ພາຍຫລັງທີ່ເກີດມີໄພນໍ້າຖ້ວມ ຢູ່ 3 ເມືອງ ຄື ເມືອງໄຊ, ເມືອງຫລາ ແລະ ເມືອງນາຫມໍ້ ຂອງແຂວງອຸດົມໄຊ ໃນວັນທີ 26 ສິງຫາ ຜ່ານມາ ກໍໄດ້ມີຫລາຍພາກສ່ວນ ທັງພາກລັດ ແລະ ເອກະຊົນ ເຂົ້າໃຫ້ການຊ່ວຍເຫລືອ ໂດຍການນຳເອົາວັດຖຸ,ປັດໃຈ ແລະ ເຄື່ອງອຸປະໂພກ – ບໍລິໂພກ ຕ່າງມອບໃຫ້ການນຳແຂວງ ເພື່ອສືບຕໍ່ນຳໄປແຈກຢາຍ ໃຫ້ແກ່ປະຊາຊົນ ທີ່ໄດ້ຮັບຜົນກະທົບດັ່ງກ່າວ ໃຫ້ທົ່ວເຖິງ ແລະ ທັນກັບສະພາບການ. ແຕ່ມາຮອດປັດຈຸບັນນີ້ ຄື ວັນທີ 14 ກັນຍາ 2022 ກໍຍັງມີຫລາຍພາກສ່ວນ ທີ່ນຳເອົາວັດຖຸ ແລະ ປັດໃຈ ເຂົ້າມອບໃຫ້ການນຳແຂວງ ເຊິ່ງມີພິທີມອບ – ຮັບຢູ່ທີ່ຫ້ອງວ່າການແຂວງອຸດົມໄຊ.
ເຊິ່ງແຕ່ລະພາກສ່ວນທີ່ນໍາເອົາ ວັດຖຸ ແລະ ປັດໃຈ ເຂົ້າມອບໃຫ້ການນໍາແຂວງອຸດົມໄຊ ເພື່ອນໍາໄປຊ່ວຍເຫລືອປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມ ໃນຄັ້ງນີ້ປະກອບມີ :ອົງການກາແດງ ແຂວງຫລວງພະບາງ ມອບເປັນເງິນສົດ ຈຳນວນ 3 ລ້ານກີບ ແລະ ນ້ຳດື່ມ ຈຳນວນ 100 ແພັກ ລວມເປັນມູນຄ່າທັງຫມົດ 47 ລ້ານກີບ ມອບໂດຍທ່ານ ດຣ ສິງຄຳ ມິ່ງບຸນຕາ ຮອງຫົວຫນ້າ ອົງການກາແດງ ແຂວງຫລວງພະບາງ, ສູນກາງສະຫະພັນກຳມະບານລາວ ມອບເງິນສົດ ຈຳນວນ 40 ລ້ານກີບ ຕາງຫນ້າມອບໂດຍທ່ານ ພອນສານ ວິໄລເມັ້ງ ຮອງປະທານສູນກາງ ສະຫະພັນກຳມະບານລາວ, ສູນກາງແນວລາວສ້າງຊາດ ມອບເງິນສົດ ຈຳນວນ 10 ລ້ານກີບ ມອບໂດຍທ່ານ ສຈ ປອ ອ໊ອດ ພົງສະຫວັນ ຮອງປະທານສູນກາງແນວລາວສ້າງຊາດ, ເມືອງຜາອຸດົມ ແຂວງບໍ່ແກ້ວ ມອບເງິນສົດ 20 ລ້ານກີບ ແລະ ເຂົ້າສານຫນຽວ ຈໍານວນ 500 ກິໂລກຣາມ ລວມເປັນມູນຄ່າທັງຫມົດ 24 ລ້ານ 5 ແສນ ກີບ, ມອບໂດຍທ່ານ ກາງ ມະນີຫວ່າງ ຮອງເຈົ້າເມືອງ ຜາອຸດົມ ແຂວງບໍ່ແກ້ວ ແລະ ພະແນກ ພາຍໃນແຂວງອຸດົມໄຊ ມອບເງິນສົດ ຈຳນວນ 2 ລ້ານກີບ ມອບໂດຍທ່ານນາງ ສົມລີ ສີອ່ອນຕາ ຮອງຫົວຫນ້າພະແນກ ພາຍໃນແຂວງ ແລະ ຮັບໂດຍ ທ່ານ ຄຳພຽງ ຢາຈົງວາ ຮອງເລຂາພັກແຂວງ ແລະ ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ ພັດປ່ຽນກັນ. ໂອກາດດັ່ງກ່າວ ຕາງຫນ້າການນຳແຂວງ ໄດ້ສະແດງຄວາມຂອບໃຈ ມາຍັງທຸກພາກສ່ວນ ທີ່ໃຫ້ການຊ່ວຍເຫລືອ ແລະ ທາງແຂວງ ຈະນຳເອົາວັດຖຸ ແລະ ປັດໃຈ ທີ່ໄດ້ຮັບໃນຄັ້ງນີ້ ລົງໄປຊ່ວຍເຫລືອ ແລະ ແຈກຢາຍໃຫ້ປະຊາຊົນ ທີ່ໄດ້ຮັບຜົນກະທົບຈາກໄພນ້ຳຖ້ວມ ຢູ່ຂັ້ນເມືອງ ຢ່າງຮີບດ່ວນ.
ຂ່າວ: ຄານມະນີ ຮຽນດໍຈັນ
