ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສ. ອາເມລິກາ ມອບອຸປະກອນປ້ອງກັນຕົນເອງໃຫ້ແກ່ ສປປ ລາວ ເພື່ອຮັບມືກັບການລະບາດຂອງພະຍາດໂຄໂຣນາ:

ໃນວັນທີ 7 ກຸມພາ 2020 ຜ່ານມາ, ທີ່ກະຊວງສາທາລະນະສຸກ, ນະຄອນຫຼວງວຽງຈັນ, ທ່ານ ປອ ປີເຕີ ເຮມ໋ອນ ເອກອັກຄະລັດຖະທູດສະຫະລັດອາເມລິກາປະຈໍາ ສປປ ລາວ ໄດ້ມອບອຸປະກອນປ້ອງກັນຕົນເອງໃຫ້ແກ່ ທ່ານ ຮສ. ດຣ. ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກໃນພິທີມອບ-ຮັບຢ່າງເປັນທາງການ. ນີ້ແມ່ນການຊ່ວຍເຫຼືອຈາກ ສ. ອາເມລິກາ ຕໍ່ ສປປ ລາວ ໃນການກຽມຄວາມພ້ອມເພື່ອຮັບມືກັບການລະບາດຂອງເຊື້ອພະຍາດໂຄໂຣນາ ທີ່ອາດຈະເກີດຂຶ້ນໃນ ສປປ ລາວ. ອຸປະກອນເຫຼົ່ານີ້ ແມ່ນໄດ້ຮັບທຶນຊ່ວຍເຫຼືອລ້າຈາກ ສ. ອາເມລິກາ ໂດຍຜ່ານອົງການພັດທະນາສາກົນແຫ່ງສະຫະລັດອາເມລິກາ ຫຼື USAID ເຊິ່ງລວມມີ ແວ່ນຕາປ້ອງກັນພະຍາດ ຈຳນວນ 440 ອັນ, ຊຸດຄຸມໃນການຜ່າຕັດ 1.500 ຊຸດ, ເຄື່ອງປ້ອງກັນໃບໜ້າ 220 ຊຸດ, ລວມທັງ ຖົງສຳລັບຂີ້ເຫຍື້ອບໍ່ອະເຊື້ອ, ຜ້າຢາງກັນເປື້ອນ, ໜ້າກາກໃບໜ້າ N95, ກ່ອງສຳລັບຂື້ເຫຍື້ອບໍ່ອະເຊື້ອ, ຖົງມື ແບະ ເຄື່ອງອະນາໄມມື. ອຸປະກອນເຫຼົ່ານີ້ແມ່ນຈະໄດ້ຖືກນຳສົ່ງຕໍ່ໄປໃຫ້ບັນດາແຂວງໃນຂອບເຂດທົ່ວປະເທດທີ່ກຳລັງມີຄວາມຕ້ອງການສູງ.


ໃນພິທີມອບຮັບດັ່ງກ່າວ, ທ່ານເອກອັກຄະລັດຖະທູດສ.ອາເມລິກາ ເຮມ໋ອນກ່າວວ່າ: ພິທີມອບຮັບນີ້ໄດ້ສະແດງໃຫ້ເຫັນຄວາມໝາຍ ແລະ ຄວາມສຳຄັນຂອງສາຍສຳພັນການຮ່ວມມືສອງຝ່າຍແບບກວມລວມຂອງ ສ. ອາເມລິກາ ແລະ ສປປ ລາວ. ການສະໜອງ ເຄື່ອງປ້ອງກັນຕົນເອງໃນຄັ້ງນີ້ ຈະສາມາດຊ່ວຍພະນັກງານການເເພດ ແລະ ສາທາລະນະສຸກ ໃນສະຖານະການທີ່ຫຍຸ້ງຍາກ, ດັ່ງທີ່ປະເທດລາວ ພະຍາຍາມທີ່ຈະປ້ອງກັນການແຜ່ລະບາດຂອງພະຍາດຕິດເເປດແບບ ໃໝ່ນີ້ ລວມທັງພະຍາດໂຄໂຣນາ. ພວກເຮົາພູມໃຈທີ່ໄດ້ສະໜັບສະໜູນບັນດາແພດໝໍ ແລະ ປະຊາກອນກຸ່ມສ່ຽງໃນພາລະກິດນີ້. ເຄື່ອງປ້ອງກັນຕົນເອງຈະຊ່ວຍພະນັກງານສາທາລະນະສຸກໃນທົ່ວປະເທດເຂົ້າໃນການປິ່ນປົວຜູ້ທີ່ອາດຈະຕິດເຊື້ອພະຍາດ, ໂດຍສະເພາະຜູ້ປ່ວຍທີ່ມີອາການເປັນຫວັດ ແລະ ມີໄຂ້.
ການຊ່ວຍເຫຼືອໃນຄັ້ງນີ້ ແມ່ນອີງຕາມການຮ້ອງຂໍຈາກກົມຄວບຄຸມພະຍາດຕິດຕໍ່, ກະຊວງສາທາລະນະສຸກຂອງລາວ. ນອກຈາກນີ້, ສ. ອາເມລິກາ ຍັງເຮັດວຽກຢ່າງໃກ້ຊິດກັບລັດຖະບານ ແລະ ປະຊາຊົນລາວໃນຫຼາຍໂຄງການເພື່ອປັບປຸງວຽກງານທາງດ້ານສາທາລະນະສຸກໃນທົ່ວປະເທດ, ບໍ່ວ່າຈະເປັນ ວຽກງານທາງໂພສະນາການ ໂດຍຜ່ານໂຄງການອາຫານທ່ຽງ, ໂຄງການສົ່ງເສີມແມ່ ແລະ ເດັກ ແລະ ໂຄງການປ້ອງກັນການແຜ່ລະບາດຂອງພະຍາດຕິດຕໍ່, ເປັນຕົ້ນ.