ອົງການປົກຄອງແຂວງຫລວງນໍ້າທາ ເຊັນບົດບັນທຶກຄວາມເຂົ້າໃຈ ໃນການສຶກສາຄວາມເປັນໄປໄດ້ ໂຄງການພັດທະນາແຫລ່ງທ່ອງທ່ຽວທຳມະຊາດ ແລະ ປະຫວັດສາດ (ມົກສະເບາະ) ເຂດບ້ານນາເຕີຍ ເມືອງຫລວງນໍ້າທາ ກັບບໍລິສັດຄຳສຸກ ການຄ້າຂາເຂົ້າ-ຂາອອກ ແລະ ບໍລິການຈໍາກັດຜູ້ດຽວ ໃນວັນທີ 7 ມິຖຸນາ 2024 ທີ່ພະແນກແຜນການ ແລະ ການລົງທຶນແຂວງ.
ທ່ານ ນາງ ສົມສີ ແກ້ວປະເສີດ ຫົວໜ້າຂະແໜງສົ່ງເສີມການລົງທຶນ, ພະແນກແຜນການ ແລະ ການລົງທຶນແຂວງ ໄດ້ໃຫ້ຮູ້ວ່າ: ບົດບັນທຶກຄວາມເຂົ້າໃຈ ວ່າດ້ວຍການສຶກສາຄວາມເປັນ ໄປໄດ້ຂອງໂຄງການພັດທະນາແຫລ່ງທ່ອງທ່ຽວທຳມະຊາດ ແລະ ປະຫວັດສາດເຂດບ້ານນາເຕີຍ ເພື່ອດຳເນີນການສຳຫລວດ, ເກັບກຳຂໍ້ມູນ ແລະ ສຶກສາຄວາມເປັນໄປໄດ້ ໃນການພັດທະນາແຫລ່ງທ່ອງທ່ຽວ (ມົກສະເບາະ) ໃນເນື້ອທີ່ 149 ເຮັກຕາ ໃນໄລຍະເວລາ 18 ເດືອນ ທີ່ເປັນຮ່ອງຮອຍດ້ານປະຫວັດສາດ ແລະ ມີຄວາມອຸດົມສົມບູນທາງທຳມະຊາດ ຢູ່ເຂດບ້ານນາເຕີຍ, ເມືອງຫລວງນ້ຳທາ ແຂວງຫລວງນໍ້າທາ ເພື່ອແນ່ໃສ່ພັດທະນາໃຫ້ກາຍເປັນສະຖານທີ່ທ່ອງທ່ຽວໃນອະນາຄົດ.
ຂ່າວ: ອຸ້ມ ສົມນໍວັນ
