ພິທີເຊັນບົດບັນທຶກ ການຮ່ວມມືສາທິດເຕັກນິກການປູກໝາກອາກາດີເມຍ ລະຫວ່າງ ພະແນກກະສິກໍາ – ປ່າໄມ້ແຂວງຜົ້ງສາລີ ແຫ່ງ ສປປ ລາວ ກັບ ພະແນກກະສິກໍາ ແລະ ພັດທະນາຊົນນະບົດແຂວງດຽນບ່ຽນ ແຫ່ງ ສສ ຫວຽດນາມ ໄດ້ຈັດຂຶ້ນຢ່າງເປັນທາງການຢູ່ຫ້ອງປະຊຸມຂອງຫ້ອງວ່າການເມືອງໃໝ່ ແຂວງຜົ້ງສາລີ ໂດຍການເຂົ້າຮ່ວມຂອງທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງຜົ້ງສາລີ, ມີທ່ານ ລໍ ວັ່ນ ຕ້ຽນ ກຳມະການພັກແຂວງ, ຮອງເຈົ້າແຂວງ-ແຂວງດຽນບ່ຽນ ແຫ່ງ ສສ ຫວຽດນາມ.
ໃນພິທີໄດ້ປຶກສາຫາລື ບົນພື້ນຖານ ຄວາມສາມັກຄີ, ມິດຕະພາບ ແບບພິເສດ, ເຊື່ອໝັ້ນເຊິ່ງກັນ ແລະ ກັນ, ແທດເໝາະກັບພາລະບົດບາດ, ຄວາມຮັບຜິດຊອບ, ຂອບເຂດ, ສິດ ແລະ ຖືກຕ້ອງຕາມລະບຽບກົດໝາຍ ແລະ ນິຕິກໍາທີ່ກ່ຽວຂ້ອງຂອງແຕ່ລະປະເທດ. ສອງຝ່າຍໄດ້ລາຍງານໃຫ້ກັນຮັບຊາບ ຜົນສໍາເລັດການຮ່ວມມືໃນຂົງເຂດກະສິກຳໃນໄລຍະຜ່ານມາ ແລະ ສືບຕໍ່ການຮ່ວມມືຊ່ວຍເຫຼືອດ້ານເຕັກນິກວິຊາການ, ແນວພັນ ໝາກອາກາດີເມຍ ປີ 2024, ລວມມີບັນດາເນື້ອໃນໜ້າວຽກລະອຽດຄື: ພະແນກກະສິກຳ ແລະ ພັດທະນາຊົນນະບົດ ແຂວງດຽນບຽນຈະເປັນເສນາທິການ ແລະ ນໍາສະເໜີຕໍ່ການນໍາແຂວງດຽນບຽນ ຊ່ວຍແຂວງຜົ້ງສາລີປູກທົດລອງຕົ້ນໝາກມາຄາເດເມຍ ຈໍານວນເນື້ອທີ່ 5 ເຮັກຕາ, ພ້ອມທັງສະໜັບສະໜູນແນວພັນ, ຝຸ່ນ ແລະ ຢາປາບສະຕູພຶດທັງໝົດ; ຊ່ວຍເຫຼືອດ້ານເຕັກ ນິກການປູກ ແລະ ການບົວລະບັດຮັກສາຕົ້ນອາກາເດເມຍ. ສ່ວນພະແນກກະສິກຳ ແລະ ປ່າໄມ້ ແຂວງຜົ້ງສາລີ ຮັບຜິດຊອບກະ ກຽມຄວາມພ້ອມໃນການປູກ, ການບົວລະບັດຮັກສາ ແລະ ການ ຄຸ້ມຄອງຕົ້ນອາຄາເດເມຍ ຕາມການແນະນໍາດ້ານເຕັກນິກຂອງພາກສ່ວນວິຊາການ ແຂວງດຽນບຽນ(ກະກຽມສະຖານທີ່ປູກ, ຂຸດຂຸມ, ການປູກ, ບົວລະບັດ, ຄຸ້ມຄອງ ແລະ ປົກປັກຮັກສາສວນປູກ).
