ຫວນຄືນໄຊຊະນະປົດປ່ອຍພາກໃຕ້ຫວຽດນາມ ຄົບຮອບ 49 ປີ
ວັນທີ 30 ເມສາ ແມ່ນວັນປົດປ່ອຍພາກໃຕ້ ແລະ ທ້ອນໂຮມປະເທດຫວຽດນາມເປັນໜຶ່ງດຽວ ເຊີ່ງມາຮອດປີນີ້ ຄົບຮອບ 49 ປີພໍດີ (30/4/1975-30/4/2024). ເມື່ອຫວນຄືນປະ ຫວັດສາດນັບແຕ່ທ້າຍສັດຕະວັດທີ XIX ຫາ ຕົ້ນສະຕະວັດທີ XX ທີ່ລັດທິລ່າເມືອງຂຶ້ນຝຣັ່ງໄດ້ເຂົ້າມາຮຸກຮານ ແລະ ຢຶດເອົາ 3 ຊາດອິນດູຈີນກາຍເປັນຫົວເມືອງຂຶ້ນ, ພາຍໃຕ້ການນຳພາຂອງພັກກອມມູນິດອິນດູຈີນ ແລະ ປະທານ ໂຮ່ຈີ່ມິງ, ປະຊາຊົນຫວຽດນາມ ໄດ້ລຸກຮືຂຶ້ນຕໍ່ສູ້ຈົນສາມາດຂຶ້ນຢຶດອໍານາດ ແລະ ປະກາດເອກະລາດໃນວັນທີ 2 ກັນຍາ ປີ 1945.
ແຕ່ມາຮອດ ປີ 1946 ພວກຈັກກະພັດຝຣັ່ງ ໄດ້ກັບຄືນມາຮຸກຮານຫວຽດນາມ ເປັນຄັ້ງທີ 2, ປະຊາຊົນຊາວຫວຽດນາມ ໄດ້ພ້ອມກັນຕໍ່ສູ້ກັບພວກຈັກກະພັດຝຣັ່ງຈົນຮອດວັນທີ 7 ພຶດສະພາ ປີ 1954 ຈິ່ງໄດ້ຮັບໄຊຊະນະ ແລະ ທັບມ້າງສູນບັນ ຊາການໃຫຍ່ຂອງຝຣັ່ງຢູ່ດຽນບຽນຟູ ແລ້ວນຳໄປສູ່ການເຊັນສັນຍາເຊີແນວກ່ຽວກັບອິນດູຈີນໃນວັນທີ 20 ກໍລະກົດ ປີ 1954.
ພາຍຫລັງເຊັນສັນຍານໍ້າມຶກບໍ່ທັນແຫ້ງ, ພວກຈັກກະພັດອາເມລິກາ, ສັດຕູທີ່ມີກໍາລັງທະຫານ ແລະ ອາວຸດທັນສະໄໝຂອງໂລກ ໄດ້ເຂົ້າມາແທນທີ່ເພື່ອຮຸກຮານຫວຽດນາມ ກໍ່ຄື ປະເທດອິນດູຈີນ. ພວກເຂົາໄດ້ນໍາໃຊ້ຍຸດທະສາດ ແລະ ກົນອຸບາຍຕັດ ແບ່ງຫວຽດນາມອອກເປັນ 2 ພາກ ນັບແຕ່ເສັ້ນຂະໜານທີ 17 ອົງສາ ລົງໄປເປັນພາກໃຕ້ຢູ່ໃນເຂດຄວບຄຸມຊົ່ວຄາວຂອງອາເມລິ ກາ ແລະ ພວກທະຫານຫຸ່ນໄຊງ່ອນ, ຈາກນັ້ນ ໄດ້ເປີດສົງຄາມກັບພາກເໜືອຫວຽດນາມ, ກວາດເອົາປະຊາຊົນໄປຄ້າຍອົບພະຍົບຢູ່ພາກໃຕ້, ດຳເນີນສົງຄາມແຕ່ຝ່າຍດຽວ ແລະ ເຂັ່ນຂ້າປະຊາຊົນຫວຽດນາມຫລາຍກວ່າ 8 ໝື່ນຄົນ, ຈັບກຸມຜູ້ຮັກຊາດຫລາຍກວ່າ 5 ແສນຄົນ.
