ໃນວັນທີ 19 ມິຖຸນາ 2024 ຜ່ານມາ ຢູ່ທີ່ ອົງການອຸຕຸນິຍົມ, ກະຊວງສິ່ງແວດລ້ອມ, ນະຄອນຫຼວງເຊອູນ ສ. ເກົາຫຼີ ໄດ້ຈັດກອງປະຊຸມ ຄະນະຜູ້ແທນ ແລະ ພິທີເຊັນບົດບັນທຶກການ ປຶກ ສາຫາລື ໂຄງການປັບປຸງລະບົບແຈ້ງເຕືອນໄພລ່ວງໜ້າ ເພື່ອຕອບໂຕ້ກັບໄພພິບັດທາງທຳມະຊາດ ຢູ່ ສປປ ລາວ ໂດຍໃຫ້ກຽດເປັນຄະນະປະທານຮ່ວມ ຂອງ ທ່ານ Dr. Hee-Dong YOO ຫົວໜ້າອົງການອຸຕຸນິຍົມ ສ. ເກົາຫຼີ ແລະ ທ່ານ ປອ ອານົງສອນ ພົມມະຈັນ ຫົວໜ້າຫ້ອງການ ກະຊວງ ຊັບພະຍາກອນ ທຳມະຊາດ ແລະ ສິ່ງແວດລ້ອມ (ກຊສ) ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ Dr. Hee-Dong YOO ໄດ້ສະແດງຄວາມຊົມເຊີຍຢ່າງສູງ ທີ່ຄະນະຜູ້ແທນ ຈາກ ສປປ ລາວ ທີ່ມາຢ້ຽມຢາມ ອົງການອຸຕຸນິຍົມ ສ. ເກົາຫຼີ ເຊິ່ງສະແດງໃຫ້ເຫັນເຖິງການຮ່ວມມືອັນຍາວນານ ແລະ ໝັ້ນຄົງລະຫວ່າງສອງຊາດ ສ. ເກົາຫຼີ – ສປປ ລາວ ເວົ້າລວມ, ເວົ້າສະເພາະ ລະຫວ່າງ ກະຊວງສິ່ງແວດລ້ອມ ສ. ເກົາຫຼີ ແລະ ກະຊວງຊັບພະຍາກອນທຳມະຊາດ ແລະ ສິ່ງແວດ ລ້ອມ ສປປ ລາວ.
ທ່ານ ປອ ອານົງສອນ ພົມມະຈັນ ຫົວໜ້າຫ້ອງການ ກຊສ ໄດ້ສະແດງຄວາມຮູ້ບຸນຄຸນ ແລະ ຂອບໃຈຢ່າງສູງ ຕໍ່ຄະນະນຳຂອງອົງການອຸຕຸນິຍົມ ສ. ເກົາຫຼີ ທີ່ໄດ້ເອົາໃຈໃສ່ຍາດແຍ່ງເອົາທຶນມາຊ່ວຍເຫຼືອ ສປປ ລາວ ແລະ ຂໍຂອບໃຈສຳຫຼັບການຕ້ອນຮັບຢ່າງອົບອຸ່ນ ແລະ ກະກຽມພິທີເຊັນບົດບັນທຶກໃນຄັ້ງນີ້. ທ່ານ ກໍ່ ໄດ້ລາຍງານຕໍ່ກອງປະຊຸມ ກ່ຽວກັບ ຜົນກະທົບຈາກໄພພິບັດທາງມະຊາດໃນ ສປປ ລາວ ທີ່ເນື່ອງມາຈາກການປ່ຽນແປງສະພາບພູມອາກາດ ເຊັ່ນ: ໄພແຫ້ງແລ້ງ, ນໍ້າຖ້ວມ, ດິນເຈື່ອນ ແລະ ພາຍຸໜຸນເຂດຮ້ອນພັດຜ່ານ ເຊິ່ງໄດ້ສ້າງຜົນເສຍຫາຍທາງດ້ານຊີວິດ ຊັບສິນຂອງປະຊາຊົນ, ເສດຖະກິດຂອງຊາດ ແລະ ເປັນສິ່ງກີດຂວາງການພັດທະນາເສດຖະກິດ-ສັງຄົມໃນ ສປປ ລາວ ຕື່ມອີກ.