ສຳລັບການຈັດຕັ້ງການຈັດຕັ້ງປະຕິບັດສອງພະແນກຕອ້ງເພີ່ມທະວີການນຳພາ, ຊີ້ນໍາບັນດາພາກສ່ວນທີ່ຂື້ນກັບຕົນ ຈັດຕັ້ງປະຕິບັດ ແລະ ຜັນຂະຫຍາຍບັນດາເນື້ອໃນທີ່ໄດ້ລົງນາມຢ່າງມີປະສິດທິຜົນ, ໂດຍພະແນກກະສິກໍາ ແລະ ພັດທະ ນາຊົນນະບົດແຂວງດຽນບຽນ ເປັນເຈົ້າການ, ເພື່ອຕິດຕາມຊຸກຍູ້, ຕີລາຄາໝາກຜົນການປູກທົດລອງຕົ້ນໝາກມາຄາເດເມຍ; ສັງລວມ, ລາຍງານ ແລະ ສະເໜີຕໍ່ຂັ້ນເທີງທີ່ມີອໍານາດກ່ຽວຂ້ອງກັບຂະບວນການຈັດຕັ້ງປະຕິບັດນີ້; ພະແນກກະສິກໍາ ແລະ ປ່າໄມ້ແຂວງຜົ້ງສາລີ ເປັນເຈົ້າການ, ເພື່ອຕິດຕາມຊຸກຍູ້, ຕີລາຄາໝາກຜົນການປູກທົດລອງຕົ້ນໝາກອາຄາເດເມຍ; ສັງລວມ, ລາຍງານ ແລະ ສະເໜີຕໍ່ຂັ້ນເທີງທີ່ມີອໍານາດກ່ຽວຂ້ອງກັບຂະບວນການຈັດ ຕັ້ງປະຕິບັດວຽກງານຮ່ວມມື.
ຈາກນັ້ນກໍ່ໄດ້ຮ່ວມລົງນາມຮ່ວມກັນຕາງໜ້າແຂວງຜົ້ງ ສາລີ ເຊັນໂດຍທ່ານ ສົມຈິດ ສິດທິວົງ ຫົວໜ້າພະແນກກະສີກຳ ແລະ ປ່າໄມ້ແຂວງຜົ້ງສາລີ ຕາງໜ້າແຂວງດຽນບ່ຽນ ລົງນາມໂດຍທ່ານ ນາງ ຈຸຖິ້ ແທັງຊັວນ ຮອງຫົວໜ້າພະແນກກະສິກຳ ແລະ ພັດທະນາຊົນນະບົດ ແຂວງດຽນບຽນ ໂດຍຊ່ອງໜ້າຈາກການນຳທັງສອງຝ່າຍເຂົ້າຮ່ວມເປັນສັກຂິພິຍານ.
ພາບຫຼັງເຊັນພິທີສຳເລັດແລ້ວ ຄະນະທັງສອງຝ່າຍໄດ້ລົງພື້ນທີ່ສຳຫຼວດເນື້ອທີ່ດິນຕົວຈິ່ງ ເຊິ່ງເບື້ອງຕົ້ນໄດ້ສຳຫຼວດເນື້ອທີ່ໄວ້ຢູ່ທີ່ 5 ແຮັກຕາໃນການສາທິດປູກໝາກອາກາດີເມຍ ມາຮອດປະຈຸບັນ ແມ່ນສໍາເລັດການອານາໄມ ຕັດຫຍ້າ, ລ້ອມຮົ້ວ, ຂຸດຂຸມ, ຈຳນວນ 1 ແຮັກຕາ, ສ່ວນ 4 ແຮັກຕາ ແມ່ນຈະກະກຽມພື້ນທີ່ປູກໃນໄວໆນີ້ ແລະ ຄາດວ່າຈະຂະຫຍາຍເນື້ອຕື່ມອີກໃນອານາຄົດ.
