ວິທະຍຸກະຈາຍສຽງແຫ່ງຊາດ ຫວຽດນາມ ລາຍງານ, ວັນທີ 23 ກໍລະກົດນີ້, ທ່ານ ຫງວຽນ ຝູຈ້ອງ, ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ຈາກໄປຢ່າງບໍ່ ມີວັນຫວນກັບ, ການນຳຫລາຍປະເທດ, ການນຳບັນດາພັກກຳອຳນາດ, ພັກກອມມູນິດໃນໂລກ, ບັນດາພັກຄູ່ຮ່ວມມື, ອົງການ ຈັດຕັ້ງສາກົນ, ປະຊາຄົມຊາວຫວຽດນາມ ອາໄສຢູ່ຕ່າງປະເທດ, ໄດ້ສົ່ງໂທລະເລກ, ຈົດໝາຍ, ສານສະແດງຄວາມເສົ້າສະຫລົດໃຈ ມາຍັງຄະນະບໍລິຫານງານສູນກາງພັກ ກອມມູນິດຫວຽດນາມ, ທ່ານ ໂຕເລິມ, ປະທານປະເທດ, ທ່ານ ຟ້າມ ມິງຈິງ ນາຍົກລັດຖະມົນຕີ, ປະຊາຊົນຫວຽດນາມ ແລະ ຄອບຄົວຂອງ ທ່ານ ຫງວຽນ ຝູຈ້ອງ ເລຂາທິການໃຫຍ່.
ໃນສານ, ທ່ານ ອັນວາ ອິບຣາຮິມ (Anwar Ibrahim), ນາຍົກລັດຖະມົນຕີ ມາເລເຊຍ ໄດ້ເນັ້ນໜັກເຖິງວິໄສທັດຂອງ ທ່ານ ເລຂາທິການໃຫຍ່ ກ່ຽວກັບການປົກປັກ ຮັກສາ ສິດເປັນ ເຈົ້າຕົນເອງ ຍຸດທະສາດ ແລະ ຊຸກຍູ້ ການຄຸ້ມຄອງຢູ່ ສສ ຫວຽດນາມ ອັນໄດ້ສ້າງຄວາມປະທັບໃຈຢ່າງເລິກເຊິ່ງ; ມໍລະດົກຂອງ ທ່ານ ເລຂາທິການໃຫຍ່ ຈະສືບຕໍ່ສ້າງແຫລ່ງບັນດານໃຈໃຫ້ລຸ້ນຕໍ່ໆໄປ ໃນອະນາຄົດຢູ່ ສສ ຫວຽດນາມ ແລະ ທົ່ວເຂດ ອາຊີ ຕາ ເວັນອອກສ່ຽງໃຕ້. ຂະນະທີ່ ທ່ານ ມິນ ອອງລາຍ (Min Aung Hlaing), ປະທານ ສະພາບໍລິຫານແຫ່ງລັດ ມຽນມາ, ຖືວ່າ, ການຊີ້ນຳ-ນຳພາ ແລະ ການອຸດທິດສ່ວນຂອງທ່ານ ເລຂາທິການໃຫຍ່ ໃຫ້ແກ່ ປະເທດຊາດ ໄດ້ສ້າງຂີດໝາຍບໍ່ສາມາດຈືດຈາງ ໃນປະຫວັດສາດ ອັນຍິ່ງໃຫຍ່ຂອງ ສສ ຫວຽດນາມ.ໂດຍສະແດງ ຄວາມເຄົາລົບ, ນັບຖື ແລະ ຄວາມໂສກເສົ້າ ເສຍດາຍຕໍ່ ການຈາກໄປຂອງ ທ່ານ ເລຂາທິການໃຫຍ່ ຫງວຽນ ຝູຈ້ອງ, ປະຊາຄົມຊາວ ຫວຽດນາມ ອາໄສຢູ່ຕ່າງປະເທດ ແລະ ບັນດາສະມາຄົມຊາວ ຫວຽດນາມ ອາໄສຢູ່ ສປປ ລາວ, ກຳປູເຈຍ, ມາເລເຊຍ, ສິງກະໂປ, ໄທ, ເຢຍລະມັນ, ມາເກົາ (ສປ ຈີນ) ກໍ່ໄດ້ສົ່ງຈົດໝາຍ, ໂທລະເລກ ສະແດງຄວາມເສົ້າສະຫລົດໃຈ ແລະ ມີຫລາຍຮູບແບບ ສະ ແດງນ້ຳໃຈ ອັນສຸດຊື້ງ, ສະແດງ ຄວາມຮູ້ບຸນຄຸນຕໍ່ ກັບພາລະກິດ, ຄຸນງາມຄວາມດີ ແລະ ການປະກອບສ່ວນ ຂອງທ່ານ ເລຂາທິ ການໃຫຍ່ ຫງວຽນ ຝູຈ້ອງ ໃນພາລະກິດແຫ່ງການສ້າງສາ, ພັດທະນາ ແລະ ປົກປັກຮັກສາ ປະເທດຊາດ, ນ້ຳໃຈ ຄວາມຮັກແພງ ຂອງທ່ານ ເລຂາທິການໃຫຍ່ ຫງວຽນ ຝູຈ້ອງ ກັບຊາວ ຫວຽດນາມ ອາໄສຢູ່ ຕ່າງປະເທດ. ໃນຂະນະນັ້ນ, ວັນທີ22 ກໍລະກົດ ຢູ່ ນິວເດລີ, ກ່ອນດຳເນີນ ວາລະກອງປະຊຸມ ກ່ຽວກັບ ງົບປະມານ, ບັນດາສະມາຊິກ ລັດຖະສະພາ ອິນເດຍ ໄດ້ສະຫງວນ ເວລາ 1 ນາທີ ເພື່ອໄວ້ອາໄລ ທ່ານ ເລຂາທິການໃຫຍ່ ຫງວຽນ ຝູຈ້ອງ.
ຕາມແຈ້ງການ ຂອງກະຊວງການຕ່າງປະເທດ ສະຫະລັດ ອາເມລິກາ ໃນວັນດຽວກັນ , ທ່ານ ແອນໂທນີ ບຣິນເຄັນ (Antony Blinken), ລັດຖະມົນຕີ ການຕ່າງປະເທດ ຈະເດີນທາງມາ ສສ ຫວຽດນາມ ເຂົ້າຮ່ວມ ພິທີງານສົບ ຂອງທ່ານ ເລຂາທິການໃຫຍ່ ຫງວຽນ ຝູຈ້ອງ.