ກອງປະຊຸມໄດ້ປຶກສາຫາລື ແລະ ຮັບຟັງການນຳສະເໜີຈາກຄະນະຜູ້ແທນທັງສອງຝ່າຍເຊັ່ນ: ຮັບຟັງການລາຍງານການຈັດຕັ້ງປະຕິບັດໂຄງການຊ່ວຍເຫຼືອເພື່ອການພັດທະນາ ຫຼື ໂຄງການ ODA ທີ່ສະໜັບສະໜູນໂດຍ ລັດຖະບານ ສ. ເກົາຫຼີ ເຊິ່ງຕະຫຼອດໄລຍະຜ່ານມາຮອດປະຈຸບັນ ອົງການອຸຕຸນິຍົມ ແລະ ສະຖາບັນອຸຕຸນິຍົມ ສ. ເກົາຫຼີ ສາມາດຍາດແຍ່ງໂຄງການ ODA ມາສ້າງຄວາມເຂັ້ມແຂງແກ່ວຽກງານອຸຕຸນິຍົມ ແລະ ອຸທົກກະສາດ ຂອງ ສປປ ລາວ ໄດ້ຫຼາຍໂຄງການ ໂດຍສະເພາະການຍົກລະດັບໂຄງລ່າງພື້ນຖານ ແລະ ສາ້ງຄວາມອາດສາມາດໃຫ້ແກ່ພະນັກງານວິຊາການຂະແໜງອຸຕຸນິຍົມ ແລະ ອຸທົກກະສາດ ໃນ ສປປ ລາວ. ໄດ້ຮັບຟັງ ແລະ ລາຍງານກ່ຽວກັບການພັດນາ ຂະແໜງການອຸຕຸນິຍົມ ແລະ ອຸທົກກະສາດ ໃນ ສປປ ລາວ ໂດຍສະເພາະພາລະບົດບາດ, ບຸກຄະລາກອນ, ບັນດາສະຖານີສັງເກດອາກາດ ແລະ ລະດັບນໍ້າ, ສິ່ງອຳນວຍຄວາມສະດວກ ແລະ ການສື່ສານແລກ ປ່ຽນຂໍ້ມູນຂ່າວສານພະຍາກອນ ແລະ ແຈ້ງເຕືອນໄພລ່ວງໜ້າ, ສິ່ງທີ່ທ່າທາຍຕ່າງໆ ແລະ ປຶກສາຫາລື ກ່ຽວກັບ ໂຄງການປັບປຸງລະບົບແຈ້ງເຕືອນໄພລ່ວງໜ້າ ເພື່ອຕອບໂຕ້ກັບໄພພິບັດທາງທຳມະຊາດຢູ່ ສປປ ລາວ ຊຶ່ງເປັນໂຄງການໃໝ່ທີ່ ລັດຖະບານ ສ. ເກົາຫຼີ ໄດ້ອະນຸມັດໃຫ້ການຊ່ວຍເຫຼືອແກ່ ສປປ ລາວ, ຊຶ່ງໄລຍະເວລາການຈັດຕັ້ງປະຕິບັດຂອງໂຄງການນີ້ ລວມທັງມົດ 4 ປີ (ແຕ່ປີ 2024 – 2027) ໃນງົບປະມານທັງໝົດປະມານ 4 ລ້ານໂດລາສາຫະລັດ ແລະ ມີຈຸດປະສົງຄື:
(1) ຍົກລະດັບຂີດຄວາມສາມາດໃນການຮັບມືກັບສະພາບອາກາດຮ້າຍແຮງໃນ ສປປ ລາວ ເພື່ອຫຼຸດຜ່ອນຜົນເສຍຫາຍທາງດ້ານຊີວິດ ແລະ ສັບສິນ;
(2) ປັບປຸງໂຄງລ່າງພື້ນຖານດ້ານອຸຕຸນິຍົມ ແລະ ອຸທົກກະສາດໃຫ້ທັນສະໃໝ່ ໂດຍສະເພາະໃນວຽກງານເຝົ້າລະວັງສະພາບອາກາດຮ້າຍແຮງ, ນໍ້າຖ້ວມ ແລະ ແຈ້ງເຕືອນໄພລ່ວງໜ້າ.
ກອງປະຊຸມໄດ້ຕົກລົງເຫັນດີເປັນເອກະພາບກັນໃນການກຳນົດໜ້າທີ່ຄວາມຮັບຜິດຊອບ ຂອງສອງຝ່າຍ ໃນການຈັດຕັ້ງປະຕິບັດຂອງໂຄງການດັ່ງກ່າວ ແລະ ໄດ້ເຊັນບົດບັນທຶກຂອງການປຶກສາຫາລືໃນຄັ້ງນີ້ ຄື: ທ່ານ Dr. Hee-Dong YOO ຫົວໜ້າອົງການອຸຕຸນິຍົມ ສ. ເກົາຫຼີ ເຊັນໃນນາມ ອົງການອຸຕຸນິຍົມ ສ. ເກົາຫຼີ, ທ່ານ ປອ ອານົງສອນ ພົມມະຈັນ, ຫົວໜ້າຫ້ອງການ ກຊສ ເຊັນໃນນາມ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ທ່ານ Dr. Young-In AHN ເຊັນໃນນາມ ຫົວໜ້າສະຖາບັນອຸຕຸນິຍົມ ສ. ເກົາຫຼີ ແລະ ທ່ານ ນາງ ອຸທອນ ເພັດຫຼວງສີ ເຊັນນາມ ຫົວໜ້າກົມອຸຕຸນິຍົມ ແລະ ອຸທົກກະສາດ ສປປ ລາວ.
ທີ່ມາ: ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ
