ແຂວງຫລວງນໍ້າທາ ສະຫລຸບຕີລາຄາ ການຈັດຕັ້ງປະຕິບັດ ລັດຖະທຳມະນູນ ໃນໄລຍະ 9 ປີທີ່ຜ່ານມາໃນທົ່ວປະເທດ ກໍຄືທົ່ວແຂວງ ໃນວັນທີ 23 ກໍລະກົດ 2024 ເພື່ອໃຫ້ເຫັນໄດ້ຂໍ້ສະດວກ, ຂໍ້ຫຍຸ້ງຍາກ, ຜົນສຳເລັດ, ບັນຫາຄົງຄ້າງພ້ອມທັງສາເຫດ, ບົດບັນຍັດໃຫ້ສອດຄ່ອງ ບົດຮຽນ ເພື່ອເປັນຂໍ້ມູນໃຫ້ ການຄົ້ນຄວ້າ, ປັບປຸງເນື້ອໃນຂອງລັດຖະທໍາມະນູນ ສະບັບປີ 2015 ໃຫ້ຖືກຕ້ອງ, ຄົບຖ້ວນ, ສອດຄ່ອງ, ຮັດກຸມ ແລະ ສາມາດຈັດຕັ້ງປະຕິບັດ ໃຫ້ປະກົດຜົນເປັນຈິງໄດ້ ໂດຍການເປັນປະທານຂອງທ່ານ ຄໍາໄຫລ ສີປະເສີດ ຮອງປະທານສູນກາງແນວລາວສ້າງຊາດ, ຫົວໜ້າຄະນະຮັບຜິດຊອບ ປະເມີນຜົນການຈັດຕັ້ງປະຕິບັດ ລັດຖະທຳມະນູນ ສະບັບປີ 2015, ມີປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ, ຮອງຫົວໜ້າອະນຸກໍາມະການເນື້ອໃນ, ຂົງເຂດສະພາປະຊາຊົນແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ
ທ່ານ ຄໍາໄຫລ ສີປະເສີດ ໄດ້ໃຫ້ຮູ້ວ່າ: ການປະເມີນຜົນ ການຈັດຕັ້ງປະຕິບັດ ລັດຖະທຳມະນູນຄັ້ງນີ້ ມີຄວາມໝາຍສຳຄັນຫລາຍ ເນື່ອງຈາກການປະເມີນຜົນ ການຈັດຕັ້ງປະຕິບັດ ລັດຖະທໍາມະນູນແມ່ນການປະເມີນຜົນ ການຈັດຕັ້ງປະຕິບັດ ນິຕິກຳ ສູງສຸດຂອງລັດ ຊຶ່ງເປັນກົດໝາຍພື້ນຖານຂອງຊາດ. ລັດຖະທຳມະນູນ ສະບັບທໍາອິດ ຂອງ ສປປ ລາວ ໄດ້ຖືກຮັບຮອງ ແລະ ປະກາດໃຊ້ຢ່າງເປັນທາງການ ໃນປີ 1991, ມາຮອດປັດຈຸບັນເປັນເວລາ 33 ປີ ແລະ ໄດ້ມີການປັບປຸງ 2 ຄັ້ງຄື: ການປັບປຸງປີ 2003 ແລະ ປີ 2015. ລັດຖະທໍາມະນູນ ສະບັບປີ 2015 ມາຮອດປັດຈຸບັນກໍເປັນເວລາ 9 ປີ ຊຶ່ງໄດ້ເປັນກົດໝາຍພື້ນຖານສໍາຄັນ ຂອງປະເທດຊາດ, ເປັນບ່ອນອີງແກ່ການສ້າງ ແລະ ປັບປຸງກົດໝາຍ ເພື່ອເປັນເຄື່ອງມືຂອງລັດ ໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ແລະ ສ້າງເງື່ອນໄຂພື້ນຖານ ແກ່ການສ້າງລັດປະຊາທິປະໄຕ ປະຊາຊົນ ຂອງພວກເຮົາ ໃຫ້ເປັນລັດທີ່ປົກຄອງດ້ວຍກົດໝາຍດີຂຶ້ນເທື່ອລະກ້າວ, ແຕ່ຜ່ານການຈັດຕັ້ງປະຕິບັດ ມີບາງບົດບັນຍັດ ຂອງລັດຖະທຳມະນູນ ບໍ່ສອດຄ່ອງກັບໜ້າທີ່ການເມືອງ ຂອງພັກ ແລະ ສະພາບການພັດທະນາ ເສດຖະກິດ-ສັງຄົມ ໃນໄລຍະປັດຈຸບັນ. ໃນດ້ານອື່ນ, ເພື່ອຕອບສະໜອງກັບຄວາມຮຽກຮ້ອງຕ້ອງການ ໃນການຈັດຕັ້ງປະຕິບັດແນວທາງປ່ຽນແປງໃໝ່ຢ່າງຮອບດ້ານ ມີຫລັກການຂອງພັກເຮົາໃນຕໍ່ໜ້າ, ຄະນະບໍລິຫານງານສູນກາງພັກສະໄໝທີ XI ໄດ້ອອກມະຕິ ສະບັບເລກທີ 05/ຄບສພ, ລົງວັນທີ 5 ກັນຍາ 2023 ວ່າດ້ວຍການສືບຕໍ່ຍູ້ແຮງການຜັນຂະຫຍາຍ ແນວທາງປ່ຽນແປງໃໝ່ສູ່ລວງເລິກ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນຳພາຂອງພັກ, ເຊິ່ງກົມການເມືອງສູນກາງພັກ ກໍໄດ້ອອກມະຕິສະບັບເລກທີ 04/ກມສພ, ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດ ເອກະລາດເປັນເຈົ້າຕົນເອງໃນໄລຍະໃໝ່. ອີກປະການໜຶ່ງ, ປັດຈຸບັນນີ້ພັກ ພວມຄົ້ນຄວ້າ ແລະ ສ້າງໂຄງການການເມືອງຂອງພັກ ທີ່ຈະປະກາດໃຊ້ໃນຕໍ່ໜ້ານີ້. ທັງໝົດສິ່ງດັ່ງກ່າວໄດ້ຮຽກຮ້ອງໃຫ້ລັດ ຕ້ອງປັບປຸງລັດຖະທໍາມະນູນ ແຫ່ງ ສປປ ລາວ ສະບັບປີ 2015 ໃຫ້ສອດຄ່ອງກັບໜ້າທີ່ການເມືອງຂອງພັກ ແລະ ລັດໃນໄລຍະໃໝ່.
ທ່ານ ຄໍາໄຫລ ສີປະເສີດ ໃຫ້ຮູ້ຕື່ມວ່າ: ການປັບປຸງລັດຖະທຳມະນູນຄັ້ງນີ້, ແມ່ນມີຂຶ້ນຢູ່ໃນໄລຍະເວລາທີ່ສະພາບການຂອງໂລກ, ພາກພື້ນມີການຜັນແປຢ່າງສັບສົນທີ່ຄາດຄະເນໄດ້ຍາກຊຶ່ງມີທັງຂໍ້ສະດວກ ແລະ ສິ່ງທ້າທາຍຕໍ່ພາລະກິດປົກປັກຮັກສາ ແລະ ສ້າງສາປະເທດຊາດຂອງພວກເຮົາ. ຢູ່ພາຍໃນປະເທດ, ພວກເຮົາກໍພວມປະເຊີນໜ້າກັບຄວາມຫຍຸ້ງຍາກ ແລະ ສິ່ງທ້າທາຍຕ່າງໆ ເປັນຕົ້ນ ຄວາມຫຍຸ້ງຍາກທາງດ້ານເສດຖະກິດ-ການເງິນ (ເງິນເຟີ້ສູງ, ອັດຕາແລກປ່ຽນເໜັງຕີງແຮງ, ຄ່າຄອງຊີບສູງ).ພ້ອມກັນນີ້, ອິດທິກໍາລັງປໍລະປັກກໍພວມອອກແຮງສວຍໃຊ້ສະພາບການດັ່ງກ່າວ ເພື່ອມ້າງເພທຳລາຍລະບອບໃໝ່ຂອງພວກເຮົາເປັນຕົ້ນໃສ່ຮ້າຍປ້າຍສີ ການນຳພາຂອງພັກ ແລະ ການຄຸ້ມຄອງຂອງລັດເຮົາ ຫວັງກໍ່ການແບ່ງແຍກພາຍໃນ ແລະ ໂຄ່ນລົ້ມລະບອບໃໝ່ຂອງພວກເຮົາ. ຍ້ອນແນວນັ້ນ, ໃນການປັບປຸງລັດຖະທໍາມະນູນ ຄັ້ງນີ້ພວກເຮົາຈຶ່ງຕ້ອງຍຶດໝັ້ນຕາມແນວທາງປ່ຽນແປງໃໝ່ຮອບດ້ານ ມີຫລັກການຂອງພັກເຮົາ, ຍຶດໝັ້ນການນຳພາຂອງພັກປະຊາຊົນປະຕິວັດລາວ, ຍຶດໜັ້ນອຸດົມຄະຕິສັງຄົມນິຍົມ, ຍຶດໝັ້ນພື້ນຖານທິດສະດີມາກ-ເລນິນ ແລະ ແນວຄິດປະທານໄກສອນພົມວິຫານ, ຍຶດໝັ້ນຫລັກການລວມສູນປະຊາທິປະໄຕ ໃນການຈັດຕັ້ງ ແລະ ເຄື່ອນໄຫວ ຂອງບັນດາອົງການອຳນາດລັດຂັ້ນສູນກາງ ແລະ ທ້ອງຖິ່ນ, ຍຶດໝັ້ນທາດແທ້ຊົນຊັ້ນຂອງລັດ ແມ່ນອຳນາດລັດຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ ພາຍໃຕ້ການນຳພາຂອງພັກ. ດ້ວຍເຫດນັ້ນ, ການປະເມີນຜົນການຈັດຕັ້ງປະຕິບັດ ລັດຖະທໍາມະນູນ ປີ 2015 ນີ້ ຈຶ່ງຕ້ອງມີທັດສະນະຢ່າງພາວະວິໄສ, ຮອບດ້ານ, ປະຫວັດສາດ ແລະ ຕົວຈິງ, ເດັດຂາດບໍ່ໃຫ້ເປັນຊ່ອງວ່າງ ໃຫ້ສັດຕູສວຍໃຊ້ ການປັບປຸງ ລັດຖະທຳມະນູນ ເພື່ອມ້າງເພພາຍໃນຂອງພວກເຮົາ.
ເພື່ອເຮັດໃຫ້ການປະເມີນຜົນ ການຈັດຕັ້ງປະຕິບັດ ລັດຖະທຳມະນູນ ຢູ່ແຂວງຫລວງນໍ້າທາໄດ້ຮັບໝາກຮັບຜົນ ແລະ ແທດເໝາະກັບສະພາບການຕົວຈິງຂອງທ້ອງຖິ່ນ, ສະເໜີໃຫ້ບັນດາທ່ານຈົ່ງລົງເລິກ ຕີລາຄາ ການຈັດຕັ້ງປະຕິບັດ ລັດຖະທຳມະນູນ ໂດຍຕິດພັນກັບການປະຕິບັດກົດໝາຍ ແລະ ນິຕິກຳໃຕ້ກົດໝາຍ ຂອງບັນດາຂະແໜງການ, ອົງການຂັ້ນແຂວງ, ຂັ້ນເມືອງ ແລະ ຂັ້ນຮາກຖານ ຢູ່ໃນແຂວງ ເປັນຕົ້ນ ການສ້າງຄວາມຮັບຮູ້, ເຂົ້າໃຈທີ່ຖືກຕ້ອງ ຕໍ່ລັດຖະທໍາມະນູນ ແລະ ກົດໝາຍ, ການສ້າງສະຕິເຄົາລົບ ແລະ ປະຕິບັດລັດຖະທໍາມະນູນ ແລະ ກົດໝາຍ ໃນຖັນແຖວພະນັກງານ, ສະມາຊິກພັກ, ລັດຖະກອນ, ນັກຮຽນຮູ້ປັນຍາຊົນ, ນັກທຸລະກິດ ແລະ ປະຊາຊົນບັນດາເຜົ່າຢູ່ແຂວງ. ພ້ອມກັນນີ້, ໃຫ້ສະເໜີຄໍາຄິດຄໍາເຫັນ ຕໍ່ການປັບປຸງລັດຖະທໍາມະນູນ ໂດຍສະເພາະ ການປັບປຸງເນື້ອໃນ ໝວດວ່າດ້ວຍ ສະພາປະຊາຊົນຂັ້ນແຂວງ, ອົງການປົກຄອງຂັ້ນແຂວງ, ຂັ້ນເມືອງ, ຂັ້ນຕາແສງ ແລະ ຂັ້ນບ້ານ ຂອງແຂວງຫລວງນ້ຳທາ, ການປະຕິບັດສິດ ແລະ ພັນທະຂອງພົນລະເມືອງລາວ, ຊາວຕ່າງດ້າວ ແລະ ຄົນບໍ່ມີສັນຊາດ ຢູ່ແຂວງຫລວງນ້ຳທາ.
ຂ່າວ-ພາບ: ຂັນໄຊ
