(22.9.24) ທີ່ນະຄອນຫຼວງວຽງຈັນ ໄດ້ມີກອງປະຊຸມປຶກສາຫາລື ລະຫວ່າງ ລັດຖະ ມົນຕີເສດຖະກິດອາຊຽນ ແລະ ລັດຖະມົນຕີກະຊວງການຄ້າ, ອຸດສາຫະກໍາ ແລະ ພະລັງງານ ແຫ່ງ ສາທາລະນະລັດເກົາຫຼີ ຄັ້ງທີ 21 ( 21st AEM-ROK CONSULTATION) ໂດຍການເປັນປະທານຮ່ວມຂອງທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ, ທັງເປັນລັດຖະມົນຕີເສດຖະກິດອາຊຽນ ຂອງ ສປປ ລາວ ແລະ ທ່ານ ອິງຄຽວ ຊອງ ລັດຖະມົນຕີ ກະຊວງການຄ້າ ອຸດສາຫະກໍາ ແລະ ພະລັງງານ ແຫ່ງ ສາທາລະນະລັດເກົາຫຼີ.
ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ໃຫ້ຮູ້ວ່າ: ອາຊຽນ ແລະ ສ. ເກົາຫຼີ ເປັນຄູ່ຮ່ວມມືທາງດ້ານເສດຖະກິດທີ່ຍາວນານ ແລະ ມີການເຊື່ອມໂຍງທາງດ້ານການຄ້າ ແລະ ການລົງທຶນທີ່ເຂັ້ມແຂງ. ໃນປີ 2023, ການຄ້າດ້ານສິນຄ້າ ລະຫວ່າງ ອາຊຽນ ແລະ ສ. ເກົາຫຼີ ມີມູນຄ່າ 196.6 ຕື້ໂດລາສະຫະລັດ, ກວມເອົາ 5.6% ຂອງມູນຄ່າການຄ້າທັງໝົດຂອງອາຊຽນ, ເຮັດໃຫ້ ສ. ເກົາຫຼີ ເປັນຄູ່ຄ້າອັນດັບທີ 5 ຂອງອາຊຽນ. ພ້ອມກັນນັ້ນ, ມູນຄ່າການລົງທຶນໂດຍກົງ (FDI) ຂອງນັກລົງທຶນ ຈາກ ສ. ເກົາຫຼີ ຢູ່ບັນດາປະເທດສະມາຊິກອາຊຽນ ບັນລຸໄດ້ 11.0 ຕື້ໂດລາສະຫະລັດ, ກວມເອົາ 4.8% ຂອງມູນຄ່າການລົງທຶນໂດຍກົງຈາກຕ່າງປະເທດ ຢູ່ໃນອາຊຽນ ໃນປີ 2023, ເຮັດໃຫ້ ສ. ເກົາຫຼີ ເປັນອັນດັບທີ 7 ຂອງບັນດາປະເທດທີ່ມີມູນຄ່າການລົງທຶນຫຼາຍຢູ່ໃນອາຊຽນ.
ທ່ານກ່າວຕື່ມວ່າ: ປີຜ່ານມາ ສອງຝ່າຍໄດ້ປຶກສາຫາລືຫຼາຍບັນຫາ ທີ່ຕິດພັນກັບການຮ່ວມມື ລະຫວ່າງ ອາຊຽນ ແລະ ສ. ເກົາຫຼີ ເຊິ່ງໃນນັ້ນ ພວກເຮົາໄດ້ປຶກສາຫາລື ກ່ຽວກັບ ການພັດທະນາເສດຖະກິດ ໃຫ້ມີຄວາມຍືນຍົງ, ການນໍາໃຊ້ເຕັກໂນໂລຊີເຂົ້າໃນວຽກງານການຄ້າ ແລະ ການລົງທຶນ ແລະ ການສ້າງຄວາມເຂັ້ມແຂງໃຫ້ແກ່ຕ່ອງໂສ້ການສະໜອງ. ພວກເຮົາ ຍັງໄດ້ແລກປ່ຽນທັດສະນະ ກ່ຽວກັບ ຜົນການທົບທວນຄືນສັນຍາການຄ້າເສລີອາຊຽນ-ເກົາຫຼີ ເຊິ່ງໄດ້ຊີ້ໃຫ້ເຫັນຄວາມຈໍາເປັນໃນການຍົກລະດັບສັນຍາດັ່ງກ່າວ ເພື່ອໃຫ້ມີຄວາມທັນສະໄໝ ແລະ ສອດ ຄ່ອງກັບຄວາມຮຽກຮ້ອງຕ້ອງການຂອງພາກທຸລະກິດ ໃນພາກພື້ນ ແລະ ສາກົນ.
ເພື່ອສືບຕໍ່ການຮ່ວມມືດັ່ງກ່າວ, ກອງປະຊຸມຄັ້ງນີ້ ໄດ້ເນັ້ນໃສ່ ທົບທວນຄືນຄວາມຄືບໜ້າ ຂອງການຈັດຕັ້ງປະຕິບັດສັນຍາການຄ້າເສລີ ອາຊຽນ-ສ. ເກົາຫຼີ ແລະ ແລກປ່ຽນທັດສະນະ ກ່ຽວກັບການຍົກລະດັບສັນຍາດັ່ງກ່າວ. ພ້ອມກັນນັ້ນ, ໄດ້ຮັບຊາບຄວາມຄືບໜ້າຂອງການຈັດຕັ້ງປະຕິບັດແຜນການຮ່ວມມື ລະຫວ່າງ ອາຊຽນ ແລະ ສ. ເກົາຫຼີ ແລະ ຮັບຟັງການລາຍງານກ່ຽວກັບ ການກະກຽມກອງປະຊຸມສຸດຍອດອາຊຽນ-ເກົາຫຼີ ຄັ້ງທີ 25.
