອງພະນັກງານລັດວິສາຫະກິດໄຟຟ້າ ຂໍຮຽກຮ້ອງມາຍັງ ສັງຄົມ ຖ້າພົບເຫັນເຫດການໄຟຕົກ-ໄຟມອດ, ເຫດການໄຟຟ້າຂັດຂ້ອງຕ່າງໆ ຫຼື ປະກົດການຄົນລັກສາຍໄຟ, ສາມາດແຈ້ງສູນບໍລິການໃກ້ບ້ານທ່ານ ຫຼື ຜ່ານສາຍດ່ວນ 081 212443 ເພື່ອເຮັດໃຫ້ໄຟຟ້າລາວ ສາມາດແກ້ໄຂບັນຫາໄດ້ຢ່າງທັນການ.
ຂໍ້ມູນ : ຟຟລ ໜ່ວຍບໍລິການເມືອງແບງ
