ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສໍາເລັດຊຸດອົບຮົມລະບາດວິທະຍາພາກສະໜາມ ຊຸດທີ 11

ຕອນບ່າຍວັນທີ 29 ພຶດສະພາ 2020, ທີ່ໂຮງແຮມຄຼາວພາຊາ ນະຄອນຫລວງວຽງຈັນ, ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຮ່ວມກັບສູນຄວບຄຸມພະຍາດຕິດຕໍ່ ສະຫະລັດອາເມຣິກາ ແລະອົງການອະນາໄມໂລກປະຈໍາລາວ ຈັດພິທີມອບ-ຮັບໃບຢັ້ງຢືນໃຫ້ນັກສຶກສາ ທີ່ສໍາເລັດການອົບຮົມຫລັກສູດລະບາດວິທະຍາ ຊຸດທີ 11ຂອງ ສປປ ລາວ.

ເຂົ້າຮ່ວມໃນພິທີມີ ດຣ.ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ດຣ. ປີເຕີ ເຮມອນ ເອກອັກຄະລັດຖະທູດສະຫະລັດອາເມຣິກາປະຈໍາ ສປປ ລາວ, ດຣ.ໂຮວາດ ໂຊເບວ ຜູ້ແທນອົງການອະນາໄມໂລກປະຈໍາພາກພື້ນອາຊີຕາເວັນອອກສຽງໃຕ້ ແລະພາກສ່ວນກ່ຽວຂ້ອງ.

​ ຊຸດອົບຮົມຄັ້ງນີ້ ມີນັກສຶກສາວິຊາການແພດທົ່ວປະເທດຈໍານວນ 86 ຄົນ, ໃນນັ້ນຈາກສູນກາງຈໍານວນ 30ຄົນ, ຂັ້ນແຂວງ 43 ຄົນ, ແລະຂັ້ນເມືອງ13ຄົນ,  ​​ເພື່ອ​ຕອບ​ສະ​ໜອງ​ຕາມ​ຄວາມ​ຮຽກ​ຮ້ອງ​ຕ້ອງ​ການ​ຂອງວຽກ​ງານ​ສາ​ທາ​ລະ​ນະ​ສຸກ​ໃນ​ການ​ພັດ​ທະ​ນາ​ຄວາມ​ອາດ​ສາ​ມາດ​ທາງ​ດ້ານ​ລະ​ບາດ​ວິ​ທະ​ຍາ ໃຫ້​ພະ​ນັກ​ງານ​ຜູ້​ທີ່​ຮັບ​ຜິດ​ຊອບ​ວຽກ​ງານ​ປ້ອງ​ກັນ ແລະ ຄວບ​ຄຸມ​ພະ​ຍາດ ແຕ່​ສູນ​ກາງ​ລົງ​ຮອດ​ທ້ອງ​ຖິ່ນ, ໃຫ້​ມີ​ບົດ​ບາດໃນການ​ປະ​ກອບ​ສ່ວນ​ເຂົ້າ​ໃນ​ວຽກ​ງານ​ປ້ອງກັນ ແລະ ຄວບ​ຄຸມ​ພະ​ຍາດ​ຕິດ​ຕໍ່ ເຊັ່ນ: ເຂົ້າ​ຮ່ວມວຽກ​ງານ​ເຝົ້າ​ລະ​ວັງ, ສອບສວນການ​ລະ​ບາດ, ວິ​ເຄາະ​ຂໍ້​ມູນ ແລະ ຕອບ​ໂຕ້​ຕໍ່​ການ​ລະ​ບາດໃນທ້ອງຖິ່ນຂອງຕົນ. ໂຄງການນີ້ ເລີມດໍາເນີນມາແຕ່ ປີ 2009 ເພື່ອສະໜັບສະໜູນກະຊວງສາທາລະນະສຸກ ໃນການເພີ່ມຄວາມເຂັ້ມແຂງ ແລະ ສ້າງຄວາມສາມາດດ້ານລະບາດວິທະຍາພາກສະໜາມລະດັບຊາດກໍ່ຄືທົ່ວປະເທດ ໃນການຄົ້ນຫາ, ສອບສວນ ແລະ ຕອບໂຕ້ຕໍ່ພະຍາດຕິດຕໍ່ ຫຼື ພະຍາດຊຶມເຊື້ອທີ່ເກີດຂື້ນໃໝ່ ແລະເຫດການສຸກເສີນທາງດ້ານສາທາລະນະສຸກອື່ນໆທີ່ສອດຄ່ອງກັບຍຸດທະສາດສຳລັບພະຍາດຊຶມເຊື້ອທີ່ເກີດຂື້ນໃໝ່ໃນພາກພື້ນອາຊີ-ປາຊີຟິກ ແລະ ກົດລະບຽບສາທາລະນະສຸກສາກົນ (IHR 2005).

ຫຼັກສູດຝຶກອົບຮົມລະບາດວິທະຍາພາກສະໜາມ  ປະກອບມີພາກທິດສະດີ ແລະ ພາກປະຕິບັດຕົວຈິງ, ໃນນັ້ນລວມມີການສອບສວນການລະບາດຂອງພະຍາດຕິດຕໍ່ ຫຼື ເຫດການສຸກເສີນທາງດ້ານສາທາລະນະສຸກອື່ນ, ການທົບທວນຄືນສະພາບການເກີດຂອງພະຍາດ, ອາການພາຍໃຕ້ລະບົບເຝົ້າລະວັງ ແລະ ບົດຄົ້ນຄວ້າວິທະຍາສາດສາທາລະນະສຸກ ທີ່ສອດຄ່ອງກັບຄວາມຕ້ອງການຕົວຈິງໃນ ສປປ ລາວ.