ຕະຫລອດໄລຍະ 21 ປີ ທີ່ຄອບຄອງພາກໃຕ້ຫວຽດນາມ, ພວກຈັກກະພັດອາເມລິກາ ໄດ້ລົງທຶນຫລາຍທີ່ສຸດໃຫ້ແກ່ລັດທິຕ້ານກອມມູນິດ, ນັບທັງພື້ນຖານວັດຖຸ, ເງິນຄຳ, ອາວຸດຍຸດທະ ພັນ ແລະ ເລ່ຫລ່ຽມດ້ານວັດທະນະທຳ, ແນວຄິດທີ່ໂຫດຫ້ຽມ ແລະ ປະຕິການຂູດຮີດ.
ເວົ້າໄດ້ວ່າ ພວກເຂົາ ໄດ້ທຳລາຍຫວຽດນາມແບບສົງຄາມລ້າງຜານທີ່ບໍ່ເຄີຍມີມາຕະຫລອດເຄິ່ງທ້າຍສະຕະວັດທີ 20, ແມ່ນສົງຄາມເຂັ່ນຂ້າດ້ວຍລະເບີດ, ລູກປືນ, ດ້ວຍຍົນຍຸດທະ ສາດທັນສະໄໝທີ່ສາມາດຖິ້ມລະເບີດ, ລູກບົ່ມທາດເຄມີລົງລ້າງຜານນັບທັງຄົນ ແລະ ສັດ, ຕະຫລອດຮອດພຶກສາຊາດກໍ່ຖືກທຳລາຍກ້ຽງ.
ດ້ວຍນ້ຳໃຈຮັກຊາດອັນແຮງກ້າ, ບວກກັບຄວາມຄຽດແຄ້ນຈັກກະພັດຜູ້ຮຸກຮານຂອງປະຊາຊົນຫວຽດນາມ ຜູ້ພິລະອາດ ຫານ ໂດຍສືບຕໍ່ມູນເຊື້ອວິລະຊົນແຫ່ງການສ້າງສາ ແລະ ປົກປັກ ຮັກສາປະເທດຊາດມາດົນເຖີງ 4 ພັນປີ, ປະຊາຊົນຫວຽດນາມ ພາຍໃຕ້ການນຳພາຂອງພັກກອມມູນິດຫວຽດນາມ ໄດ້ລຸກຮືຂຶ້ນຕໍ່ສູ້ກູ້ຊາດຕ້ານຈັກກະພັດອາເມລິກາ ແລະ ລູກມື ເປັນເວລາ 20 ກວ່າປີຢ່າງໝັ້ນໜຽວ ເພື່ອກອບກູ້ເອົາເອກະລາດ, ອິດສະລະ ພາບມາໃຫ້ປະເທດຊາດຕົນຕາມຄຳສັ່ງສອນຂອງພັກຂອງ ປະ ທານ ໂຮ່ຈີ່ມິງ ທີ່ວ່າ: “ບໍ່ມີຫຍັງປະເສີດເລີດລ້ຳກວ່າເອກະລາດ ແລະ ເສລີພາບ”.
ຜ່ານການຕໍ່ສູ້ຢ່າງໝັ້ນໜຽວໃນບັ້ນຮົບປົດປ່ອຍພາກໃຕ້ຫວຽດນາມ ເຊີ່ງໃສ່ຊື່ວ່າ: “ບັ້ນຮົບໂຮ່ຈິມິນ” ຈົນມາຮອດວັນທີ 30 ເມສາ 1975 ກອງທັບ ແລະ ປະຊາຊົນຫວຽດນາມ ໄດ້ບຸກຢຶດເອົາທໍານຽບເອກະລາດຂອງລັດຖະບານຫຸ່ນໄຊງ່ອນ, ຜືນທຸຊາດຂອງລັດຖະບານຊົ່ວຄາວພາກໃຕ້ຫວຽດນາມໄດ້ປັກຂຶ້ນທີ່ທໍານຽບປະທານນາທິບໍດີ ຫງວຽນວັນທ້ຽວ ແລະ ປະທານນາທິບໍດີ ເຢືອງວັນມິນ ຕ້ອງໄດ້ປະກາດຍອມຈໍານົນຢ່າງບໍ່ມີເງື່ອນໄຂ ເຮັດໃຫ້ສະໜາມຮົບໂຮຈິມິນ ໄດ້ຮັບໄຊຊະນະສົມບູນ.
