ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສໍາເລັດ ກອງປະຊຸມໃຫຍ່ ຜູ່ແທນອົງຄະນະພັກ ເມືອງ ປາກລາຍ ຄັ້ງທີ VIII

ກອງປະຊຸມໃຫຍ່ຄັ້ງທີ VIII ຂອງຜູ່ແທນອົງຄະນະພັກ ເມືອງ ປາກລາຍ, ແຂວງ ໄຊຍະບູລີ ໄດ້ສໍາເລັດລົງຢ່າງເປັນທາງການ, ໃນຕອນບ່າຍຂອງວັນທີ 30 ທັນວາ 2019, ທີ່ຫ້ອງປະຊຸມໃຫຍ່ຂອງເມືອງດັ່ງກ່າວ, ພາຍຫຼັງທີ່ໄດ້ດໍາເນີນມາເປັນເວລາ 2 ວັນເຕັມ, ໂດຍການເປັນປະທານຂອງ ສະຫາຍ ສົມຈິດ ຈັນທະວົງ, ກໍາມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງ ປາກລາຍ, ເຂົ້າຮ່ວມເປັນກຽດມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ມີປະທານສະພາປະຊາຊົນແຂວງ, ມີຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງ ຊະນະຄາມ, ເມືອງ ແມດ, ແຂວງ ວຽງຈັນ ແລະ ເມືອງອ້ອມຂ້າງເຂົ້າຮ່ວມ.

ກອງປະຊຸມຄັ້ງນີ້ບັນດາຜູ່ແທນແມ່ນໄດ້ພ້ອມກັນ ທົບທວນຄືນຜົນງານ ແລະ ໄຊຊະນະທີ່ຍາດມາໄດ້, ຈຸດອ່ອນຂໍ້ຄົງຄ້າງ ແລະ ສະຫຼຸບຖອດຖອນບົດຮຽນ, ຄົ້ນຄວ້າ ແລະ ເປັນເອກະພາບກັນຮັບຮອງເອົາບົດລາຍງານການເມືອງ, ແຜນ​ພັດທະນາ​ເສດຖະກິດ-ສັງຄົມ, ບົດ​ສໍາ​ຫຼວດການ​ນໍາພາ​ລວມ ແລະ ທິດທາງແຜນການ 5 ປີ 2020-2024, ໂດຍສູ້ຊົນ​ເຮັດໃຫ້ເສດຖະກິດຂະຫຍາຍຕົວດ້ວຍຈັງຫວະໄວ ແລະ ຕໍ່ເນື່ອງ ໃນລະດັບ 9,5% ຕໍ່ປີ, ລວມຍອດ​ລາຍຮັບໃຫ້​ບັນລຸ 2.669 ຕື້​ກີບ, ສະເລ່ຍຫົວຄົນໜຶ່ງ​ໃຫ້​​ໄດ້ 4.000 ໂດລາຕໍ່ຄົນຕໍ່ປີ, ​ໂຄງ​ປະກອບ​ເສດຖະກິດ​ໃຫ້ມີ​ການ​ຫັນປ່ຽນ​ຢ່າງ​ຕັ້ງໜ້າ​ຕາມ​ທິດ​ຫັນ​ເປັນ​ອຸດ​ສາ​ຫະກໍາ​ ​ແລະ ​ທັນ​ສະ​ໄໝ​ເທື່ອ​ລະ​ກ້າວ, ສຸມໃສ່ຜະລິດສະບຽງອາຫານ ແລະ ຜະລິດເປັນສີນຄ້າ ໂດຍການດືງດູດການລົງທືນຈາກພາຍໃນ ແລະ ຕ່າງປະເທດ, ພັດທະນາພື້ນຖານໂຄງລ່າງ ແລະ ສ້າງເງື່ອນໄຂອໍານວຍຄວາມສະດວກ ແກ່ການຜະລິດ, ການ​ທ່ອງ​ທ່ຽວ ຕາມທິດສີຂຽວ-ຍືນຍົງ, ສືບຕໍ່ຫັນ​ລົງ​ກໍ່ສ້າງຮາກຖານການເມືອງ, ສ້າງບ້ານພັດທະນາ​ໃຫ້​ກາຍ​​ເປັນ​ຕົວ​ເມືອງ​ນ້ອຍ​ໃນ​ຊົນ​ນະ​ບົດ, ປັບປຸງ​ຄຸນ​ນະພາ​ບດ້ານ​ການ​ສຶກສາ​ໃຫ້​ດີ​ຂື້ນ, ຮັບປະກັນ​ໃຫ້​ເດັກ​ໃນ​ເກນ​ອາຍຸ​ໄດ້​ເຂົ້າ​ຮຽນ​ຢ່າງ​ທົ່ວ​ເຖິງ, ຍົກລະດັບການບໍລິການດ້ານສາທາລະນະສຸກ​ໃຫ້​ມີ​ຄຸນ​ນະ​ພາບ, ສົ່ງເສີມວັດທະນະທໍາທີ່ເປັນເອກະລັກຂອງ​ຊາດ, ຂອງ​ທ້ອງ​ຖິ່ນໃຫ້​ຍືນ​ຍົງ, ຊຸກຍູ້ສົ່ງ​ເສີມ​ການ​ທ່ອງ​ທ່ຽວ​ໃຫ້ມີປະສິດ​ທິຜົນ, ປັບ​ປຸງລະບົບ​ການຈັດ​ຕັ້ງ​ໃຫ້ມີ​ຄວາມ​ໜັກ​ແໜ້ນ ​ເຂັ້ມ​ແຂງ, ສູ້​ຊົນ​ສ້າງໜ່ວຍ​ພັກ​ປອດ​ໃສ, ​ເຂັ້ມ​ແຂງ ​ແລະ ໜັກ​ແໜ້ນ​ໃຫ້​ໄດ້ 80% ແລະ ຂະຫຍາຍ​ສະມາຊິກ​ພັກ​ໃໝ່​ໃຫ້​​ເພີ່ມ​ຂື້ນ 20%, ກອງ​ປະຊຸມ​ໄດ້​ຟັງ​ການ​ປະກອບ​ຄໍາ​ເຫັນ​ຈາກ​ຜູ້ຕາງໜ້າ​ຫຼາຍ​ພາກສ່ວນ ແລະ ຄອບຄົວຕົວແບບແຕ່ລະດ້ານພາຍໃນເມືອງ, ​ເຊິ່ງສ່ວນ​ຫຼາຍ​ໄດ້​ລົງ​ເລິກ​ລາຍ​ງານ​ຜົນ​ສໍາ​ເລັດ​ແຫ່ງ​ການ​ຜັນ​ຂະຫຍາຍ ​ແລະ ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ຄັ້ງທີ VII ​ເຂົ້າ​ໃນ​ແຕ່ລະ​ຂົງ​ເຂດ​ວຽກ​ງານ​ກົມ​ກອງ, ຂະ​ແໜງ​ການ​ຂອງ​ຕົນ​ເອງ, ​ອັນໄດ້​ເຮັດ​ໃຫ້​ກອງ​ປະຊຸມ​ມີ​ເນື້ອ​ໃນ​ສົມບູນຄົບຖ້ວນ​ ແລະ ​ໄດ້ດໍາເນີນການປ່ອນບ​ບັດ​ຄັດ​ເລືອກ​ເອົາ​ຄະນະ​ບໍລິຫານ​ງານ​ພັກ​ເມືອງ​ຊຸດ​ທີ VIII ເຊິ່ງມີຜູ້ຮັບສະໝັກທັງໝົດ 31 ສະຫາຍ, ຍິງ 7 ສະຫາຍ, ໃນນີ້ເລືອກເອົາ 27 ສະຫາຍ, ອາຍຸສູງສຸດ 59 ປີ, ຕໍ່າສຸດ 39 ປີ, ອາຍຸສະເລ່ຍ 42 ປີ, ກອງປະຊຸມໄດ້ເປັນເອກະພາບກັນ ເລືອກເອົາ ສະຫາຍ ສົມຈິດ ຈັນທະວົງ  ເປັນເລຂາຄະນະບໍລິຫານງານພັກເມືອງ, ສະຫາຍ ນາງ ພີມປະໄພ ສຸຄະລາດ ເປັນຮອງເລຂາ, ສະຫາຍ ສົມດີ ຄົງສະຫວັນ ເປັນຮອງເລຂາ ທັງເປັນປະທານຄະນະກວດກາພັກເມືອງ, ເລືອກເອົາ ສະຫາຍ ນາງ ພີມມະສອນ ສີບົວຈັນ ແລະ ສະຫາຍ ສົມພອນ ພາລີໄບ ເປັນຮອງປະທານ.

 

ຂ່າວ-ພາບໂດຍ: ອຸ່ນເຮືອນ ໂພທິລັກ