ເນື່ອງຈາກມີຝົນຕົກລິນຕິດຕໍ່ກັນຫລາຍວັນ ໃນໄລຍະຜ່ານມາ ເຮັດໃຫ້ເກີດມີນໍ້າຖ້ວມຊຸ ແລະ ດິນເຊາະເຈື່ອນຫລາຍຈຸດໃນຂອບເຂດທົ່ວເມືອງເມິງ ແຂວງບໍ່ແກ້ວ ເຮັດໃຫ້ເນື້ອທີ່ການຜະລິດຂອງພໍ່ແມ່ປະຊາຊົນ ແລະ ເສັ້ນທາງຄົມມະນາຄົມ ໄດ້ຮັບຜົນເສຍຫາຍຫລາຍພໍສົມຄວນ.
ຕາມການລາຍງານຂອງຄະນະຄວບຄຸມໄພພິບັດຂັ້ນເມືອງ ໃຫ້ຮູ້ວ່າ: ຕັ້ງແຕ່ຕົ້ນເດືອນ ສິງຫາ 2024 ເປັນຕົ້ນມາ ເກີດມີຝົນຕົກຕິດຕໍ່ກັນຫລາຍວັນ ເຮັດໃຫ້ເກີດມີນໍ້າໄຫລຊຸ ແລະ ຖ້ວມບ້ານເຮືອນຂອງພໍ່ແມ່ປະຊາຊົນຢູ່ໃນຫລາຍພື້ນທີ່ ໃນນີ້ ເຂດທີ່ໄດ້ຮັບຜົນກະທົບຫລາຍກວ່າໝູ່ແມ່ນກຸ່ມບ້ານນໍ້າຍູ້ ລວມມີ 5 ບ້ານ ແລະ ກຸ່ມບ້ານຜາດໍາ 1 ບ້ານຄື: ບ້ານຫ້ວຍດອກທອງ, ບ້ານໄຊຈະເລີນ, ບ້ານນໍ້າຮອກ, ບ້ານໄຊສະຫວ່າງ, ບ້ານສາລີເຮື່ອງ ແລະ ບ້ານຈອມແຈ້ງ ກຸ່ມຜາດໍາ, ມີທັງໝົດ 62 ຄົວເຮືອນ ໃນນີ້, ເນື້ອທີ່ນາທີ່ຖືກນໍ້າຖ້ວມທັງໝົດ 26,03 ເຮັກຕາ, ເນື້ອທີ່ນານໍ້າຖ້ວມທີ່ບໍ່ສາມາດຟື້ນຟູໄດ້ 14,03 ເຮັກຕາ ໃນນັ້ນ, ຜົນເສຍ 60% ຂຶ້ນໄປມີ 7 ຄອບຄົວ. ນອກນີ້, ຍັງມີຝາຍ, ຊົນລະປະທານທີ່ເປ່ເພ 2 ຈຸດ, ດິນເຈື່ອນຖົມທາງ, ທາງເຈື່ອນ, ທາງຂາດ ມີ 94 ຈຸດ ລວມມູນຄ່າເສຍຫາຍໃນເບື້ອງຕົ້ນເກືອບ 3 ຕື້ກີບ.
ຕໍ່ເຫດການດັ່ງກ່າວ, ປັດຈຸບັນຄະນະຄວບຄຸມໄພພິບັດຂັ້ນເມືອງ ກໍໄດ້ມີການຕິດຕາມຢ່າງຕໍ່ເນື່ອງ ແລະ ກໍໄດ້ມີການແຈ້ງໃຫ້ພໍ່ແມ່ປະຊາຊົນທີ່ຢູ່ລຽບຕາມແຄມນໍ້າສາຍຕ່າງໆ ໃຫ້ມີສະຕິ ແລະ ພາກັນຍົກຍ້າຍເຄື່ອງຂອງທີ່ຈຳເປັນຂຶ້ນໄປຢູ່ເຂດທີ່ສູງ ໃນໄລຍະທີ່ຍັງມີຝົນຕົກຕິດຕໍ່ກັນຢູ່.
ຂ່າວ: ຄໍາໃຫຍ່ ຜົນຈະເລີນ
