ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສ.ອາເມລິກາ ມອບປຶ້ມນິທານໃຫ້ 850 ໂຮງຮຽນປະຖົມ ໃນ ສປປ ລາວ

ອົງການພັດທະນາສາກົນ ປະເທດສະຫະລັດອາເມລິກາ ມອບປຶ້ມນິທານສົ່ງເສີມການອ່ານ ຈຳນວນ 80.000 ກວ່າຫົວ ໂຮງຮຽນປະຖົມສົມບູນ 850 ແຫ່ງ ໃນ 4 ແຂວງຂອງ ສປປ ລາວ ຄື: ແຂວງວຽງຈັນ, ອັດຕະປື, ຈຳປາສັກ ແລະແຂວງຊຽງຂວາງ ໃນໂຄງການຮຽນ-ອ່ານ ເພື່ອສະເຫລີມ ສະຫລອງ ວັນສາກົນແຫ່ງການລົບລ້າງຄວາມບໍ່ຮູ້ໜັງສື ຄົບຮອບ 55 ປີ.

ພິທີມອບ-ຮັບປຶ້ມດັ່ງກ່າວຢ່າງເປັນທາງການ ຈັດຂຶ້ນໃນວັນທີ 15 ກັນຍາ 2020 ຢູ່ໂຮງຮຽນປະຖົມສົມບູນສະກ້າ ເມືອງໂພນໂຮງ ແຂວງວຽງຈັນ. ມອບໂດຍທ່ານ ປີເຕີ ເຮມ໋ອນ ເອກອັກຄະລັດຖະທູດ ສະຫະລັດອາເມລິກາ ປະຈຳ ສປປ ລາວ ແລະ ຮັບໂດຍ ທ່ານ ນາງ ດາລາວອນ ກິດຕິພັນ ຫົວໜ້າຫ້ອງການກະຊວງສຶກສາທິການ ແລະ ກິລາ ໂດຍມີ ທ່ານ ບຸນສອນ ເພັດລາວັນ ຮອງເຈົ້າແຂວງວຽງຈັນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ປີເຕີ ເຮມ໋ອນ ກ່າວວ່າ: ການມອບປຶ້ມໃນຄັ້ງນີ້ ເພື່ອຊຸກຍູ້ສົ່ງເສີມການສຶກສາຂັ້ນພື້ນຖານ ສຳລັບເດັກ ນ້ອຍທຸກຄົນໃນ ສປປ ລາວ ພ້ອມທັງເປັນການສົ່ງເສີມການສຶກສາແບບມີສ່ວນຮ່ວມ. ປັດຈຸບັນ ສະຫະລັດອາເມລິກາ ໄດ້ລົງທຶນຫລາຍກວ່າ 120 ລ້ານໂດລາ ໃນການປັບປຸງການສຶກສາຂັ້ນພື້ນຖານໃນລາວ ໂດຍຜ່ານການຈັດຕັ້ງປະຕິບັດໃນດ້ານຕ່າງໆຢ່າງກວ້າງຂວາງ ເຊິ່ງໂຄງ ການຮຽນ-ອ່ານ ເປັນໂຄງການທີ່ເນັ້ນໃສ່ ການປັບປຸງທັກສະການອ່ານ ຂອງເດັກນ້ອຍໃນຊັ້ນປະຖົມ ປ1 ແລະ ປ2 ໃນລາວ ໂດຍສະເພາະເດັກນ້ອຍ ທີ່ບໍ່ໄດ້ເວົ້າພາສາລາວຕັ້ງແຕ່ກຳເນີດ ແລະ ເດັກພິການ. ນອກນີ້ ໂຄງການຮຽນອ່ານ ຍັງເຮັດວຽກຢ່າງໃກ້ຊິດກັບ ກະຊວງສຶກສາທິການ ແລະ ກິລາ ນັບທັງຄູ່ຮ່ວມພັດທະນາ ເພື່ອສ້າງຄວາມເຂັ້ມແຂງໃຫ້ບົບການສຶກສາຂອງລາວ ດ້ວຍວິທີອີງໃສ່ຫລັກ ຖານ, ສ້າງຄວາມສາມາດໃນການຂະຫຍາຍ ແລະ ຮັກສາການຊ່ວຍເຫລືອໃນອານະຄົດ.

ສ່ວນ ທ່ານ ນາງ ດາລາວອນ ກິດຕິພັນ ກ່າວວ່າ: ການຮັບປຶ້ມຄັ້ງນີ້, ເປັນການຊຸກຍູ້ສົ່ງເສີມໃຫ້ນັກຮຽນຢູ່ບັນດາໂຮງຮຽນເປົ້າໝາຍຂອງໂຄງການໄດ້ເຂົ້າເຖິງປຶ້ມອ່ານ, ສົ່ງ ເສີມອັດຕາການຮຽນຮູ້ໜັງສືໃນ ສປປ ລາວ ເພີ່ມຂຶ້ນ ໂດຍສະເພາະບັນດາເດັກນ້ອຍຊົນເຜົ່າ ທີ່ບໍ່ໄດ້ເວົ້າພາສາລາວມາແຕ່ກຳເນີດ; ພ້ອມນີ້ ຍັງເນັ້ນໃຫ້ສືບຕໍ່ຊ່ວຍຄູ-ອາຈານ ແລະ ຊຸມຊົນໃຫ້ມີສ່ວນຮ່ວມໃນການອ່ານ, ສ້າງກິດຈະກໍາການອ່ານໃຫ້ຫລາຍຂຶ້ນ ໂດຍຈັດໃຫ້ມີການແຂ່ງຂັນການອ່ານໃນໂຮງຮຽນ ຫລື ການແຂ່ງຂັນການອ່ານໃນລະດັບຕ່າງໆ.