ວັນທີ 18 ມິຖຸນາ 2024 ທີ່ວິທະຍາໄລວິທະຍາສາດສຸຂະ ພາບ ຫລວງພະບາງ ຈັດພິທີປາຖະກະຖາຫວນຄືນມູນເຊື້ອ ວັນແພດລາວ ຄົບຮອບ 59 ປີ ເພື່ອຮ່ວມລະນຶກເຖິງຄຸນງາມຄວາມ ດີ ຂອງບັນພະບູລຸດ, ແພດໝໍ ແລະ ຜູ້ນຳໃນໄລຍະກ່ອນ ທີ່ໄດ້ອຸທິດຕົນ ເພື່ອຊາດ ເພື່ອປະຊາຊົນບັນດາເຜົ່າ ຢ່າງຫ້າວຫັນໃນສະໄໝສົງຄາມ ແລະ ໃນຍຸກສ້າງສາພັດທະນາປະເທດຊາດ ກໍຄືປັດຈຸບັນ.
ທ່ານ ດຣ. ພະນົມສິດ ລຳໄພພັນ ອຳນວຍການວິທະຍາໄລ ວິທະຍາສາດສຸຂະພາບ ຫລວງພະບາງ ໄດ້ເລົ່າຄືນຄວາມເປັນມາ ຂອງວັນແພດລາວວ່າ: ໃນປີ 1963 ສະໜາມຮົບຕໍ່ສູ້ກູ້ຊາດ ຕ້ານພວກລ່າເມືອງຂຶ້ນແບບໃໝ່ ໄດ້ເປີດກວ້າງອອກທົ່ວປະເທດ, ເຂດປົດປ່ອຍກໍ່ນັບມື້ນັບຂະຫຍາຍຕົວ ແພດໝໍລາວໃນໄລຍະນັ້ນ ແມ່ນນອນຢູ່ໃນການຈັດຕັ້ງຂອງເສນາຮັກ ແລະ ໄດ້ເຮັດ ໜ້າທີ່ຂອງຕົນ ໃນການຮັກສາ ແລະ ປິ່ນປົວພະຍາດ ແລະ ຮຳບາດແຜ່ສົງຄາມ ໃຫ້ພະນັກງານນັກຮົບ ແລະ ປະຊາຊົນຢ່າງບໍ່ຮູ້ອິດຮູ້ເມື່ອຍ, ຕໍ່ມາສູນກາງພັກໄດ້ມີນະໂຍບາຍ “ສ້າງເຂດປົດ ປ່ອຍໃຫ້ເປັນລັດໜຶ່ງ” ວັນທີ 18 ມິຖຸນາ 1965 ສູນກາງພັກ ແລະ ແນວລາວຮັກຊາດ ຈຶ່ງໄດ້ຕົກລົງແຍກຂະແໜງການສາທາ ລະນະສຸກ ອອກເປັນສອງການຈັດຕັ້ງຄື: ເສນາຮັກເພື່ອຮັບໃຊ້ກອງທັບ ແລະ ສາທາລະນະສຸກສູນກາງ ເພື່ອຮັບໃຊ້ພົນລະ ເຮືອນ, ຈາກນັ້ນ ກະຊວງສາທາລະນະສຸກ ໄດ້ນໍາສະເໜີຕໍ່ສະພາ ແຫ່ງຊາດ ແລະ ໄດ້ຮັບການເຫັນດີ ໃຫ້ບັນຈຸເຂົ້າໃນກົດ ໝາຍ ປິ່ນປົວສະບັບປັບປຸງ ໂດຍກໍານົດເອົາ ວັນທີ 18 ມິຖຸນາ ເປັນວັນແພດລາວ.
ໂອກາດນີ້, ທ່ານ ບຸນເລື່ອມ ມະນີວົງ ຮອງເຈົ້າແຂວງຫລວງພະບາງ ໄດ້ຍ້ອງຍໍຊົມເຊີຍແພດໝໍທຸກຄົນ ທີ່ໄດ້ເອົາໃຈໃສ່ປະຕິບັດຈັນຍາບັນ-ຈັນຍາທໍາຂອງແພດໝໍ ພ້ອມຈະຮັບໃຊ້ສັງຄົມຢູ່ທຸກສະຖານທີ່ ແລະ ທຸກເວລາ ທັງຮຽກຮ້ອງໃຫ້ສືບຕໍ່ເອົາໃຈໃສ່ ຕໍ່ວຽກງານສຶກສາອົບຮົມການເມືອງ-ແນວຄິດ ໃຫ້ຖັນແຖວພະນັກງານແພດໝໍ, ເອົາໃຈໃສ່ປະຕິບັດວຽກງານ 5 ດີ 1 ພໍໃຈ ແລະ ສຸມໃສ່ການພັດທະນາ-ຍົກລະດັບຄວາມຮູ້ຂອງພະນັກງານແພດໝໍ ໃຫ້ນັບມື້ສູງຂຶ້ນ.
