ຫລາຍພາກສ່ວນມອບເງິນຊ່ວຍເຫລືອໄພພິບັດ

ວັນທີ 29 ສິງຫາ 2024 ນີ້ ທີ່ນະຄອນຫລວງວຽງຈັນ, ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ( ຮສສ) ໄດ້ຮັບເງິນຊ່ວຍເຫລືອຕ້ານໄພພິບັດນ້ຳຖ້ວມ ລວມມີ: ຈາກ ບໍລິສັດ ສະຕາໂທລະຄົມ ຈຳນວນ 500 ລ້ານກີບ, ບໍລິສັດລັດ 20 ມັງກອນພັດທະນາ 300 ລ້ານກີບ, ບໍລິສັດ ເບສ ເທເລຄອມ 300 ລ້ານກີບ ແລະ ບໍລິສັດລາວ ພັດທະນາຊົນນະບົດ ຂອງກະຊວງປ້ອງ ກັນປະເທດ ຈຳນວນ 100 ລ້ານກີບ.

ທ່ານ ນາງ ໃບຄຳ ຂັດທິຍະ ຍັງໃຫ້ຮູ້ອີກວ່າ: ນັບແຕ່ຕົ້ນເດືອນກໍລະກົດ ຮອດວັນທີ 28 ສິງຫາ 2024 ນີ້, ເກີດມີຝົນຕົກຕາມລະດູການ ບວກກັບກະແສລົມມໍລະສຸມ ພະຍຸເຂດຮ້ອນ ເປັນຕົ້ນ ພາຍຸດີເປຣຊັນ (Depression) ພາຍຸໝູນເຂດຮ້ອນ ພຣະພິຣູນ (Prapiroon) ໄດ້ພັດຜ່ານເຂົ້າ ສປປ ລາວ ເຮັດໃຫ້ເກີດມີຝົນໜັກ ຕໍ່ເນື່ອງ ຢູ່ຫລາຍແຂວງ ກໍໃຫ້ເກີດໄພພິບັດ ນໍ້າຖ້ວມ, ນໍ້າຖ້ວມຍື່ງ, ນໍ້າຊຸ ແລະ ດິນເຈື່ອນ ໄດ້ສົ່ງຜົນກະທົບ ຕໍ່ 13 ແຂວງ ຄື: ນະຄອນຫລວງວຽງຈັນ, ສາລະວັນ, ຄໍາມ່ວນ, ຫລວງພະບາງ, ຊຽງຂວາງ, ຫົວພັນ, ເຊກອງ, ວຽງຈັນ, ບໍ່ແກ້ວ, ໄຊຍະບູລີ, ບໍລິຄໍາໄຊ, ອຸດົມໄຊ ແລະ ໄຊສົມບູນ ລວມທັງໝົດ 60 ເມືອງ, 541 ບ້ານ, 17.548 ຄອບຄົວ, ກວມຈໍານວນພົນ 36.208 ຄົນ, ຍິງ 15.384 ຄົນ. ໃນນີ້, ມີຜູ້ເສຍຊີວິດ 3 ຄົນ ແລະ ສູນຫາຍ 1 ຄົນ (ແຂວງໄຊສົມບູນ 2 ຄົນ ເປັນເພດຍິງ ຕົ້ນໄມ້ລົ້ມທັບ, ແຂວງບໍລິຄໍາໄຊ 1 ຄົນ ຈົມນໍ້າ, ແຂວງໄຊຍະບູລີ ສູນຫາຍ 1 ຄົນ ນໍ້າໄຫລຊຸ), 72 ຄອບຄົວ ຖືກຍົກຍ້າຍຊົ່ວຄາວ, ເຮືອນ 125 ຫລັງເປ່ເພ, ເນື້້ອທີ່ທໍາການຜະລິດ ຖືກຜົນກະທົບ 9.763.28 ເຮັກຕາ, ທາງເປ່ເພ 177 ເສັ້ນ, ຂົວ 12 ແຫ່ງ, ຊົນລະ ປະທານ 79 ແຫ່ງ, ສຸກສາລາ 2 ແຫ່ງ, ນໍ້າລິນ 30 ແຫ່ງ, ໜອງປາ 334 ໜອງ, ສັດລ້ຽງ (ງົວ,ຄວາຍ,ແບ້,ໝູ ແລະ ສັດປີກ) ລວມຈໍານວນ 13.478 ໂຕ.

ນອກນີ້, ຂະແໜງສຶກສາທິການ, ສາທາລະນະສຸກ ກໍໄດ້ຮັບຜົນກະທົບ ເຊັ່ນກັນ ເຊິ່ງຄາດຄະເນມູນຄ່າເສຍຫາຍເບື້ອງຕົ້ນ ແມ່ນ 318.615.427.690 ກີບ. (ຕົວເລກມູນຄ່າຜົນກະທົບ-ຜົນເສຍຫາຍເບື້ອງຕົ້ນ ຍັງບໍ່ໄດ້ລວມ ແຂວງເຊກອງ, ແຂວງອຸດົມໄຊ ແລະ ນະຄອນຫລວງວຽງຈັນ).

ໃນໂອກາດນີ້ , ທ່ານນາງ ໃບຄຳ ຂັດທິຍະ ໄດ້ສະແດງຄວາມຂອບໃຈ ແລະ ຕີລາຄາສູງ ຕໍ່ບັນດາບໍລິສັດ ທີ່ເຫັນໄດ້ຄວາມສຳຄັນ ນຳເອົາເງິນຈຳນວນດັ່ງກ່າວມາມອບໃຫ້ໃນຄັ້ງນີ້, ພ້ອມທັງຍືນຍັນວ່າ ຈະນຳເອົາເງິນທີ່ໄດ້ຮັບໃນຄັ້ງນີ້, ໄປນຳໃຊ້ໃຫ້ເກີດຜົນປະໂຫຍດສູງສຸດ ກໍຄື ນຳໄປຊ່ວຍເຫລືອ ບັນເທົາທຸກ ໃນເບື້ອງຕົ້ນ ໃຫ້ປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມ ຢູ່ນະຄອນຫລວງວຽງຈັນ, ບັນດາແຂວງ ແລະ ເມືອງ ໃນຂອບເຂດທົ່ວປະເທດ.