ຈາກນັ້ນບັ້ນຮົບໃຫຍ່ໆ ແລະ ການລຸກຮື້ຂຶ້ນໃນລະດູບານໃໝ່ປີ 1975 ໄດ້ຮັບໄຊຊະນະຢ່າງສົມບູນ, ພາກໃຕ້ຫວຽດນາມໄດ້ຮັບການປົດປ່ອຍ ແລະ ເຮັດໃຫ້ທົ່ວປະເທດຫວຽດນາມໄດ້ຮັບການ ປົດປ່ອຍຢ່າງສົມບູນ.
ໄຊຊະນະປົດປ່ອຍພາກໃຕ້ຫວຽດນາມ ໃນວັນທີ 30 ເມສາ 1975 ຖືເປັນຂີດໝາຍ ແລະ ເປັນບາດລ້ຽວປະຫວັດສາດສຳ ຄັນຍິ່ງຂອງປະເທດຫວຽດນາມ, ແມ່ນບັ້ນຮົບສຸດທ້າຍໃນການ ຕໍ່ສູ້ເພື່ອທ້ອນໂຮມປະເທດຫວຽດນາມເປັນເອກະພາບອັນໜຶ່ງອັນດຽວ, ແມ່ນໄຊຊະນະຂອງກອງທັບ ແລະປະຊາຊົນຫວຽດ ນາມ ໃນຂະບວນວິວັດແຫ່ງການຕໍ່ສູ້ກູ້ຊາດຕ້ານຈັກກະພັດຜູ້ຮຸກຮ້ານ, ແມ່ນໝາກຜົນອັນຍິ່ງໃຫຍ່ໃນຂະບວນການປົດປ່ອຍຊາດ, ປົດ ປ່ອຍສັງຄົມ ໂດຍແມ່ນພັກກອມມູນິດຫວຽດນາມ ແລະ ປະທານໂຮ່ຈິມິງ ເປັນຜູ້ນຳພາສ້າງປະຫວັດສາດທີ່ພິລະອາດຫານ ແລະ ສະຫວ່າງສະໄຫວໃນຂະບວນວິວັດແຫ່ງການກໍ່ຕັ້ງ ແລະ ປົກ ປັກຮັກສາປະເທດຊາດຫວຽດນາມນັບເປັນພັນໆ ປີຜ່ານມາ, ທັງເປັນການໄຂສັງກາດໃຫ້ຫວຽດນາມມີສັນຕິພາບ, ເອກະພາບ ແລະ ກ້າວຂຶ້ນສັງຄົມນິຍົມ, ດຳເນີນການປ່ຽນແປງໃໝ່, ຫັນເປັນ ອຸດສາຫະກຳ ແລະ ທັນສະໄໝ.
ພ້ອມນີ້ ໄຊຊະນະທີ່ເປັນປະຫວັດສາດດັ່ງກ່າວ ຍັງເປັນກຳລັງແຮງທີ່ຊະນະເລີດໃນການປະຕິບັດສອງໜ້າທີ່ຍຸດທະສາດ ແລະ ພິໄນກຳທີ່ຊັກກາລະບູຊາໃຫ້ແກ່ຮຸ້ນລູກຮຸ້ນຫລານຂອງສອງຊາດ ລາວ- ຫວຽດນາມ ສືບທອດປະຕິບັດຈົນຊົ່ວກາລະນານ.
